قازاقستان رەسپۋبليكاسىنىڭ ءبىلىم جانە عىلىم مينيسترى ەرلان كەنجەعاليۇلى ساعاديەۆتىڭ نازارىنا!

مەكتەپ پەن مۇعالىمگە سىي-قۇرمەتپەن قارايتىن زامان ارتتا قالعالى قاشان؟  «نەگە؟»- دەگەن سۇراق تۋىنداي قالسا جۇرەكتى اۋىرتىپ، جاندى جارالايتىن جاۋاپ الامىز.

بالا قوعامنىڭ  كىشكەنتاي عانا قورعانسىز بولىگى. بۇگىن «كىشكەنتاي» دەپ وتىرعان بالامىزدىڭ ەرتەڭگى  ءبىزدىڭ جالعاسىمىز، ەلىمىز بەن جەرىمىزدىڭ قورعاۋشىسى جانە يەسى ەكەنىن دە ۇمىتپاعانىمىز ابزال. وسى جىلدىڭ  11-اقپان كۇنى قاراساي اۋدانى، قىرعاۋىلدى اۋىلىنداعى قازاق ورتا مەكتەبىندە بەلگىسىز بىرەۋلەر ساۋدا جاساپ،  باستاۋىش سىنىپتارعا  اعىلشىن ءتىلىنىڭ كىتاپتارىن ساتقان. ول ساۋدا قالاي جۇرگىزىلدى، كىتاپ قانداي كىتاپ؟ ءبىرىنشى مەن ءتورتىنشى سىنىپ ارالىعىندا وقيتىن بۇكىل وقۋشىعا كىتاپ بەتىندەگى ەرتەگى كەيىپكەرىن كورسەتىپ: «مۇنان اسقان قىزىق كىتاپتى تاپپايسىڭدار» دەپ جارناما جاساعان. ءار سىنىپقا كىرىپ (ارينە، ساباقتى ءبولىپ) بالالارعا كىتاپ جارنامالاۋعا كىم رۇقسات بەردى. ول اراسى – بەلگىسىز. بەلگىلىسى وقۋلىق ينتەرنەتكە بايلانعان، ياعني ينتەرنەتسىز جۇمىس جاسامايتىن كىتاپ كورىنەدى. ينتەرنەتكە قوسىلعان سوڭ كىتاپتىڭ العاشقى بەتىن ايداحار «جارىپ»  كىرەدى. ءارى قاراي كىتاپ بەتىندەگى كودتى سۋرەتكە تۇسىرسەڭىز، ءاربىر بەتىن اشىپ كىتاپتى وقىپ بەرەدى. ول ءۇشىن تەلەفونىڭىزدا «Play Store» بولۋى ءتيىس. ينتەرنەتكە كىرسەڭىز كىتاپتاعى ءاربىر سۋرەت سويلەيدى، قيمىلدايدى. وسىنىڭ ءبارىن ءتۇسىندىرىپ، كورسەتىپ جارنامالاۋ ءۇشىن قانشا ۋاقىت كەتەتىنىن ءوزىڭىز باعامداي بەرىڭىز. سوسىن كىتاپتى بۇكىل وقۋشىعا تاراتىپ: «ەرتەڭ 2950 تەڭگە الىپ كەلىڭدەر، بولماسا كىتاپتى قايتارىپ الامىز» دەپ تاپسىرما بەرەدى.

ەندى ويلانىڭىز! بىرىنشىدەن 6-10 جاس ارالىعىنداعى بالالارعا ەرتەگى كەيىپكەرىنىڭ قىزىقتى قيمىل ءىس-ارەكەتىن كورسەتىپ تۇرىپ قولىنا كىتاپ بەردىڭىز. ول بالادان كىتابىڭىزدى قالاي قايتارىپ الاسىز؟ ەلىمىزدە داعدارىس باستالدى. تاماق تاپپاي وتىرعان وتباسىلار كوپ. جاقسى ءومىر سۇرەدى دەگەن وتباسىلاردىڭ ءوزى قالتىلداپ وتىرعان شاق. ءبىرىنشى اتا-انا  اقشاسى بار بولعاسىن سۋىرىپ بەرەر، ەكىنشىسى بالام قاتارىنان قالماسىن دەپ كورشىسىنەن قارىز الار، ء ۇشىنشىسى بالاسىنا جاعدايدى ءتۇسىندىرىپ الەك بولار. بۇدان اتا-انا مەن بالا اراسىندا تۇسىنبەۋشىلىك تۋىنداۋى دا مۇمكىن. ءبىز بالا كەزىمىزدەگى قولىمىز جەتپەي كەتكەن قۋىرشاقتى ءالى دە ارماندايمىز عوي. بالانىڭ جۇرەگىندە اتا-انا ورىنداي الماعان ءبىر تىلەك قالۋى تاعى دا مۇمكىن. جانىنداعى بالانىڭ، ءوزى قىزىعىپ قولى جەتپەگەن ەرتەگىگە تولى كىتاپتى ساتىپ العانىن كورگەن، ونى ساتىپ الۋ تۇرماق تويىپ تاماق جەي الماي جۇرگەن بالانىڭ رۋحى سىناتىنى تاعى دا ءمالىم. مەكتەپ ديرەكتورى بالا پسيحولوگياسىن تۇسىنبەيتىن بولسا،  نەگە ول ورىندا وتىر؟ بالانىڭ جان دۇنيەسىمەن ويناۋعا ەشكىمنىڭ قۇقىعى جوق. مەكتەپ ديرەكتورىنىڭ بۇل ارەكەتى  بالا پسيحولوگياسىنا اسەر ەتپەيدى دەي الاسىز با؟

ەكىنشىدەن، كىتاپ ۋكراينادا جاسالعان  جانە ول ينتەرنەتسىز جۇمىس جاسامايدى.

