ماسەلەن، «اۆتونۇر» بازارىنداعى كولىكتەن ساتىلىپ جاتقان كوكونىستەن باسقا بارلىق ونىمدەر تۇراقتاندىرۋ قورىنداعى بىلتىردان قالعان تاۋ-ارلار ەكەن. كوكونىس باعالارىنا توقتالىپ وتسەك، ءسابىز – 75, پاۆلودارلىق كارتوپ – 65 تەڭگەدەن ساتىلىپ جاتىر. ال، «جاڭا شاھار» بازارىندا كوكونىس باعاسى بەس تەڭگەگە ارزان ساۋدالانۋدا.

سونداي-اق، تۇراقتاندىرۋ قورىنىڭ قويماسىندا بىلتىردان قالعان 1000 توننا قۇمشەكەر، 140 توننا ماكارون ونىمدەرى، 203 توننا كۇرىش بار. وسى رەتتە، كورپوراتسيا استىقتىڭ جيىن – تەرىمى اياقتالۋىنا بايلانىستى تاۋار وندىرۋشىلەرىمەن كەلىسىمشارت جاساسىپ جاتىر. ايتا كەتەرلىگى، قاراعاندىلىق جانە پاۆلودارلىق كارتوپ پەن سابىزگە تاپسىرىس جاسالعان. سونىمەن قاتار جەرگىلىكتى تاۋار وندىرۋشىلەردەن ساتىلىپ الىنعان ونىمدەردەن كەلەر جىلعا قور جاسالاتىن بولادى. نارىقتاعى وزگەرىسكە قاراماستان الەۋمەتتىك ساۋدا ورىندارىندا ازىق-تۇلىكتىڭ باعاسى تۇراقتى. ماسەلەن، وتاندىق كۇنباعىس مايىن قولجەتىمدى باعامەن تۇراقتاندىرۋ قورى ۇيىمداستىرعان ساۋدا نۇكتەلەرىندە ساتىپ الۋعا بولادى. مۇندا الەۋمەتتىك باعاداعى ونىمدەر، ماسەلەن كۇرىشتىڭ كەلىسى 165 تەڭگە، قۇمشەكەردىڭ كەلىسى 190 تەڭگەدەن ساتىلۋدا.

جەرگىلىكتى بيلىك كۇندەلىكتى تۇتىناتىن ازىق-تۇلىككە باعانى تۇراقتاندىرۋعا ارەكەت جاساۋدا. دەگەنمەن ماماندار ارزانداتىلعان ءونىمنىڭ كولەمى از ەكەنىن ايتادى. سوندىقتان بولار، مۇنداي الەۋمەتتىك ورىنداردا ساۋدا بۇرىنعىداي قىزىپ تۇرعان جوق.

ناقتىراق ايتقاندا، الەۋمەتتىك ساۋدا ورىندارىندا قۇمشەكەر، كۇنباعىس مايى سىندى ازىق-تۇلىكتەردى كەزدەستىرە المادىق. شىمكەنت قالاسى بويىنشا، ارزانداتىلعان ءونىمدى ساۋدالايتىن ون نۇكتە جۇمىس ىستەيدى. بۇل ورىندارعا ارنايى قويمادان تاۋارلار تاسىمالدانادى.

الەۋمەتتىك ساۋدا ورىن-دارىنداعى باعا ازىرگە تۇراقتى تۇردە ساقتالعان. ال، ءونىمىنىڭ ازايۋىنا بايلانىستى ازىق-تۇلىكتى ساقتايتىن قويماعا الداعى كۇندەرى 1,5 توننا كارتوپ پەن 400 توننا پياز اكەلىنبەك.

ولجاس باقتىباەۆ، ازىق-تۇلىك كومپانياسى «وڭتۇستىك» جشس ديرەكتورى:

– بۇگىندە بازارلارداعى ساتىلىپ جاتقان كارتوپ، ءسابىز، پياز تۇراقتاندىرۋ قورىنىڭ ەسەبىنە جاتپايدى. ءبىزدىڭ تاۋارلار قاراشا ايىنىڭ ەكىنشى جارتىسىندا ساتىلىمعا شىعارىلادى. بۇل كوكونىسكە قاتىستى ايتىپ جاتىرمىز. ماسەلەن،قاراعاندى وبلىسىنان 1,5 مىڭ توننا كارتوپ جەتكىزىلۋدە. الداعى ۋاقىتتا تۇراقتاندىرۋ قورى كوميسسياسىنىڭ شەشىمى بويىنشا كارتوپتار وڭىردەگى بازارلارعا تاسىمالداناتىن بولادى.

ءبىزدىڭ نەگىزگى ماقساتىمىز – ازىق-تۇلىك نارىعىنداعى الىپساتارلىققا جول بەرمەي، ناۋقاندىق كەزدە باعانى تۇراقتاندىرۋ. قازىرگە استىق جەتكىلىكتى. بازارداعى ازىق-تۇلىك باعاسى تۇتىنۋشىلاردىڭ قالتاسىنا ىڭعايلى بولىپ تۇر.

«ازىق-تۇلىك سەبەتى» نەدەن تۇرادى؟

«ازىق-تۇلىك سەبەتىنە» ءبىرىنشى كەزەڭدە جالپى قۇننىڭ 50 پايىزعا جۋىعىن قۇرايتىن تاماق تۇرلەرى ەنىپ وتىر. ەكىنشى توپقا كيىم-كەشەك، اياق كيىم، باس كيىم، ءىش كيىم، ءدارى-دارمەك سياقتى ازىق-تۇلىكتىك  ەمەس تاۋارلار كىرىستىرىلگەن. ال ءۇشىنشى توپتا كوممۋنالدىق قىزمەت اقىسى، ترانسپورت شىعىنى، مادەني شارالارعا جۇمسالاتىن قارجى مولشەرى ەنىپ وتىر.

سەبەتكە ەنگەن تاعام مەن قىزمەت تۇرلەرىنە كوز سالساڭىز، ۇكىمەتتىڭ پايىمىنشا، ەڭبەككە قابىلەتتى ءار قازاقستاندىق ازامات جىلىنا 100,4 كەلى كارتوپ، 114,6 كەلى كوكونىس، 60 كەلى جەمىس، 126,5 كەلى نان مەن نان ونىمدەرىن، 58,6 ەت ونىمدەرى مەن 18,5 كەلى بالىق ونىمدەرىن تۇتىنادى ەكەن. ال مادەني شارالارعا جۇمسالاتىن ايلىق شىعىن 5 پايىزدان اسپايدى.

اينۇر اقباەۆا

Abai.kz