قاراعاندى وبلىستىق سوتىندا س. احمەتوۆ جانە باسقا لاۋازىمدى شەنەۋنىكتەردىڭ قىلمىستىق ءىسى بويىنشا كۋاگەرلەردەن جاۋاپ الۋ جالعاسىپ جاتىر. 11 قاراشاداعى سوت وتىرىسىندا «توپار جىلىجايلارى» جشس-نە قاتىستى ەپيزودتى قاراۋ كەزىندە كۋاگەر گالينا كوردوۆيچ سوتقا جاۋاپ بەردى. ايتا كەتەرلىگى، بۇعان دەيىنگى سوت وتىرىسىندا تۇسىنىك بەرگەن كۋاگەرلەردەن «توپار جىلىجايلارى» جوباسىنداعى قوندىرعىنىڭ قۇنى 3 ملن. ەۋروعا ادەيى كوتەرىلگەنى ءمالىم بولعان.

فورمالدى تۇردە قۇرىلعان «كازينتەراكتيۆ 21 ۆەك» جانە «Gold company KZ» فيرمالارىنىڭ ەسەپشىسى گالينا كوردوۆيچ سوتتا قۇجات جۇزىندەگى قارجىنى قولما-قول اقشا تۇرىنە قالاي اينالدىرعانى تۋرالى اڭگىمەلەدى. «2012 جىلدىڭ جەلتوقسانىندا «فورتە بانكتىڭ» قاراعاندىلىق فيليالىندا ەرلان قيسىقوۆپەن تانىستىم. ول اقشانى قولما-قول تۇرىنە اينالدىرۋ قىزمەتىنە قىزىعۋشىلىق تانىتتى. ە. قيسىقوۆ «يسپاندىق «Rupefa Technoagro S.L.» كومپانياسى اۋداراتىن اقشانى ەشقانداي ءىس جۇزىندەگى تاۋار جەتكىزۋ مەن قىزمەت كورسەتۋسىز «توپار جىلىجايلارى» جشس-ءنىڭ شوتىنا اۋدارىپ، قالعانىن قولما-قول اقشا تۇرىندە ماعان قايتارۋ كەرەك» دەگەن تالاپ قويدى» دەپ حابارلادى كۋاگەر.

«قازاگروقارجى» اق-نىڭ سول كەزدەگى نەسيەلەۋ جانە ليزينگ دەپارتامەنتىنىڭ ديرەكتورى ە. قيسىقوۆ كوپ ۇزاماي گ. كوردوۆيچكە اقشانى قولما-قول تۇرىنە اينالدىرۋعا ءوتىنىش جاسايدى. ودان ارىدە «تورگپرومستروي»، «كازينتەراكتيۆ 21 ۆەك»، «Gold company KZ» كومپانيالارى ارقىلى يسپاندىق فيرمادان جانە «توپار جىلىجايلارىنان» تۇسكەن قاراجات قولما-قول اقشاعا اينالدىرىلعان. ء«ىس جۇزىندە ءبىز ەشقانداي قىزمەت ءتۇرىن كورسەتكەن جوقپىز، تاۋارلار جەتكىزىلگەن جوق. قولما-قول اقشانى مەن ە. قيسىقوۆقا بەردىم»،- دەپ ءتۇسىندىردى كۋاگەر ءىستىڭ ءمان-جايىن.

سونداي-اق ول اقشا اۋدارىمدارىن تىركەۋ ءۇشىن يسپاندىق «Rupefa Technoagro S.L.» كومپانياسىنىڭ وكىلى كاميلا پىراليەۆامەن بايلانىس ورناتقانى تۋرالى دا ايتتى. «مەن ونى تانىمايمىن. ەلەكتروندىق پوشتاسىنىڭ مەكەن-جايىن ە. قيسىقوۆ بەردى. ك. پىراليەۆا ەلەكتروندىق پوشتاما كەلىسىم-شارتتاردى جىبەردى. مەن وعان ينۆويستاردى، شوت-فاكتۋرالاردى سالدىم. ءبىز قاشان جانە قاي ۋاقىتتا اقشا اۋدارىلاتىنى جونىندە ەلەكتروندىق پوشتا ارقىلى حات جازىستىق» دەپ اڭگىمەلەدى گ. كوردوۆيچ.

سوتقا دەيىنگى تەرگەۋدە بەرگەن جاۋابىندا كۋاگەر 2013 جىلى 31 قاڭتاردا «توپار جىلىجايلارى» جشس-نەن اتالعان كاسىپورىنداردىڭ شوتىنا جالپى سوماسى 101 368 500 تەڭگە جانە 2013 جىلى 31 شىلدەدە 50 000 000 تەڭگە تۇسكەنىن، كەيىنىرەك ول قاراجات باسقا كومپانيالار ارقىلى قولما-قول اقشاعا اۋىستىرىلىپ، «توپار جىلىجايلارىنا» قايتا جىبەرىلگەنىن ايتقان. 2013 جىلدىڭ 13 ماۋسىمى مەن 19 جەلتوقسانى ارالىعىندا «Rupefa Technoagro S.L.»-دان «كازينتەراكتيۆ 21 ۆەك» جشس-ءنىڭ شوتىنا 1 199 741,35 ەۋرو اۋدارىلعان. ونى جالعان فيرمانىڭ نومينالدى ديرەكتورى د. سافونوۆ قولما-قول اقشاعا اينالدىرىپ، ە. قيسىقوۆقا بەرگەن. ودان ارىدە «تورگپرومستروي»-دىڭ شوتىنا يسپاندىق كومپانيادان 262 589 ەۋرو ءتۇسىپ، گ. كوردوۆيچ سونىڭ 4 835 000 تەڭگەسىن قولما-قول اقشا تۇرىندە ە. قيسىقوۆقا جەتكىزگەن. قالعان اقشالار دا باسقا كومپانيالار ارقىلى شوتتان الىنىپ، قولما-قول تۇرىندە ە. قيسىقوۆقا بەرىلگەن.

ءامينا باكىر.

اباي-اقپارات