تۇركيا پرەمەر-ءمينيسترى احمەت داۆۋتوگلۋ رەسەي مەن سيريالىق پرەزيدەنت باشار اسادتىڭ وزگە دە جاقتاۋشىلارىن سيريادا "اسكەري قىلمىس"جاساعاندارى ءۇشىن ايىپتادى.

لوندونداعى سيريالىق سوعىس قۇرباندارىنا كومەك قارجى جيناۋ كونفەرەنتسياسىندا ءسوز سويلەگەن داۆۋتوگلۋ سيرياداعى گۋمانيتارلىق داعدارىستىڭ باستى سەبەبى "سيريالىق رەجيمنىڭ اسكەري قىلمىستارى " مەن يسلام مەملەكەتى سودىرلارىندا جاتقانىن مالىمدەدى. ونىڭ ايتۋىنشا، "اساد رەجيمىنە كومەكتەسىپ جاتقاندار دا اسكەري قىلمىستارعا بارىپ وتىر». دايەك ەسەبىندە داۆۋتوگلۋ «الەپپونىڭ رەسەيلىك ۇشاقتاردىڭ جويقىن شابۋىلدارىنىڭ استىندا قالعانىن» كەلتىردى.

رەسەي قورعانىس مينيسترلىگىنىڭ وكىلى يگور كوناشەنكوۆ ماسكەۋدە داۆۋتوگلۋدىڭ سىنىنا جاۋاپ قايتاردى. ول تۇركيانى سيرياعا "اسكەري باسىپ كىرۋگە قاتتى دايىندالىپ جاتىر»،- دەپ ايىپتادى. ول رەسەيدىڭ "سيريا اۋماعىنا جاقىن جەردە تۇرىك قارۋلى كۇشتەرىنىڭ بەلسەندى وپەراتسيالار جاساۋعا باعىتتالعان قۇپيا دايىندىعىن بايقاپ وتىرعانى" تۋرالى ايتتى.

كەيىنىرەك انكاراداعى تۇرىك ۇكىمەتىنىڭ وكىلى ماسكەۋ تۇرىك اسكەريلەرىنىڭ دايىندىعى تۋرالى مالىمدەمەنى جۇرت نازارىن ءوز «قىلمىستارىنان» باسقاعا اۋدارۋ ماقساتىندا جاساعانىن جاريالادى.

Abai.kz