شارانانى ماشينانىڭ تەرەزەسىنەن لاقتىرىپ جىبەرگەن جانتۇرشىگەرلىك وقيعادان كەيىن ءبىزدىڭ ەلدە مەكتەپ جاسىنداعى ءجاسوسپىرىم قىزداردىڭ جۇكتى بولىپ قالۋ ماسەلەسى ءجيى ءسوز بولىپ، ەل دۇرلىگە باستادى. سودان بەرى، قۇدايدىڭ قۇتتى كۇنى جاعا ۇستاتارلىق ءبىر اقپارات ەستيتىن بولدىق. نەگە؟ سوڭعى كەزدەرى جاريالانىپ جاتقان رەسمي اقپاراتتاردىڭ ءوزى قازاقستانداعى بويجەتكەندەر مەن بويجەتپەگەندەردىڭ جاعدايىنىڭ تىعىرىققا تىرەلىپ، تۇيىقتالىپ قالعانىن كورسەتەدى. كەشە 31 ارنا تاعى ءبىر سۇمدىق اقپاراتتىڭ شەتىن شىعاردى.

اقتوبە وبلىسىندا بىلتىردىڭ وزىڭدە 63 وقۋشى مەكتەپ قابىرعاسىندا ءجۇرىپ جۇكتى بولىپ قالىپتى. ولاردىڭ ەلۋ پايىزدان استامى قازىر انا اتانىپ، وقۋلارىن تاستاعان. جۇكتى بولعانداردىڭ ىشىندە ءتىپتى 14 جاستاعى قىزدار دا بار كورىنەدى. وسى ەكى اۋىز اقپاراتتىڭ وزىندە قانشاما تاعدىر بار. قانشاما قىزدارىمىزدىڭ ءومىرى تاس تالقان بولدى؟ ويلاۋدىڭ ءوزى قورقىنىشتى.

قوش! ەندى ارنانىڭ ايتارىن ىسىرىپ تاستاپ، ناقتى رەسمي دەرەكتەردەن مىسال كەلتىرەيىك. قازىر قازاقستاندا ەڭ جاس انانىڭ جاسى 13-تە ەكەن (ەڭ جاس انا سولتۇستىك قازاقستان وبلىسىندا تۇرادى). قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ بۇل مالىمەتى ءسىزدىڭ جۇرەگىڭىزدى ءدىر ەتكىزە مە؟ بۇل 2015 جىلدىڭ 1 شىلدەسىنە دەيىنگى مالىمەت. دەمەك، شارانانى تەرەزەدەن لاقتىرماي ءھام اجەتحاناعا تاستاماي تۇرىپ بۇل جاعدايات ۋشىعىپ، جەتەر جەرىنە جەتىپ قويىپتى. تەك ءبىز ەرەنسىز بولعانبىز. ايتپەسە، 13 جاستاعى قىز جۇكتى بولعان كەزدە -اق ء«بىر قازاقتىڭ – تاعدىرى، بار قازاقتىڭ – تاعدىرى» دەپ مۇنداي وقيعالاردىڭ الدىن الار جول ىزدەر ەدىك.  

تاعى دا رەسمي اقپاراتتار سويلەسىن. قازاقستاندا 2015 جىلدىڭ 1 قاڭتارىنان 1 شىلدەسىنە دەيىن كامەلەتكە تولماعان 2420 قىزدىڭ جۇكتى بولىپ قالعانى انىقتالىپ،  رەسمي تىركەۋگە تۇرعان. بۇل – رەسمي اقپارات. بەيرەسمي جاعدايىمىز قانداي ەكەنىن ويلاۋدىڭ ءوزى قورقىنىشتى؟ بۇل كورسەتكىش بۇدان ەكى-ءۇش ەسەلەنىپ كەتۋى مۇمكىن ەكەنى ايتپاساڭىز دا تۇسىنىكتى.

ءبىز مۇنداي جاعدايعا قالاي جەتتىك؟ بۇلاي كەتە بەرسە، سوڭى نە بولماق؟ ەندىگى قويىلار ساۋال وسى بولسا كەرەك...

ءشارىپحان قايسار

Abai.kz