شىمكەنتتىڭ تورىندە ورنالاسقان ا.س.پۋشكين اتىنداعى وبلىستىق كىتاپحانادا تۇركىستانداعى حالىقارالىق قازاق-تۇرىك ۋنيۆەرسيتەتى جۋرناليستيكا فاكۋلتەتىنىڭ IV-كۋرس ستۋدەنتى، كوپتەگەن حالىقارالىق، رەسپۋبليكالىق جىر دوداسىنىڭ جەڭىمپازى، 2014 جىلعى حالىقارالىق «شابىت» فەستيۆالىنىڭ گران-پري يەگەرى، ورداباسىلىق وعلان – باتىرحان سارسەنحاننىڭ «مەيىرىم عالامشارى» اتتى جاڭا جىر جيناعىنا ارنالعان تۇساۋكەسەر ءوتتى.

كىتاپ – قاراعاندى قالاسىنداعى «تەنگري» باسپاحاناسىنان جارىق كورىپتى. اعالىق اق نيەتپەن وسى كىتاپتىڭ باسىلۋىنا قولداۋ كورسەتكەنى ءۇشىن، اقىن – قالقامان سارينگە اۆتور دا، جۇرتشىلىق تا رازى. رەداكتورى – تانىمال جاس جازۋشىلاردىڭ ءبىرى – سەرىك ساعىنتاي. سۋرەتشىسى – ءادىلحان مالىك. العىسوزىن جازعان اقىن، مەملەكەتتىك سىيلىقتىڭ لاۋرەاتى، قازاقستاننىڭ ەڭبەك سىڭىرگەن قايراتكەرى – ۇلىقبەك ەسداۋلەت: «باتىرحاننىڭ اقىندىعى – ساۋلەلى، شۇعىلاسى مول، جارقىن نۇرعا شۇپىلدەگەن تازا، تۇمسا، ءمولدىر الەم. ونىڭ جىرلارىندا كورەگەن كوڭىل، سەزىمتال سانا، باۋىرمال جۇرەك بار. باستاۋىن بۇرقىلداعان قاينار تۇمادان الىپ، بۇرقىراپ اققان بۇلاقتىڭ ارنالى وزەنگە اينالۋعا اسىققان جاراسىمدى ەركە، ەر مىنەزى بار،» – دەپتى. 

جاعىمدى جاڭالىققا جيىلعان حالايىق كىتاپحاناعا لىق تولدى. «مەيىرىم عالامشارى» كىتابىنىڭ تۇساۋىن كەسۋ قۇرمەتىنە الاشتىڭ ارداقتى ازاماتتارى نارماحان بەگالى مەن مارحابات بايعۇت يە بولدى. ولار كىتاپتىڭ تۇساۋىن كەسىپ، قوعامنان، ادامدار اراسىنان مەيىرىم ىزدەگەن جاس اقىنعا اق باتالارىن بەردى. قوس بىردەي كىتاپتىڭ اۆتورى اتانىپ وتىرعان تالاپتى جاسقا، ءبىر توپ زيالىلار مەن ستۋدەنت-جاستار شىعارماشىلىق تابىس تىلەدى، اقىننىڭ ولەڭدەرىن وقىدى. كەزەك باتىرحان سارسەنحاننىڭ وزىنە تيگەندە، ءشاربانۋ ءدىناسىلوۆا باسقارىپ وتىرعان كىتاپحانا ۇجىمىنا العىسىن ايتىپ، جىر شوعىرىن بىرىنەن سوڭ ءبىرىن لاقىلداتتى-اي. تىڭدارمان قاۋىم ۇلكەن ەستەتيكالىق ءلاززات الىپ، اسىرەسە جاستار جاعى ازەر تارقاستى.

قۇيتاقانداي جۇرەگىنە مەيىرىم قۇنداقتاعان پوەزيا پەرىشتەسىنىڭ جىر عۇمىرى قازاق ادەبيەتىمەن ماڭگى جاساسىن دەپ، ءبىز دە تىلەۋلەستىك بىلدىردىك.

 گۇلداريا اشىرباەۆا

 شىمكەنت.

اباي-اقپارات