بۇل جونىندە كومپانياعا قاتىسى بار ەكى ادامعا سىلتەمە جاساپ، «ۆەدوموستي» گازەتى حابارلايدى. اقش وزبەكستانداعى Vimpelcom ءىسىن تەرگەپ جاتىر.

ەسكە سالا كەتەيىك، العاش رەت تەلەكوم-كومپانيانىڭ گۇلنار كاريموۆانىڭ ەسەپ شوتىنا اۋدارعان كۇدىكتى قاراجات 2012 جىلى بەلگىلى بولدى. ءبىر جىلدان كەيىن اقش جانە بىرنەشە ەۋروپالىق ەلدەر بۇل ىسكە قاتىستى تەرگەۋ جۇمىستارىن باستادى. كۇدىككە TeliaSonera, رەسەيلىك VimpelCom مەن متس ءىلىندى. تەرگەۋشىلەر اۋدارىلعان اقشا كومپانيانى وزبەكستان نارىعىنا كىرگىزۋ ءۇشىن بەرىلگەن پارا دەپ ەسەپتەيدى.

قارجى ەكسپەرتتەرىنىڭ پىكىرىنشە، پرەزيدەنتتىڭ قىزى 1 ملرد دوللار پارا العان. ونىڭ ءبىر بولىگى ءارتۇرلى ەلدەردەن اكتيۆتەر ساتىپ الۋعا جۇمسالعان، ونىڭ ىشىندە شۆەيتساريادا ورنالاسقان ءزاۋلىم عيمارات تا بار.

تەرگەۋ بارىسىندا اقش-تىڭ سوت بيلىگى ەۋروپاداعى ارىپتەستەرىن وزبەك پرەزيدەنتى وتباسىنىڭ بانكتەگى ەسەپ-شوتتارىن تۇتقىنداۋدى تالاپ ەتكەن بولاتىن. اقشانىڭ كوپ بولىگى – 800 ميلليون شۆەيتسار فرانكى – شۆەيتساريا بانكتەرىندە تۇتقىندالدى. بۇگىندە وزبەك بيلىگى بۇل اكتيۆتەردى قايتارىپ الۋعا بارىن سالىپ جاتىر.