قر سىرتقى ىستەر ءمينيسترى ە.ىدىرىسوۆ سيريادا 200 قازاقستاندىق سوعىسىپ جۇرگەنىن مالىمدەگەن، - دەپ حابارلايدى اباي-اقپارات.

قازاقستان سىرتقى ىستەر ءمينيسترى ەرلان ىدىرىسوۆ الەم ەلدەرى باسشىلارىن «يسلام مەملەكەتى» (يم) ەكسترەميستىك ۇيىمىمەن بىرگە كۇرەسۋگە شاقىردى.

نيۋ-يوركتە Associated Press اگەنتتىگىنە بەرگەن سۇحباتىندا ىدىرىسوۆ قازاقستاندا سوڭعى كەزگە دەيىن «فۋندامەنتاليزم مەن ەكسترەميزمگە قارسى قورعانىش بولعانىن»، بىراق قازاقستاننىڭ كوركەيۋىنەن ەلدىڭ كەيبىر ايماقتارىندا تۇرعىنداردىڭ ساناسىنا ءتۇرلى «سوراقى يەديالار» ەنە باستاعانىن ايتقان.

ونىڭ سوزىنشە، قازىر شامامەن 200 قازاقستاندىق سيريادا سوعىسىپ ءجۇر.

ىدىرىسوۆ اقش، قىتاي، رەسەي جانە ەۋروپا ەلدەرىن ساياسي ءبولىنۋدى جويىپ، سيريا مەن يراكتىڭ ءبىراز اۋماعىن باقىلايتىن يم توبى ىقپالىنىڭ ارتۋىن توقتاتۋعا شاقىرادى.  ول 28 قىركۇيەكتە نيۋ-يوركتە رەسەي پرەزيدەنتى ۆلاديمير پۋتين مەن اقش پرەزيدەنتى باراك وبامانىڭ كەزدەسۋىنە ءۇمىت ارتادى. قوس پرەزيدەنت كەزدەسۋدە يم-مەن كۇرەس تاكتيكاسىن وزگەرتۋ جايىن تالقىلاۋى مۇمكىن.

اباي-اقپارات