اقپان ايىنىڭ 23-ءشى جۇلدىزىندا ساعات 19:00 دە الماتى قالاسىنداعى ك.كۋجامياروۆ اتىنداعى مۋزىكالىق كومەديانىڭ رەسپۋبليكالىق مەملەكەتتiك ۇيعىر تەاترىنىڭ ساحناسىندا قازاق حاندىعىنىڭ 550 جىلدىعىنا وراي يننوۆاتسيالىق جاڭاشا فورمادا ۇسىنىلعان «رۋح» اتتى كامەرالىق، ەكسپەريمەنتالدى سپەكتاكل-لەكتسيا قويىلماق. 
نەمىس تەاترىنىڭ قازاق حاندىعىنىڭ 550-جىلدىعىنا ارناپ جاساعان، ءدارىس-قويىلىمنىڭ قىزىقتى ءارى جارقىن فورماسى – «رۋح» يننوۆاتسيالىق قويىلىمى قازاق تاريحىنا ساپار شەكتىرەدى. وتكەننىڭ قاتپارلى يىرىمدەرىنە ورالتاتىن، قازاق حالقىنىڭ دراماتيكالىق تاعدىرىنا جەتەلەيتىن سيۋجەت، زاماناۋي تەاتردىڭ جارىق امال-تاسىلدەرى: حورەوگرافيا، پلاستيكا، مۋزىكا، جارىق جانە ماتىنمەن بەرىلگەن. ەجەلگى ساقتاردان باستاپ الاش ورداعا دەيىن، شىڭعىس حاننان جوڭعار شاپقىنشىلىعىنا دەيىن – تاريح كورەرمەنگە قازاق حالقىنىڭ تاعدىرىن جارقىن جانە كورنەكتى ەتىپ، ونىڭ ەركىندىك جانە تاۋەلسىزدىك ءۇشىن كۇرەسىن، بۇكىل الەمدىك تاريح ساحناسىندا ۇلت رەتىندە قالىپتاسۋىن كورسەتەدى. 
ەلىمىزدە تاريحي سانانى قالىپتاستىرۋ – ەل بىرلىگىنىڭ كەپىلى، ول تۇتاس رۋحانياتقا جەتكىزەدى. وسى تۇرعىدان العاندا «التىن توبىلعى» ادەبي جۇلدەسىنىڭ «جىلدىڭ ۇزدىك دراماتۋرگياسى» اتالىمىنىڭ يەگەرى، زاماناۋي قازاق دراماتۋرگى ءانناس باعداتتىڭ پەساسى بويىنشا قويىلعان اتالمىش سپەكتاكل قازاق ەلىنىڭ تاريحىنان سىر شەرتىپ، ءتول تاريحىمىز ارقىلى جاس ۇرپاق ساناسىن وياتىپ، رۋحتاندىراتىن زاماناۋي تۋىندى.
ەندەشە، وتكەنىمىز بەن بۇگىنىمىز اراسىنداعى بايلانىس تامىرىن تارماقتاپ، حالقىمىزدىڭ بويىنداعى وتانسۇيگىشتىك سەزىمىن وياتاتىن قويىلىمعا شاقىرامىز!

اۆتور: ءانناس باعدات 
رەجيسسەر: ەسلام نۇرتازين 
رەجيسسەر-حورەوگراف: اسەل اباكاەۆا 
ساحنا سايىسىن قويۋشى: ماقسات راحمەت 
سۋرەتشى: ايگەرىم بەكمۇحامبەتوۆا 
كومپوزيتور: ۇشقىن جامالبەك

اكتەرلەر: قازاحستاننىڭ ەڭبەك سىڭىرگەن قايراتكەرى – كۋلبانۋ اشيموۆا، الەكساندر دار، تيمۋر بوندانك، كسەنيا مۋكشتادت، تولگوناي بەيسەمباەۆا، گالينا تابالا، اكىل چولپونباەۆ، يۋليا تەيفەل،يساەۆ ميراس، روديون يانتسەن.

باس رەجيسسەر – ن.دۋبس

اباي-اقپارات