وتكەن تاۋلىكتە قر ۇقك شەكارا قىزمەتى مەملەكەتتىك شەكارانىڭ ءار اۋماعىندا قر كوشى-قون جونىندەگى زاڭنامالارىنىڭ تالاپتارىن بۇزعان 35 ادامدى انىقتاپ، قر اكىمشىلىك-قۇقىقبۇزۋشىلىقتار تۋرالى كودەكسىنىڭ 517-بابى بويىنشا جاۋاپقا تارتتى دەپ حابارلايدى قر ۇقك شق ءباسپاسوز قىزمەتى.

ولاردىڭ ىشىندە «قورعاس»، «باقتى» شەكارالىق باقىلاۋ وتريادتارىندا ۇستالعان ءۇش قحر ازاماتىنان، «قورداي» شەكارا وتريادىنىڭ «قاراسۋ اۆتو» بولىمىندە ۇستالعان ءبىر مولدوۆا ازاماتى، پاۆلودار، سەمەي شەكارا وتريادىنىڭ «ۇرلىتوبە اۆتو»، «سەمەي» تەكسەرىپ-وتكىزۋ بەكەتىنىڭ «وبە اۆتو» بولىمدەرىندە ۇستالعان ەكى رەسەي ازاماتىنان، «قورداي»، «مەركە» شەكارا وتريادتارىنىڭ اۋماقتارىندا ۇستالعان سەگىز قىرعىز رەسپۋبليكاسىنىڭ ازاماتىنان وزگەسى وزبەك اعايىندار. كۇن سۋىتا ۇيلەرىنە قايتا باستاعان ولاردىڭ بارلىعى دەرلىك «سارىاعاش» شەكارا وتريادىنىڭ اۋماعىندا ۇستالعان. تەك بىرەۋى عانا باتىس قازاقستان وبلىسىنىڭ «بەينەۋ - تەمىرجول» شەكارا بەكەتىندە № 648 «بەينەۋ - كۋنگراد» پويىزىندا ۇستالدى.

سانى جاعىنان عانا ەمەس، ەلىمىزدىڭ اۋماعىندا زاڭسىز تۇرۋ جاعىنان دا رەكورد وزبەكستان ازاماتتارىندا. مىسالى «سارىاعاش» شەكارا وتريادىنىڭ «قاپلانبەك اۆتو» بولىمشەسىندە ۇستالعان ون ازامات بەلگىلەنگەن مەرزىمنەن 120 تاۋلىك كەشىگىپ شىعىپتى.

اباي-اقپارات