اۋە شابۋىلىنان سيريادا كەمىندە ەلۋ ادام مەرت بولدى
بۇۇ-نىڭ مالىمەتىنشە، سيريانىڭ كوتەرىلىسشىلەر باقىلايتىن سولتۇستىك اۋدانىنا جاساعان اۋە شابۋىلىنان كەمىندە 50 بەيبىت تۇرعىن قايتىس بولدى.
بۇۇ باس حاتشىسى پان گي مۋننىڭ مالىمدەمەسىندە اۋە سوققىدان 5 اۋرۋحانا مەن 2 مەكتەپ، سونىمەن بىرگە "شەكاراسىز دارىگەرلەر" حالىقارالىق ۇيىمىنىڭ قولداۋىمەن جۇمىس ىستەپ جاتقان اۋرۋحانا دا زارداپ شەككەنى ايتىلعان. پان گي مۋن اۋە شابۋىلدارىن "حالىقارالىق زاڭداردى ورەسكەل بۇزىپ وتىر" دەپ اتادى.
اۋە شابۋىلداردى سونىمەن بىرگە ەۋروپالىق وداق پەن اقش-تا سوكتى. اقش مەملەكەتتىك دەپارتامەنتىنىڭ مالىمدەمەسىندە بۇل سوققىلار رەسەي مەن باشار اساد رەجيىمىنىڭ تاياۋدا كۇشىنە ەنەتىن سوعىستى توقتاتۋ جونىندەگى كەلىسىمنىڭ ورىندالۋىنا كۇمان كەلتىرەتىندىگى ايتىلعان.
سيريالىق وپپوزيتسيا وكىلدەرى اۋە سوققىنى نە رەسەيلىك ۇشاق نە ۇكىمەت وكىلدەرى جاسادى دەگەن سەنىمدە. ماسكەۋدەگى سيريا ەلشىسى رياد حادداد اۋە سوققىنىڭ جاۋاپكەرشىلىگىن اقش-قا جانە ونىڭ وداقتاستارىنا ارتتى.
ال داماسكىگە سيريا بيلىگى مەن وپپوزيتسيا اراسىندا كەلىسسوزگە دايىندىق جۇرگىزۋ ءۇشىن بۇۇ-نىڭ سيريا جونىندەگى ارنايى ەلشىسى ستاففان دە ميستۋرا كەلدى. كەلىسسوز 25 اقپاندا جەنەۆا قالاسىندا وتەدى دەپ كۇتىلەدى.
اباي-اقپارات
