داۆۋتوگلۋ رەسەيلىك كوشباسشىنىڭ "ديپلوماتياعا جاتپايتىن جانە قورلايتىن " ەسكەرتپەلەرىنە جاۋاپ بەرۋ ارقىلى سونداي دەڭگەيگە تۇسكىسى كەلمەيتىنىن ايتتى.

ەو سەگىز ەلىنىڭ باسشىلارىمەن بريۋسەلدە كەزدەسىپ قايتقان داۆۋتوگلۋ جۋرناليستەرگە: "ول مۇمكىن بۇرىنعى مقك-گى جۇمىسىن ەسكە تۇسىرگەن شىعار. بىراق مقك ەندى جوق، ال كەڭەستىك ناسيحات تاريح قويناۋىندا قالدى. ونىڭ ءاربىر ءسوزىن الەم مىسقىلمەن قابىلدايدى.", –دەدى.

جەلتوقساننىڭ 17-دە وتكەن جىل سايىنعى ءباسپاسوز كونفەرەنتسياسىندا انكارامەن اراداعى قاتىناس تۋرالى سۇراققا جاۋاپ بەرىپ وتىرىپ، ۆلاديمير پۋتين تۇركيانىڭ قازىرگى باسشىلىعىمەن كەلىسۋ مۇمكىن ەمەستىگىن مالىمدەدى. رەسەي پرەزيدەنتىنىڭ سوزىنشە، تۇرىك-سيريا شەكاراسىنداعى رەسەيلىك ۇشاقتى اتىپ ءتۇسىرۋ ارقىلى، تۇرىك باسشىلارىنىڭ ءبىرى "امەريكالىقتاردىڭ ءبىر جەرىن جالاعىسى كەلگەن سياقتى".

تۇركيا قاراشانىڭ 24-دە اتىپ تۇسىرگەن رەسەيلىك سۋ-24 ۇشاعىن ەلدىڭ اۋە كەڭىستىگىن بۇزدى دەپ كىنالايدى. ماسكەۋ بۇل ايىپتاۋلاردى ءۇزىلدى-كەسىلدى جوققا شىعارىپ، انكاراعا قارسى ەكونوميكالىق سانكتسيالار قولداندى.