استانادا ستۋدەنت قىزدى 24 جەرىنەن پىشاقتاپ ءولتىرىپ، كىلەمگە وراپ، كىرەبەرىسكە شىعارىپ تاستاعان جاعداي، ەستىگەن ەلدىڭ جاعاسىن ۇستاتىپ وتىر. اناسىنىڭ ايتۋىنشا، ورىمدەي قىزدى قورلىقپەن ولتىرگەنىمەن قويماي، قول-اياعىن اياماي كەسكىلەپ، دەنەسىن بولشەكتەمەك بولعان.

قازىرگى ۋاقىتتا كۇدىكتى رەتىندە ستۋدەنت قىزدىڭ وزىمەن بىرگە تۇرعان قۇربىسى قاماۋدا وتىر. 24 جاستاعى بايان شالقاروۆا قاندى قىلمىستى جالعىز جاسادىم دەپ، بار كىنانى ءوز موينىنا العان. الايدا، ەۋرازيا ۋنيۆەرسيتەتىنىڭ ۇزدىك ستۋدەنتى بولعان ۇلجان رىسقۇلبەكوۆانىڭ تۋىستارى قاندى قىلمىستى جالعىز قىزدىڭ جاساعانىنا سەنبەيدى. بويجەتكەننىڭ قۇربىسىن ازاپتاپ ولتىرۋىنە نە تۇرتكى بولدى ەكەن؟ مارقۇمنىڭ تۋىستارى پوليتسياعا قانداي تالاپ قويىپ وتىر؟ قاندى وقيعانىڭ جاي-جاپسارىن گۇلبانۋ انياتقىزى زەرتتەپ كورگەن ەدى.

استاناعا قىزىمدى وقىتسام دەپ جىبەرىپ، ءبىر كۇندە تۇڭعىشىنان ايىرىلىپ قالىپ اڭىراعان انا بۇگىن قاندى قىلمىس بولعان ءۇيدىڭ بوساعاسىن العاش اتتادى. ەۋرازيا ۋنيۆەرسيتەتىنىڭ ءتورتىنشى كۋرسىندا وقىعان ستۋدەنت قىزى ۇلجان رىسقۇلبەكوۆا پاتەردە قۇربىلارىمەن بىرگە تۇرعان ەكەن. بويجەتكەن، جازعى دەمالىس كەزىندە تەحنيكا ساتاتىن دۇكەنگە جۇمىسقا تۇرىپ، بايان شالقاروۆا دەگەن قىزبەن تانىسىپتى. جاعدايىن ايتىپ جالبارىنعان قىزدى ءتىپتى قاسىنا الىپ، ءبىر ناندى ءبولىپ جەپتى. الايدا، "استانادا باسپاناسى بار، الەۋمەتتىك جاعدايى جاقسى قۇربىمدى كورە المادىم، قىزعاندىم" دەگەن بايان شالقاروۆا مارقۇمدى 24 جەرىنەن پىشاقتاپ ولتىرگەن. اناسىنىڭ ايتۋىنشا، ۇلجاننىڭ قول اياعىن تىلگىلەپ، باسىنان بالتامەن ۇرىپ، ازاپتاعان بويجەتكەن مۇنىمەن توقتاماپتى. قۇربىسىنىڭ ءولى دەنەسىن ۇلكەن كىلەمگە وراپ، كىرەبەرىسكە شىعارىپ، پاتەردىڭ ءىشىن قاننان تازارتىپ، تۇندەلەتىپ تايىپ تۇرعان.

قالامگۇل رىسقۇلبەكوۆا, مارقۇمنىڭ اناسى:

- ولتىرگەن مەنىڭ قىزىمدى بالتامەن بالعامەن ۇرىپ، بىراق مەن سەنبەيمىن بۇل قىزدىڭ بىرەۋ بولعانىنا قاسىندا بىرەۋ بار.

ياعني، اڭىراپ وتىرعان ۇلجاننىڭ اناسى قىزىن جالعىز بالجاننىڭ ولتىرگەنىنە سەنبەيدى. ويتكەنى، ەكى ادام ارەڭ كوتەرەتىن اۋىر كىلەمگە ورالعان دەنەنى بارماقتاي قىزدىڭ دالاعا شىعارۋعا شاماسى جەتپەيدى. سوندىقتان، كۇدىكتىنىڭ قاسىندا سىبايلاستارى بولۋى مۇمكىن دەپ تۇسپالدايدى. ال، بايان شالقاروۆا بولسا پوليتسياعا قاندى قىلمىستى جالعىز جاسادىم دەپ، تەرگەۋ بارىسىندا قۇربىسىن نە ءۇشىن ولتىرگەنىن دە ايتىپ بەرىپتى.

قالامگۇل رىسقۇلبەكوۆا, مارقۇمنىڭ اناسى:

- كورە المادىم، ول ادەمى، وندا ءبارى بار، مەندە ەشتەڭە جوق دەگەندەي. مەن ويلايمىن مۇمكىن اقشا سۇراعان شىعار. قىزىم جاعدايى بار، ءۇيى بار، جاقسى كيىنەدى. كورە الماعان.

پوليتسەيلەر بولسا، جاعانى ۇستاتار قىلمىستى جاساعانىن مويىنداعان بايان شالقاروۆانى ەكى ايعا تەرگەۋ اباقتىسىنا قاماپ قويىپتى. ۇستىنەن 99-باپ، ياعني قاجەتتى قورعانىس شەگىنەن شىعۋ كەزىندە كىسى ءولتىرۋ بابى بويىنشا قىلمىستىق ءىس قوزعاعان. بىراق تەرگەۋ قۇپيالى دەپ، بار اقپاراتتى تۋىستارىنا دا، اقپارات قۇرالدارىنا دا ايتپاي وتىر.

الايدا، وتكەن اپتادا عانا جەر قوينىنا تاپسىرىلعان 23 جاستاعى ۇلجان رىسقۇلبەكوۆانىڭ تۋىستارى قىلمىستىق ءىس بۇرمالانىپ كەتە مە دەپ قاۋىپتەنەدى. ياعني، ەلوردا پوليتسەيلەرى بار ايىپتى قىلمىستى مويىنداعان بايان شالقاروۆاعا جاۋىپ، سىبايلاستارى سىتىلىپ كەتە مە دەيدى. سوندىقتان، ەلوردا تەرگەۋشىلەرىنەن ورىمدەي قىزدىڭ ءولىمىنىڭ سەبەبىن ءجىتى تەكسەرۋدى سۇرايدى.

گۇلبانۋ انياتقىزى

31 ارنا