2000 جىلدىڭ اقپان ايىندا الماتى شاھارىنداعى فۋرمانوۆ كوشەسىنىڭ بويىنداعى ءۇيدىڭ (قاراساي باتىر كوشەسىمەن قيىلىسىندا) قابىرعاسىنا حالقىمىزدىڭ ءبىرتۋار ۇلدارىنىڭ ءبىرى، اكادەميك، جازۋشى، اۋدارماشى ەبىنەي ارىستانۇلى بوكەتوۆكە ارنالعان مەموريالدىق تاقتا اشىلىپ ورناتىلعان ەدى. 

بۇل شارا الماتى قالاسى اكىمدىگىمەن شەشىمىمەن عالىمنىڭ 75 جىلدىق مەرەيتويىنا وراي جاسالعان. وعان ەلىمىزدىڭ زيالى قاۋىم وكىلدەرى بايكەن ءاشىموۆ، كاكىمبەك سالىقوۆ، شوتا ءۋاليحانوۆ، تۇمانباي مولداعاليەۆ، ەسلام زىكىباەۆ، تاعى دا ءبىرسىپىرا مادەنيەت، عىلىم قايراتكەرلەرى قاتىسىپ ءسوز سويلەگەن بولاتىن. سول مەموريالدى تاقتا بۇگىندەرى جوق، الىنىپ تاستالىپتى. كىم مۇنى ىستەگەن؟ كىم مۇندايعا جول بەرگەن؟ جاۋاپ ءالى جوق. مۇنداي ىستەرمەن الماتى قالاسى مادەنيەت باسقارماسى شۇعىلدانادى ەكەن.

ۇلىلارىمىزعا تاس اتۋ جورىعى توقتالماي كەلەدى. انا ءبىر كەزدە جاۋتىكوۆ اتىنداعى دارىندىلار مەكتەبىنەن جاۋتىكوۆتىڭ ەسىمى الىنىپ تاستالعان بولاتىن. ەندىگىسى مىناۋ. الماتىدا، استانادا مۇنداي جونسىزدىكتەرگە بارسا، قالعاندارىنا نە جورىق؟  

ۇعىپ السىن، قورتىق ويلى مەشەل ماڭگۇرتتەر: بوكەتوۆ پەن جاۋتىكوۆ سوناۋ ۇلى ساتباەۆ تۇسىندا مويىندالعان ناعىز عالىمدار، قازىرگى ساموپال عالىمسىماقتار سياقتى ەمەس. ولاردىڭ ەسىمدەرى ماڭگى ساقتالعان. جاۋتىكوۆتىڭ شاكىرتتەرى قازىرگى تاڭدا حالىقارالىق ۇلكەن وليمپيادالاردا جەڭىسكە جەتىپ، ۇكىمەت دالىزدەرىندە قىزمەت ىستەيدى. ال، بوكەتوۆتىڭ عىلىمعا، مادەنيەتكە سىڭىرگەن ەڭبەگى ۇشان-تەڭىز...

قاراۋلىقپەن تاس اتقان بۋمەرانگپەن وزىنە كەپ ءدال تيەتىنى ءسوزسىز. اتالمىش اعالارىمىز ەلىمىزدى ءبىراز جەتىستىكتەرگە جەتكىزگەن، ال تاس اتقاندار قازىر قانداي ۇشپاققا جەتىپتى، ايتسىنشى؟!

باقىتجان توباياقتەگى، اقىن، بوكەتوۆتىڭ شاكىرتى

Abai.kz