ول بۇل پىكىرىن بىشكەكتە وتكىزگەن ءباسپاسوز ءماسليحاتى كەزىندە مالىمدەدى.

تۋرات اكيموۆ سوزىنە ەشقانداي دايەك كەلتىرمەدى، تەك وزىنە نە بولماسا تۋىستارىنا قارسى ءبىر جاعداي بولا قالسا، ءىىم باسشىلىعىمەن جانە ونىڭ كومەكشىسىمەن بولعان اڭگىمەنىڭ اۋديوسىن ينتەرنەتكە جاريالايتىنىن ەسكەرتتى.

جۋرناليست پرەزيدەنت اپپاراتىنىڭ باسشىسى فاريد نيازوۆقا ءوزىنىڭ ۇيىنە بەينەباقىلاۋ جۇرگىزۋىن، كۇزەتپەن قامتاماسىز ەتۋىن جانە وزىنە قارۋ ۇستاپ جۇرىنە رۇقسات بەرۋىن سۇرادى.

ەسكە سالا كەتەيىك، "دەنگي ي ۆلاست" گازەتىنىڭ باس رەداكتورى تۋرات اكيموۆقا 20 اقپان كۇنى بەلگىسىز بىرەۋلەر شابۋىل جاساعان. ءجۋرناليستىڭ سوزىنشە، وقيعا كولىگىن اۋلاسىنا كىرگىزە بەرگەندە ورىن العان.

"باسىمنان تەمىر زاتپەن ۇردى. ولار مەنى ولتىرگىلەرى كەلدى. بۇل مەنىڭ جۇمىسىما تىكەلەي قاتىستى دەپ ەسەپتەيمىن", -دەدى ول.

قىرعىزستان پرەزيدەنتى المازبەك اتامباەۆ جۋرناليستكە جاسالعان قاستاندىقتى زەرتتەۋدى تىكەلەي ءوزىنىڭ باقىلاۋىنا الدى.

وقيعا بويىنشا، قىلمىستىق كودەكستىڭ "بۇزاقىلىق" بابى بويىنشا، قىلمىستىق ءىس قوزعالىپ، تەرگەۋ جۇمىستارى جۇرگىزىلىپ جاتىر.

تۋرات اكيموۆ ءوزىنىڭ ماقالالارىندا قازىرگى بيلىكتىڭ ءىس-ارەكەتىن سىنايدى.

اباي-اقپارات