ماماندار قازاقستاندا قاتەرلى ىسىككە شالدىققاندار سانىنىڭ جىل وتە ءوسىپ بارا جاتقانىنا الاڭدايدى. قازاق ونكولوگيا جانە راديولوگيا ينستيتۋتىنىڭ دەرەگىنشە، قازىر ەلدە 156 مىڭ ادامعا وسىناي دياگنوز قويىلعان.

كۇن سايىن جۇزگە تارتا جاڭا قاتەرلى ىسىكتىڭ پايدا بولعانى تۋرالى دەرەك تىركەلەدى. 2015 جىلدىڭ ناتيجەسىندە 36 438 جاڭا وقيعا تىركەلگەن، جىلىنا 16 مىڭ ادامعا دەيىن وبىردان كوز جۇمادى.

قازاقستاننىڭ كوپتەگەن تۇرعىنى تەرى قاتەرلى ىسىگى، اسقازان مەن وكپە قاتەرلى ىسىگى سەكىلدى ونكولوگيالىق دەرتكە شالدىعادى. ماماندار ەل تۇرعىندارىنا ەش جەرى اۋىرماسا دا، تەگىن تەكسەرۋدەن وتۋگە شاقىرادى.

قاتەرلى ىسىككە قارسى دۇنيەجۇزىلىك كۇنىنە وراي وتكەن ءباساسوز جيىنىندا الماتى قالالىق ونكولوگيالىق ورتالىعىنىڭ باس دارىگەرى ديليارا قايداروۆا: «قاتەرلى ىسىكتىڭ نەگىزىنەن گەندىك جاعىنان بەيىمدىلىكتەن تۋادى. وبىر كۇيزەلىستەن، گورمونالدى وزگەرىستەردەن پايدا بولادى، ونىڭ ۆيرۋستى ەتيولوگياسى دا بار. تەمەكى تارتقانداردا وكپەنىڭ قاتەرلى ءىسى پادا بولادى، الكوگول اسقازان جانە باۋىردىڭ قاتەرلى ىسىگىنە اكەلەدى. دۇرىس تاماقتانباۋ، سەمىزدىك، جۇرەك-قان تامىر اۋرۋلارى ءبارى اۋرۋعا اكەلەتىن قاتەرلەر»،-دەپ مالىمدەدى.

قاتەرلى ىسىك اسىرەسە سولتۇستىك، شىعىس قازاقستان جانە پاۆلودار وبلىستارىندا كەڭ تارالعان. وڭتۇستىك قازاقستان جانە ماڭعىستاۋ وبلىستارىندا مۇنداي دەرتكە شالدىققاندار سيرەك كەزدەسەدى.

دۇنيەجۇزىلىك دەنساۋلىق ساقتاۋ ۇيىمى جىل سايىن 14 ميلليونعا دەيىن ادامنان قاتەرلى ىسىك تابىلاتىنى جانە سەگىز ميلليونعا جۋىق ناۋقاستىڭ دەرتتەن كوز جۇماتىنىن تىركەيدى.

Abai.kz