باسىلدى:  OAKLANDS  HOUSE,BOLTON,GREATER  MANCHESTER, BL64DT/UK بىرىككەن كورولدىگى، ال، باسپا: جك «يۋنيسوفت» :61036,ۋكراينا، حاركوۆ قالاسى، موروزوۆ كوشەسى،13-ب  ءۇي دەلىنگەن.

ۋكراينا نە ءۇشىن قازاقشا-اعىلشىنشا كىتاپ باسىپ وتىر؟ «كەدەن وداعى اۋماعىندا تاراتۋشى» دەلىنگەن. ۋكراينا كەدەن وداعىنا كىرمەيدى ەمەس پە؟

بۇل كىتاپ نەگە جەدەل تۇردە تاراتىلۋدا؟ اسىقپاي-اق كىتاپ دۇكەنىنىڭ  سورەلەرىندە نەگە ساتپايدى؟.

شەتەلدەن كىرگەن كىتاپتار مينيسترلىكتىڭ تەكسەرۋىنەن ءوتىپ، بەكىتىلىپ جىبەرىلۋى كەرەك. بۇل كىتاپقا مينيسترلىكتىڭ رۇحساتى بەرىلدى مە؟ ول قازىرشە بىزگە بەيمالىم. ءبىر بىلەرىم اتا-انا رەتىندە كىتاپ سەرتيفيكاتى ماعان كورسەتىلمەدى. بۇل كىتاپتى پايدالانعان بالانىڭ ينتەرنەت بەتىنەن قازىرشە اعىلشىنشا ۇيرەنىپ، ارادان ەكى اي وتكەننەن سوڭ باسقا دۇنيە كورمەسىنە كىم كەپىل؟ بۇل حالقىمىز بەن مەملەكەتىمىزدىڭ  تىنىشتىعىنا قاۋىپتى بولماسىن دەپ تىلەيىك.

ۇشىنشىدەن، مەكتەپ مەملەكەتتىك مەكەمە. مەكتەپتەن بازار جاساپ، قىزمەتىن اسىرا پايدالانۋعا ەشقانداي ديرەكتوردىڭ قۇقىعى جوق. مەكتەپ بازار ەمەس، بالا قۋىرشاق ەمەس.

قىزىم كىتاپ اكەلگەن كۇنى مەن قىرعاۋىلدى مەكتەبىنىڭ  ديرەكتورى قاسىموۆا ناعيما تولەۋبايقىزىنا باردىم. مەكتەپتە مۇنداي جولمەن كىتاپ ساتۋ بالانىڭ پسيحولوگياسىنا اسەر ەتەتىنىن ايتىپ، كىتاپتى جيناپ الۋىن سۇرادىم. ول كىسى  ماعان «بۇل كىتاپتى ساتىپ جاتقان ءبىز عانا ەمەس، قاراساي اۋدانىنىڭ بارلىق مەكتەپتەرى ساتۋدا» دەپ اقىل-كەڭەس  ايتىپ  قايتاردى. باسقا مەكتەپتەردىڭ ۇستازدارىمەن، اتا-انالارىنا حابارلاسىپ سۇراستىرىپ ەدىم، بۇل كىتاپ شىندىعىندا دا جالعىز ءبىر مەكتەپتە ەمەس ، قاراساي اۋدانىنىڭ كوپتەگەن مەكتەپتەرىندە ساتىلىپ جاتىر ەكەن. 

ارينە، بۇل حاتتى تىكەلەي سىزگە جازباۋعا دا بولار ەدى. بىراق، وسى ماسەلەگە اۋدان، وبلىستىق دەڭگەيدەگى جاۋاپتى ازاماتتار مەنىڭ شاعىمىما ماردىمدى جاۋاپ بەرگەن جوق. سوندىقتان دا، قۇلاساڭ ناردان قۇلا دەپ، تىكەلەي سىزگە مۇڭ شاعىپ وتىرمىن. بۇل - ءبىر عانا فاكتى. مەكتەپتى بازارعا اينالدىرعان مۇنداي دەرەكتەر ەلىمىزدە مىڭداپ سانالادى دەپ ويلايمىن. وسى جاعدايعا ءتيىستى شارا قولدانساڭىز، مۇنان كەيىن مەكتەپ ديرەكتورلارى اياعىن اڭداپ باسار ەدى.

سىزگە دەگەن قۇرمەتپەن ايمان ساعيدوللاەۆا

Abai.kz