ماسكەۋدە «قازاقستانداعى مەرزىمىنەن بۇرىن پارلامەنتتىك سايلاۋ جانە رەسەيلىك-قازاقستاندىق قاتىناستاردىڭ مۇمكىندىكتەرى» تاقىرىبىندا دوڭگەلەك ۇستەل ءوتتى، - دەپ حابارلايدى قازاقپارات.

شارانى م.ۆ. لومونوسوۆ اتىنداعى ممۋ پوستكەڭەستىك كەڭىستىكتى زەرتتەۋ بويىنشا اقپاراتتىق-ساراپتامالىق ورتالىعى مەن «روسسيا سەگودنيا» حاا-نىڭ زينوۆەۆ كلۋبى ۇيىمداستىردى.

جەتەكشى رەسەيلىك ساراپشىلار مەن ساياساتتانۋشىلار ءماجىلىس سايلاۋىنىڭ ءوتۋ سەبەپتەرىن، جاڭا سايلاۋ تسيكلىنىڭ ەرەكشەلىگىن تالقىلاپ، بۇگىنگى رەسەيلىك-قازاقستاندىق قاتىناستارعا باعا بەردى.

دوڭگەلەك ۇستەل مودەراتورى، م.ۆ. لومونوسوۆ اتىنداعى ممۋ پوستكەڭەستىك كەڭىستىكتى زەرتتەۋ بويىنشا اقپاراتتىق-ساراپتامالىق ورتالىعىنىڭ باس ديرەكتورى سەرگەي رەكەدا رەسەيدىڭ قازاقستانداعى سايلاۋعا قىزىعۋشىلىق تانىتىپ جاتقانىن اتاپ ءوتتى.

وڭىرلىك ماسەلەلەر ينستيتۋتىنىڭ ديرەكتورى دميتري جۋراۆلەۆ ءدال قازىر سايلاۋدىڭ ءوتۋى ورىندى ەكەنىن ايتتى. ويتكەنى كۇردەلى ەكونوميكالىق جاعداي ستراتەگيالىق شەشىمدەردى تالاپ ەتەدى.  

ونىڭ پىكىرىنشە، ساياسي جۇيە ساياسي ەليتا جاڭارعان جاعدايدا ىلگەرى باسادى.

«قازىرگى قازاقستانداعى سايلاۋ ەلدەگى كادرلىق قۇرامدى جاڭارتۋدىڭ جاقسى مۇمكىندىگى. بۇل تۇراقتىلىققا زيانىن تيگىزبەيدى، دەگەنمەن ارى قاراي دامۋعا سەرپىن بەرەدى»، - دەدى ول.

«سەۆەر-يۋگ» ساياساتتانۋ ورتالىعىنىڭ جەتەكشى ساراپشىسى الەكساندر كاراۆاەۆ ءماجىلىس سايلاۋىنان بولەك جەرگىلىكتى بيلىك ورگاندارىنىڭ- ءماسليحات سايلاۋى وتەتىنىن، وعان 3 395 ادام سايلاناتىنىن ەسكە سالدى.  ول قزىرگى سايلاۋدى اتقارۋشى بيلىكتەگى شەنەۋنىكتەردىڭ بىلىكتىلىگىنە سىناق جۇرگىزۋ سەكىلدى دەپۋتاتتىق كورپۋستى قايتا اتتەستاتسيالاۋدىڭ بالاماسى رەتىندە سالىستىرىپ كورسەتتى.

ەاەو ينستيتۋتىنىڭ ديرەكتورى ۆلاديمير لەپەحين قازاقستان پوستكەڭەستىك كەڭىستىكتەگى جاڭعىرۋدى باستان كەشىرىپ وتىرعان جالعىز ەل ەكەنىن ايتتى.  

اباي-اقپارات