بۇگىنگى باستى تاقىرىپ: بۇۇ-نىڭ 70-ءشى اسسامبلەياسى. ارينە، بارشامىزدىڭ باعىپ-قاققانىمىز - بولاشاعىمىز، باعىت-باعدارىمىز.

ەسىمە، تاعى دا سول الاڭ - 1986 جىلعى "جەلتوقساننىڭ" ءتۇسىپ وتىرعانى. 
قولىمدا "لەنيندىك ۇلت ساياساتى جاساسىن!", "قاز سسر كونستيتۋتسيا قاعيدالارى ساقتالۋى ءتيىس !", - دەگەن ەكى لوزۋنگتەن باسقا، سول كەزدەگى بۇۇ-نىڭ باس حاتشىسى - حاۆەر پەرەس دە كۋەليارعا ارناپ جازىلعان حاتىم بار ەدى. 
19 كۇنى ەكى لوزۋنگتى جازدىرتىپ، الاڭعا بارا جاتقان جەرىمىزدەن ۇستالىپ، سودان، كوپكە سوزباي-اق 22 كۇنى جاۋىپ تا تاستاعان بولاتىن. سول ەكى لوزۋنگ، 7-8 قاڭتار 1987 جىلعى قازسسر جوعارعى سوتىنىڭ ۇكىمىنە اكەلىپ سوقتىرىپ، 7 جىلدى ارقالاپ كەتە بارعان دا ەدىم. 
ءيا، حات دەمەكشى، سول حاتتى، ءىستىڭ ناسىرعا شاۋىپ بارا جاتقانىن بايقاسىمەن، كۋرستاس دوسىم - قايرات ساريەۆكە تابىستاپ كەتكەن ەدىم. بوساپ شىعىپ اۋىلدا ءبىر-ەكى اي ءوز وزىمە كەلگەننەن كەيىن، "الماتىم قايداسىڭ؟" دەپ بىردەن قازمۋ-دىڭ 4-ءشى جاتاقحاناسىنا تارتتىم. جىگىتتەر مەن قىزدار ۋىلداپ-شۋىلداپ قارسى الدى. قايراتتىڭ بولمەسىندە كىشىگىرىم توي دا جاساپ جىبەرگەن ەدىك. شولپان ەسىمدى كۋرستاس قىزىمىزبەن جانۋيا دا قۇرىپتى، تۇڭعىشتارى دا دۇنيەگە كەلگەن. 
اڭگىمە دۇكەن بىتەر ەمەس، ءبىرى كىرىپ، ءبىرى شىعىپ جاتقان ستۋدەنتتىك ءومىر. ءۇشىنشى كۇن دەگەندە ەكەۋارا اڭگىمەمىز سول حاتقا كەلىپ تىرەلدى. 
ول دا ستۋدەنتتىك جاتاقحاناداعى جاستىعى مەن تىسىنىڭ ورتاسىنا جاسىرىپ ەكى جىلداي ساقتاعان-اق ەكەن. وكىنىشى مەن قىسىلعاندىعىن بىلدىرە وتىرىپ جەتكىزگەنى، بايقاماي، جاستىقتىڭ تىسىمەن بىرگە سۋعا سالىپ، جۋىپ جىبەرگەنى. كەش بايقاپتى.
جاستىق جالىن مەن دوستىق سەزىمنىڭ كۇشتىلىگى، الدە، بولاشاققا دەگەن سەزىمنىڭ مىقتىلىعىنان بولار ، "بۇۇ-نىڭ باس حاتشىسىنا جولدانار - تاريحي جادىگەردىڭ جولى بولسىن! ونىمەن ۇستالعانىمدا، سەنىمەن وسىنداي داستارحان باسىندا وتىرماستا ما ەدىم؟... جولى بولسىن!" دەپ قىرلى ستاقاندى قاعىستىرا، تارتىپ كەپ جىبەرگەن ەدىك. 
ءيا، جىلدار جىلجىپ، 26 جىل دا ءوتىپ كەتكەن ەكەن. دوسىمنىڭ كەلمەستىڭ كەمەسىنە ءمىنىپ كەتكەنىنە دە ءبىرتالاي ۋاقىت ءوتتى.
ەندى مىنە، بۇگىن بولاشاعىم مەن كەلەشەگىمدى، ءدال وسى بۇۇ-نىڭ 70-سەسسياسى شەشىپ بەرەتىندەي، مۇحيتتىڭ ارعى جاعىنداعى "كوكەلەردىڭ كوكىگەندەرىنە" قاراپ، كوك جاشىككە تەلمىرە قاراپ وتىرمىن...

قۇرمانعاسى راحمەتوۆ

Abai.kz