قازاقستاندىق جاس ءانشى ديماش قۇدايبەرگەنوۆ «ەۆروۆيدەنيە» بايقاۋىنا دايىندالىپ جاتىر. بۇل تۋرالى Tengrinews.kz تىلشىسىنە قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆا ايتىپ بەردى.

«قازاقستان ازىرشە «ەۆروۆيدەنيە» بايقاۋىنا قاتىسپايدى، دەگەنمەن ءبىز ءوتىنىش بەرىپ قويدىق. ديماشتى قىزۋ دايىنداپ جاتىرمىز. ول ءبىزدىڭ ۋنيۆەرسيتەتتىڭ ەكىنشى كۋرس ستۋدەنتى. ونىڭ جەڭىسكە جەتەتىنىنە كۇمانىمىز جوق. ديماش «سلاۆيان بازارى» بايقاۋىندا جەڭىمپاز اتانىپ، ەۋروپا ەلدەرىنە تانىمال بولدى. ول وتە دارىندى»، — دەدى ايمان مۇساقوجاەۆا.

سونىمەن قاتار، ديماش قۇدايبەرگەنوۆ The Voice UK جانە USA («ۇلىبريتانيا داۋىسى» جانە «اقش داۋىسى») بايقاۋلارىنا قاتىسۋدى جوسپارلاپ وتىر.

ەسكە سالايىق، ديماش قۇدايبەرگەنوۆ ۆيتەبسكتە وتكەن «سلاۆيان بازارى-2015″ حالىقارالىق بايقاۋىندا جەڭىمپاز اتانعان ەدى. ول، سونىمەن قاتار، «شىعىس بازارى» جانە «مەيكين ازيا» بايقاۋلارىنىڭ گران-پري يەگەرى.

Abai.kz