ورال شەكارا وتريادىنىڭ «شىڭعىرلاۋ-تەمىرجول» كولىكتىك باقىلاۋ بولىمشەسىندە شەكارا ناريادى بۇگىن تۇندە، ساعات 02.30-دا «ورال - استانا» باعىتى بويىنشا، رەسەيدىڭ ورىنبور ايماعىن باسىپ وتەتىن № 058 پويىزداعى ۆاگونداردىڭ ءبىرىنىڭ جولسەرىگى بولىپ جۇمىس ىستەيتىن،   61 جاستاعى قاتاۋوۆ سۋىقباي ەسىمدى ازاماتتى ۇستادى دەپ حابارلايدى قر ۇقك شق ءباسپاسوز قىزمەتى. 

 جولسەرىكتىڭ ۇستالۋ سەبەبى – جابىق تامبۋردىڭ قالتاشاسىندا تىعىلعان قوراپتاعى، جالپى سالماعى 15 كگ بولاتىن 3 دانا بەكىرە بالىعى جانە 500 گرامم قارا ۋىلدىرىق.

ەگەر اتالمىش ازاماتتىڭ بۇل تابىلعان قوراپقا قاتىسى بارلىعى انىقتالسا قر قىلمىس كودەكسىنىڭ 335 بابىنىڭ 1-بولىگىنىڭ 3-تارماعى بويىنشا قىلمىستىق جاۋاپقا تارتىلىپ، 2000 ايلىق ەسەپتىك كورسەتكىش كولەمىندەگى ايىپپۇلعا نەمەسە وسى كولەمدەگى تۇزەتۋ جۇمىستارىنا، نەمەسە ەكى جىلعا دەيىن باس بوستاندىعىنان شەكتەۋگە، نەمەسە وسىنداي مەرزىمگە باس بوستاندىعىنان ايىرۋعا كەسىلۋى مۇمكىن.

كۇدىكتى ايعاقتىق زاتتارمەن بىرگە باتىس قازاقستان وبلىسى شىڭعىرلاۋ اۋدانى بويىنشا ىشكى ىستەر بولىمىنە تاپسىرىلاتىن بولادى.

اباي-اقپارات