جاقىندا قازاقستاندىق “تسەسنابانك” اق ديرەكتورلار كەڭەسىنىڭ جاڭا باسشىسى سايلاندى. استانا قالاسىنىڭ قازىرگى اكىمى ادىلبەك جاقسىبەكوۆتىڭ يەلىگىنە تيەسى «تسەسنا» يمپەرياسىنىڭ  ەندىگى توراعاسى – اكىم مىرزانىڭ بالاسى – داۋرەن ادىلبەكۇلى جاقسىبەك.  بۇل تۋرالى  NUR.KZ سايتى forbes.kz باسىلىمىنا سىلتەمە جاساي وتىرىپ حابارلايدى.

ديرەكتورلار كەڭەسىنىڭ جاپ-جاڭا توراعاسى داۋرەن ادىلبەكۇلى  2015 جىلدىڭ 14-ءشى جەلتوقسانىنان باستاپ قىزمەتىنە كىرىسكەن.

اكەسى اۋەكتەتكەن داۋرەن مىرزانىڭ ەسىمى ەسىل جۇرتقا ونشا ءبىر تانىمال ەمەس تە. ءبىز بىلەتىن دەرەكتەردە داۋرەن جاقسىبەك 2000 جىلى اقش-تىڭ ۆاشينگتون قالاسىنداعى «AU» امەريكان ۋنيۆەرسيتەتىن «حالىقارالىق قارجى جانە ماركەتينگ» ماماندىعى بويىنشا بىتىرگەن. سونان كەيىن، 2002 جىلى New York University-ءدى “نەسيەلىك ساراپشى” ماماندىعى بويىنشا ءتامامداپ، قازاقستان زاڭ ۋنيۆەرسيتەتىنەن زاڭگەر ماماندىعى بويىنشا ءبىلىم العان ەكەن.

داۋرەن ادىلبەكۇلى “تسەسنا” كورپوراتسياسىنىڭ ۇلەسىنە يەلىك ەتەدى. سونداي-اق ول استاناداعى ۇلتتىق كاسىپكەرلەر پالاتاسى ايماقتىق كەڭەسىنىڭ توراعاسى. داۋرەن جاقسىبەك  قازاقستانداعى ۇزدىك كاسىپكەرلەردىڭ رەيتينگىسىندە 12-ءشى ورىننان كورىنگەن.

“تسەسنا” قارجىلىق حولدينگىنىڭ” جالعىز اكتسيونەرى – “تسەسنا” كورپوراتسياسى. ونىڭ 70 پايىزى ادىلبەك جاقسىبەكوۆكە تيەسىلى بولسا، قالعان 30 پايىزىنا جاقسىبەكوۆتىڭ ۇلى داۋرەن، ءىنىسى سەرىك رىسكەلدىۇلى، اكەلى-بالالى مەششەرياكوۆتار جانە نۇرجان تۇرعىمباەۆ يەلىك ەتەدى.

«تسەسنا» يمپەرياسىنىڭ كورولى ءھام استانا اكىمى ادىلبەك جاقسىبەكوۆ مىرزا جاڭا تاعايىنداعان «توراعا - ۇلىنا» ۇلكەن سەنىم ارتىپ وتىرسا كەرەك. مۇندايدا كورشىلەرىمىز: «كاك بى پوسموترەت» دەيدى. سول «پوسموترەتتىڭ» پوشىمىمەن ايتار بولساق، «يمپەريا» پاپاسى ءوز بالاسىن ءوز بانكىنە توراعا ەتىپ تاعايىنداۋىنىڭ استارىندا ۇلكەن جوسپار جاتسا كەرەك. قالاي بولعاندا دا، بۇل تاعايىنداۋ جاقسىبەكوۆكە جاققانىمەن، كەزى مەن ءساتى كەلگەندە «پاتسان» پاپانىڭ سەنىمىن اقتاي الا ما؟ جالقى سۇراق...

ماسەلەنى ەكىنشى جاعىنان قارايتىن بولساق، جاقسىبەكوۆتىڭ «جاقىندىق» قاتىناستارى ارقىلى بالالاردى باسشىلىق قىزمەتتەرگە تاعايىنداپ جاتقان سياقتى.

وسىنىڭ الدىندا استان اكىمى  اقمولا وبلىسى باسشىسىنىڭ بالاسىن، ەلباسى ايتقانداي، اۋزىنان انا ءسۇتى كەپپەگەن پاۆەل كۋلاگيندى اۋدان اكىمى ەتىپ تاعايىنداعان بولاتىن. ول كەزدە استانالاق ەليتا «كۋلاگيننىڭ پاشكاسى جاقسىبەكوۆكە نەسىمەن جاقتى» دەپ، الاتايداي تۋلاعان ەدى.

وسى جولى سول تاعايىنداۋدىڭ ءتۇيىنى بەلگىلى بولعانداي.

بۇل ەكى تاعايىنداۋدىڭ دا استارىندا جاقسىبەكوۆتىڭ وتباسىلىق بيزنەسىمەن بايلانىستى بولسا كەرەك. جاقسىبەكوۆتىڭ يەلەگىندەگى «تسەسنا» يمپەرياسى ارزان استىققا قاتتى ءزارۋ. ال كۋلاگين قازاقستانداعى ەڭ ءىرى استىقتى وبلىستىڭ تىزگىنشىسى ءھام ءىرى جەر يەلەنۋشى لاتيفۋنديست. ەندى، قالجىراعاندار قالىستا تۇرىپ قارەكەت ەتسە، پاشكا مەن داۋكەڭ اكىم اكەلەرىنىڭ سەنىمدەرىن اقتاۋ ءۇشىن تالاپتاناتىن بولادى. بالالاردىڭ ءبىلىمى جوعارى. ەندى ىستە كورەيىك.

ءتۇيىن: يمانعالي تاسماعامبەتوۆ استانا اكىمى بولىپ تۇرعاندا ەلباسى نۇرسۇلتان ءابىشۇلى: «اۋزىنان  انا ءسۇتى كەپپەگەن بالالاردى باسشىلىق قىزمەتكە تاعايىندايسىڭدار» دەگەن جالپى سىن تاققان ەدى. اتتەڭ-ايدا، ەلباسىنىڭ سىنىنان ساباق العاندارى شامالى بولىپتى.  قايران ءسوزىم قور بولدى-اۋ...

نۇرگەلدى ابدىعانيۇلى

Abai.kz