اقوردانىڭ ءباسپاسوز قىزمەتى اڭگىمە اۋانى ۋكراينانىڭ شىعىسىنداعى شيەلەنىستى شەشۋگە باعىتتالعان «مينسك كەلىسىمدەرىن ءارى قاراي جۇزەگە اسىرۋ» جانە اسقىنىپ كەتكەن ورىس-تۇرىك تەكەتىرەسى توڭىرەگىندە وربىگەنىن حابارلايدى.

حابارلامادا ءپۋتيننىڭ ماسكەۋ مەن انكارا اراسىنداعى قاتىناستىڭ ناشارلاۋىنا تۇرىك تارابىن كىنالاعان، سوعان وراي، جاعدايدى قالپىنا كەلتىرۋ ءۇشىن تۇركيانىڭ ءبىرىنشى قادام جاساۋى كەرەكتىگى تۋرالى سوزدەرىن كەلتىرەدى.

نازارباەۆ پەن پۋتين تۇركيانىڭ پرەمەر-ءمينيسترى احمەد داۋىتوعلى استانادا قازاقستان پرەزيدەنتىمەن كەزدەسكەننەن ەكى كۇن وتكەن سوڭ سويلەستى.

ماسكەۋ مەن انكارانىڭ اراسى تۇركيا بىلتىر 24 قاراشادا تۇرىك-سيريالىق شەكاراسىندا رەسەيلىك بومبالاۋشى ۇشاقتى اتىپ تۇسىرگەننەن كەيىن كۇرت ناشارلاپ كەتكەن ەدى. قازاقستان ەكى ەلمەن دە تەرەڭ بايلانىستا.