اسا قۇرمەتتى يۋنەسكو-جان! بيىل شايقىمىز قوجا احمەت ياسساۋيگە اس بەرىپ، ۇلان-اسىر توي جاسايىن دەپ جاتقانىڭدى ەستىپ، قۋانىپ جاتىرمىز. ءاسىلى، ونىڭ دانالىعى كۇللى ادامعا ورتاق ەكەنىن ۇعاتىن ۇلان بار ەكەن-اۋ. 

بىراق سول تويىڭا ءبىزدىڭ اتسالىسا المايتىنىمىزدى ايتىپ، حات جازىپ وتىرعان جايىم بار. ازىرگە ءبىز جاقتا كۇننىڭ رايى جىلىماي تۇر. شارۋا دا باستان اسادى. وسى كوكتەمدە پارلامەنتتىڭ شىلدەحاناسىن بەلگىلەپ قويىپ ەدىك. ار جاعىندا جاز، اپتاپ ىستىقتا نەعىلعان توي؟! كۇز دە جەتىسىپ تۇرعان جوق، داعدارىس جەلكەدەن الىپ بارادى.

توق ەتەرى، وزدەرىڭ جايلاپ نەتىپ، نەعىلا بەرەسىڭدەر-اۋ. انا تۇرىك اعايىندار تويدى باستاپ كەتىپتى دەپ جاتىر. «ياسساۋي» جورنالىن 50 مىڭ تيراجبەن تاراتىپ، توم-تومداپ كىتاپ باسىپ جاتىر دەيدى. وسى دا بارىمىزگە جەتىپ قالار. ايتپەسە وزبەك تە قاراپ قالماس. 

انا ءبىر جىلى ياسساۋي مۇراسىن جاڭعىرتامىز دەپ شىققان ءبىر توپ سوپىنى بۇلىكشى دەپ قاماپ تاستاعان ەدىك. دۇرىس-بۇرىسىن كىم بىلگەن، ايتەۋىر جاتىر عوي. ءوز ارامىزدا قالسىن، بۇل اڭگىمە. بابانىڭ حيكمەتتەرىن جىرلايمىز دەپ شىققان «ياسساۋي» ۆوكالدى توبىن دا قۋدالاپ، تاراتىپ جىبەرگەن ەدىك...

بىزدەگى حازىرەتتەر دە، قۇزىرەتتەر دە ياسساۋيدى ونشا جاقتىرا بەرمەيدى. تىم كۇردەلى، تۇسىنۋگە قيىن دەي مە...

كەيبىرەۋلەر 63 جاسىندا قىلۋەتكە تۇسكەن ادامدى جارنامالاپ قايتەمىز دەيتىن كورىنەدى. ەندى بىرەۋلەر، شايقىنىڭ سالعان زىكىرى ارابتىڭ كوڭىلىنەن شىقپاپتى دەيدى. ولاردان كوپ كورىم ينۆەستيتسيا الىپ وتىرمىز ەمەس پە؟!

بىراق ەندى تويلامايدى دەگەنگە، مۇلدە تويلامايدى ەكەن دەپ قالما. قازىنادان تيىن-تەبەن قاراستىرا جاتارمىز. بۇيىرتسا سوعان ءبىلىم وردالارىنداعى ۇستازداردى سالىپ، ون-ون بەس ستۋدەنتتەن باس قۇراپ، كەڭەس قىلساق پا دەگەن وي بار. وسىنىڭ ءوزى نەگە تۇرادى؟ ايتەۋىر، ودان ارىعا بارا المادىڭ دەپ قىستاپ، مازامىزدى كوپ الا بەرمە. ايتايىن دەگەنىم وسى ەدى. ادرەسىڭدى تاپپاعان سوڭ، وسىندا سالىپ وتىرمىن. جازعانىم قولىڭا تيسە، ءبىر اۋىز جاۋاپ قاتارسىڭ.

امان-ساۋ بول، يۋنەسكو-جان. اللا دەنىڭە قۋات بەرسىن، شايقىڭنىڭ ارۋاعى قولداسىن!

ساكەن نۇرقابەكۇلى

Abai.kz