جاقىندا اتى شۋلى سايقىمازاق ساشا بارون كوەن اشۋلى قازاقتاردان قورقىپ، ماسكەۋدەگى گاسترولدىك ساپارىنان باس تارتقان. بۇل تۋرالى رەسەيلىك «كوتوناۆتى» پورتالى جازادى.

رەسەيلىك اقپارات قۇرالدارىنىڭ جازۋىنشا، قازىگى گولليۆۋد جۋلدىزدارىنىڭ ىشىندە ءوزىنىڭ سايقىمازاقتىعىمەن كوپ كوزىنە تانىلىپ ۇلگەرگەن اكتەر ساشا بارون (بورات) اقپان ايىندا ءوتۋى ءتيىس بولعان ماسكەۋدەگى گاترولدىك ساپارىنان باس تارتقان.

ايتا كەتەيىك، ساشا بارون كوەن ەۋروپالىق پرومۋتەرلەردىڭ ۇسىنىسى بويىنشا تۇسىرىلگەن، ءوزى باستى ءرولدى سومدايتىن «گريمسبيلىك باۋىرلار» (براتيا  يز گريمسبي) ءفيلمىنىڭ تۇساۋكەسەرىن وتكىزۋى ءتيىس بولعان. سونداي-اق، اتاقتى سايقىمازاقتىڭ بۇل ساپارى بارىسىندا رەسەيلىك جۇرگىزۋشى يۆان ۋرگانتتىڭ توك شوۋىنا قاتىسۋ جانە جانكۇيەرلەرمەن فوتوسەسسياسى جاساۋ  جوسپارلانعان. «Columbia Pictures» ستۋديوسىنىڭ باسشىلارى ساشا بارون كوەننىڭ بۇل شەشىمى تۋرالى تۇسىنىك بەرۋدەن باس تارتقان.

رەسەيلىك سايتتىڭ جازۋىنشا، ساشا بارون كوەن ۆيدەو حابارلاما قالدىرىپ، ماسكەۋدەگى ساپارىنان باس تارتۋعا نە سەبەپ بولعانىن تۇسىندىرگەن. سايقىمازاق ساشانىڭ حابارلاماسىندا، ماسكەۋگە كەلۋدەن باس تارتۋىنا، جەرگىلىكتى قازاق ەتنوسى وكىلدەرىنىڭ تاراپىنان جاسالعان قوقان-لوققى سەبەپ بولعاندىعى ايتىلعان.

«مەنىڭ ماسكەۋگە كەلۋىمە بىرنەشە توسقاۋىل بولىپ تۇر. جەرگىلىكتى قازاقتار مەنى ۇركىتىپ-قورقىتتى. ءتىپتى مەنىڭ قاتىسۋىممەن ماسكەۋدە وتەتىن ءبىزدىڭ ءباسپاسوز كونفەرەنتسياسىنا ونشاقتى قازاق جۋرناليستەرى قاتىسادى ەكەن. ماعان بەلگىلى بولعانداي، ولار الدىن-الا اكرەديتسيادان دا وتكەن. مىنە، سول قازاق جۋرناليستەرى «بورات» ءفيلمى ءۇشىن مەنى تاياقتىڭ استىنا الاتىنىن ايتقان. مەن ءوزىمدى مۇنداي قاۋىپكە يتەرمەلەي المايمىن. ونىڭ ۇستىنە اشۋلى قازاقتار يۆاننىڭ (ۋرگانت) باعدارلاماسىندا دا قاستاندىق جاساۋى مۇمكىن. الەۋمەتتىك جەلىلەردە تارالعان وسى اقپاراتتار مەنىڭ رەسەيگە ساپارىمنان باس تارتۋعا جەتكىلىكتى بولدى»، - دەيدى ساشا بارون كوەن (http://vk.com/wall-48760195_816049).

بۇل كۇندە مازاققا قازاقتىڭ ەتى ۇيرەنگەن. قۇزىرلى ورگانداردىڭ ۇندەمەستىگى مەن قازاقتاردىڭ كونبىستىگى قوسىلىپ، وزگەلەردىڭ ەگەمەندىگىمىز بەن مەملەكەتتىك قۇندىلىقتارىمىزعا قول سۇعۋىنا جول بەرىپ كەلدى. بۇقارالىق اقپارات قۇرالدارىندا قازاقستاننىڭ «انتي-جارناماسىن» جاساپ بەرگەن «بوراتتى» شاما-شارقىمىزدىڭ كەلگەنىنشە سىنادىق، جاۋاپقا تارتۋدى تالاپ ەتتىك. بارىنشا باجايلاعانىمىزبەن، بيلىك جاقتان بىلق ەتكەن بەت كورمەدىك.

ءتۇيىن: رەسەيدە تۇراتىن 1,5 ميلليون قازاقتىڭ قاھارى «بوراتتىڭ» زارە-قۇتىن قاشىرسا كەرەك، قازاقتاردان قورقىپ، الگى سايقىمازاق ساشا رەسەيگە جاساۋى ءتيىس بولعان ساپارىنان باس تارتىپتى. بۇنى ەستىدىك، بارەكەلدى دەمەسكە شاراڭ جوق...

نۇرگەلدى ابدىعانيۇلى

Abai.kz