بۇۇ-نىڭ قاۋىپسىزدىك كەڭەسىندە جاڭا زەلانديا جانە يسپانيانىڭ ءوتىنىشى بويىنشا جابىق ەسىك جاعدايىندا كەڭەس وتكەن. وندا الەپپوداعى گۋمانيتارلىق داعدارىس تالقىلانعان. بۇل جونىندە France-Presseاگەنتتىگى حابارلايدى.

بۇۇ جانىنداعى ۇلىبريتانيا وكىلى مەتيۋ ريكروفت رەسەي سيريا پرەزيدەنتى باشار اساد رەجيمىنە ىقپالىن پايدالانىپ، شابۋىلداردى توقتاتۋ كەرەك، گۋمانيتارلىق كومەك جەتكىزۋ ءۇشىن جاعداي جاساۋ كەرەك دەپ مالىمدەدى.

سونىمەن بىرگە اقش مەملەكەتتىك دەپارتامەنتىنىڭ جوعارى لاۋازىمدى وكىلى برەتت ماكگۋرك رەسەيدىڭ اۋە شابۋىلدارى "يسلام مەملەكەتى" ەكسترەميستىك توبىنىڭ پوزيتسياسىن نىعايتىپ جاتىر دەدى.

سوڭعى كۇندەرى الەپپوعا جاسالىپ جاتقان شابۋىلداردان كەيىن 35 مىڭعا جۋىق سيريالىق ۇيلەرىن تاستاپ، بوسىپ كەتۋگە ءماجبۇر بولعان.

بۇگىن ميۋنحەندە سيرياعا قولداۋ كورسەتۋ جونىندەگى حالىقارالىق توپتىڭ كەزدەسۋى وتەدى. وندا اقش مەملەكەتتىك حاتشىسى دجون كەرري مەن 20 ەلدىڭ سىرتقى ىستەر مينيسترلەرى قاتىسادى. ونىڭ ىشىندە رەسەيدىڭ سىرتقى ىستەر ءمينيسترى سەرگەي لاۆروۆ تا بار.

اباي-اقپارات