گۇلىن قۇشاقتاپ پەرزەنتحانا ەسىگىن كۇزەتىپ جۇرگەن قۋان ىشتەي مازاسىزدانىپ ءجۇر. قولدارىنا شارلارىن ۇستاعان وتباسىنىڭ 4 بالاسى دا  ەگىز باۋىرلارىن كورۋگە اسىق. اتا-اجە، تۋعان-تۋىس تا وسىندا. ال ۇلى قوس حاننىڭ ەسىمىن يەلەنگەن كەرەي مەن جانىبەك بالبىراپ ۇيىقتاپ جاتىر. بۇل اتتى ەرلى زايىپتىلار الدەقاشان ويلاستىرىپ، قازاق حاندىعىنىڭ 550 جىلدىعىنىڭ قۇرمەتىنە ىرىمداپ قويىپتى.

مۇسالار شاڭىراعى قوس قۋانىشتى ەلەۋسىز قالدىرماۋعا تىرىسقانى كورىنىپ تۇر. بىراق، ەگىزدەردىڭ ەسىمى كەرەي مەن جانىبەك بولعانمەن، جاقىن ارادا بۇل كىشكەنتايلار حاننىڭ ورداسىنداعىداي ءومىر كەشپەيتىن سەكىلدى. ازىق-تۇلىك ساقتايتىن قويمانىڭ ۇستىنەن سالىنعان 1 بولمەلى پاتەر ەندى 8 ادامعا تارلىق ەتىپ وتىر. سىز تارتىپ، قابىرعالارى دا كوگەرىپ كەتكەن. سوندىقتان جاس انا ەگىزدەرىنىڭ دەنساۋلىعىنا الاڭداۋلى.

29 جاسىندا كوپبالالى انا اتانعان دينانىڭ جارىق دۇنيە ەسىگىن اشقان ەگىزدەن بولەك 3 ۇل ءبىر قىزى بار. ۇلكەنى 9-دا. بالالارىن ۇيدە باعىپ وتىرعان كەلىنشەك جۇمىس ىستەمەيدى. 31 جاستاعى ەلەكترشى بوپ ىستەيتىن وتاعاسىنىڭ ايلىعى اس-سۋدان ارتىلار ەمەس.

“جولداسىم 90000 تەڭگە الادى. ۇكىمەتتەن 8000 تەڭگە الادى. 98 000 تەڭگە. 60 000 تەڭگەنى  پاتەرگە تولەيمىز. ۇلكەنى مەكتەپكە بارادى. جولىنا تولەيمىز. ازىق – تۇلىك، جورگەك الامىز. ەندى جەتپەيدى”، – دەيدى استانا قالاسىنىڭ تۇرعىنى دينا حايسا.

جاس وتباسى بىلتىر اكىمدىككە ءۇي كەزەگىنە تۇرعان. 13.500-ءشى بوپ تىركەلگەندىكتەن كەڭ باسپانانىڭ قاشان بۇيىرارى بەلگىسىز. ءارى شەنەۋنىكتەر كوپبالالى شاڭىراق زاڭ بويىنشا، كەزەگى كەلگەندە عانا پاتەر الادى دەپ وتىر. بىراق وعان دەيىن كەرەي مەن جانىبەك 10 جاسقا كەلەدى ەكەن. سوندىقتان حان بابالارىنىڭ اتىن العان سابيلەر ازىرشە قويما-پاتەردە تۇرا بەرۋلەرىنە تۋرا كەلەدى.