قازاقستاندىقتاردىڭ زەينەتاقى جيناعىنىڭ سوماسى 5,83 ترلن تەڭگەگە جەتتى. بۇل تۋرالى ءباسپاسوز ءماسليحاتى بارىسىندا بجزق باسقارما توراعاسى رۋسلان ەردەناەۆ ايتتى، - دەپ جازادى قازاقپارات.

وتكەن جىلدى قورىتىندىلاي كەلە باسقارما توراعاسى 2015 جىلى مىندەتتى زەينەتاقى جارناسىنىڭ سوماسى 657,6 ملرد تەڭگە بولعانىن اتاپ ءوتتى. بجزق-عا تۇسكەن ينۆەستيتسيالىق تابىس 761,40 ملرد تەڭگەگە جەتتى. بۇل سوما بارلىق سالىمشىلارعا ءبولىنىپ سالىندى.

وسىلايشا 13,6% ينفلياتسيا دەڭگەيىندە اكتيۆتەردىڭ تابىستىلىعى 15,65%-عا ارتتى.

«سالىمشىلارعا 141,12 ملرد تەڭگە، ساقتاندىرۋ ۇيىمدارىنا 24,23 ملرد تەڭگە تولەندى. قىزمەت كورسەتۋ ورتالىقتارى 6,6 ملن ادامعا قىزمەت كورسەتتى. كۇتۋ ۋاقىتى دا 6 مينۋتقا ازايتىلدى»، - دەدى ر.ەردەناەۆ.

ازاماتتاردىڭ جەكە شوتىنداعى قارجى تۋرالى اقپاراتتى پوشتا، ەلەكتروندى پوشتا، web- سايت، ءموبيلدى قوسىمشا، e-gov پورتالى ارقىلى بىلۋگە بولادى.

سونداي-اق، 2015 جىلدان باستاپ ء«موبيلدى وفيس» باعدارلاماسى ىسكە قوسىلدى. مۇمكىندىگى شەكتەۋلى ازاماتتار ءوز ۇيىنەن شىقپاي قاجەتتى قىزمەتتى الاتىن بولدى.

«قوردىڭ نەگىزگى مىندەتى كورسەتىلەتىن قىزمەت تۇرلەرىن حالىقارالىق ستاندارتقا جەتكىزۋ بولىپ تابىلادى. سالىمشى بولاشاقتا قورعا بارمايتىن بولادى. تەك ۋاقىتى كەلگەندە ءبىز شوتىنا بەلگىلى ءبىر سوما جىبەرىلگەنىن حابارلاپ وتىرامىز»، - دەدى باسقارما توراعاسى.

اباي-اقپارات