قازاقستان مۇسىلماندارى ءدىني باسقارماسىنىڭ جانىنداعى يمامداردىڭ ءبىلىمىن جەتىلدىرۋ يسلام ينستيتۋتىنىڭ ديرەكتورى، ۇستازدار ۇجىمى مەن «قازان-جەلتوقسان» ايى وقۋ لەگىندە ءبىلىم الىپ جاتقان ەلىمىزدىڭ ءتۇرلى وبلىستارىنان جانە كورشىلەس جاتقان موڭعوليا ەلىنەن كەلگەن 50-دەن استام يمام-مولدالار باس ءمۇفتي ەرجان قاجى مالعاجىۇلىمەن كەزدەسىپ، حازرەتتىڭ ءدارىسىن تىڭدادى دەپ حابارلايدى www.muftyat.kz

ساباق بارىسىندا باس ءمۇفتي ءدىن قىزمەتكەرلەرىنىڭ جاعدايىن سۇراپ، سۇحباتتاستى. قمدب توراعاسى ءداستۇرلى ءدىنىمىز يسلامنىڭ ايناسى بولىپ تابىلاتىن ءاربىر يمامدى وزىنە جۇكتەلگەن جاۋاپتى مىندەتىن اتقارۋ بارىسىندا تۋىنداعان كەز-كەلگەن سۇراققا استە اسىعىس شەشىم قابىلداماۋعا شاقىردى. سونىمەن قاتار، يسلام ءدىنىنىڭ قىرى مەن سىرىن، ءتۇرلى سالالارىن جەتە مەڭگەرگەندە عانا حالىقتى، ۇلتتى تۋرا جولعا، بىرلىككە باعىتتاۋعا بولاتىنىن ءسوز ەتتى.

باس ءمۇفتي ءدارىس بارىسىندا اۋىل-ايماقتان كەلگەن يمام-مولدالارعا ءپاتۋا بەرۋدىڭ تاسىلدەرىن ۇيرەتتى.

ء«بىز – حالىقتىڭ قىزمەتكەرىمىز. ادامنىڭ رۋحى مەن جىگەرىن وياتىپ، يمانىن كوتەرۋ، جاستاردى پاتريوتيزمگە تاربيەلەۋ – ءسىز بەن بىزگە جۇكتەلگەن جاۋاپكەرشىلىگى مول مىندەت. وسىنى ۇمىتپاڭىزدار»، – دەدى قمدب توراعاسى ەرجان قاجى مالعاجىۇلى.  

ساباق سوڭىندا ينستيتۋت ديرەكتورى كەنجەالى قاجى قوڭىراتبايۇلى يمامداردىڭ ءبىلىمى مەن تاجىريبەسىن كوتەرۋ باعىتىندا وقۋ ورنىنىڭ ۇجىمى بارلىق مۇمكىندىكتەردى قاراستىرىپ، بەلسەندى جۇمىس جاساي بەرەتىنىن جەتكىزدى.

ايتا كەتەيىك، باس ءمۇفتي وسىعان دەيىن بىرنەشە رەت يسلام ينستيتۋتىندا، مەدرەسەدە شاكىرتتەرگە ءدارىس بەردى. بۇل باستاما بولاشاقتا دا جالعاسىن تابادى.

اباي-اقپارات