استانا اۋىلعا نە بەرىپ جاتىر؟
گازەت جۇمىسىمەن ىسساپارلارعا شىعىپ تۇراتىن ەدىك. سوندا ءبىر ساپاردا ءبىز كۇرشىم اۋدانىنىڭ قالجىر اۋىلىندا بولدىق. اۋىل تۇرعىنى، كوپتى كورگەن قاريا اناشباي جومارتوۆ دەگەن كىسى ءسوزدىڭ شەبەرى ەكەن. بىلاي دەدى (قاز-قالپىندا):
سوڭعى كەزدەرى ءبىزدىڭ اۋىلدان زەينەتكەرلەر كوشىپ جاتىر. بۇرىن ولار جىلى ورنىن سۋىتقىسى كەلمەيتىن. اۋىلدان زەينەتكەرلەر كەتكەن سوڭ، ساۋداسى ءجۇرىپ، شەكەسى قىزعان ساۋداگەرلەر دە كەتتى. ءبىز وسى اۋىلدان ءبارىن قالاعا تاسىپ جاتىرمىز عوي، ەتپەن، سۇتپەن عانا قامتاماسىز ەتىپ وتىرعان جوق، قىل اياعى ادامدارمەن دە جارىلقاپ جاتىرمىز. قالانىڭ ەڭبەك كۇشىن كوبەيتتىك، بالا-شاعا ءبارى دە قالادا.
ال ەندى قاراڭىز، قالا بىزگە – اۋىلعا نە بەرىپ جاتىر؟ استانا نە بەرىپ جاتىر؟ وسكەمەن نە بەرىپ جاتىر؟ اراق پەنەن ۇن عانا. اراقتىڭ نورماسىن ورىنداپ، ابدەن ۋلانىپ بىتتىك قوي. تۇيمە مەن ينەگە دەيىن قىتايدان الامىز. ءتىپتى شۇلىق پەن ىشكيىم دە قىتايدىكى. اۋ، سوندا ءبىز قاشان ءوزىمىز ءۇشىن ءبىر نارسە وندىرەمىز؟
«جۇمىسپەن قامتۋ-2020» باعدارلاماسى مال وسىرگەن اۋىلدىق وكرۋگتەرگە جەتپەيدى. استانادا تۇراتىن دوكەيلەر اۋىلدىڭ نە ەكەنىن بىلمەيدى. مەن ايتايىن: نەگىزىندە قازاق 20-30 ۇيدەن جينالىپ، مال وسىرگەن ەلدى مەكەندى اۋىل دەپ اتاعان. اۋدان ورتالىعىنىڭ شەت جاعىندا 5 ەشكى، 1 قوي ۇستايتىندار اۋىلعا جاتپايدى. سوندا «جۇمىسپەن قامتۋ-2020» باعدارلاماسى اۋدان ورتالىعىنا جەتكەنىمەن، اۋىلدارعا كەلە بەرمەيدى.
اۋىلدى گۇلدەندىرۋ ءۇشىن، تۇرعىندارىن جۇمىسپەن قامتۋ ءۇشىن تۇبەگەيلى باسقا باعدارلاما جاسالۋى ءتيىس. سودان كەيىن ءبىر ماسەلە – مال شارۋاشىلىعى بويىنشا شىعىس قازاقستان مەن ماڭعىستاۋدى سالىستىرۋعا بولمايدى.
قۇدايعا شۇكىر، شىعىستا، ونىڭ وزىندە ءبىزدىڭ مارقاكولدە نە كەرەكتىڭ ءبارى دە بار: سۋ دا، ءشوپ تە، تەحنيكا دا. تەك جۇمىس ىستەيتىن ادام عانا جوق. جۇزدەگەن مىڭ گەكتار جايىلىمدىق جەر يەن جاتىر. ونداعان گەكتار ەگىن سالاتىن جەر بوس جاتىر. ەندى وسىنىڭ سالىعىن كوتەرەمىز دەيدى. قالاي كوتەرەدى، ەي، ول جەردى يگەرەتىن ادام تابىلماي تۇرعاندا؟
زاڭعار كارىمحان
Facebook-تەگى پاراقشاسىنان
