تۇركىمەنستان ەشقانداي اسكەري وداققا مۇشە بولمايدى
اشحابادتا تۇركىمەنستاننىڭ بەيتاراپتىق مارتەبەسىن العانىنا 20 جىل تولۋىنا بايلانىستى اقساقالدار كەڭەسى ءوتتى.
كەڭەستىڭ توراعاسى ەل پرەزيدەنتى گۋربانگۋلى بەردىمۇحاممەدوۆ سويلەگەن سوزىندە تۇركىمەنستان ەشبىر اسكەري وداقتارعا قاتىسپايتىنىن مالىمدەدى.
«تۇركىمەنستان قاتال مىندەتتەمەسى بار نەمەسە قاتىسۋشىلارعا ۇجىمدىق جاۋاپكەرشىلىك جۇكتەيتىن حالىقارالىق بىرلەستىكتەرگە مۇشە بولمايدى. تۇركىمەنستان ءوزىنىڭ اۋماعىندا شەتەل مەملەكەتتەرىنىڭ اسكەري بازاسىن ورنالاستىرمايدى. تۇركىمەنستان وزگە ەلدەرگە ەكونوميكالىق قىسىم كورسەتپەيدى جانە جاريالانعان ەكونوميكالىق وقشاۋلاۋعا قاتىسپايدى»، - دەدى تۇركىمەن پرەزيدەنتى.
بىرىككەن ۇلتتار ۇيىمىنىڭ باس اسسامبلەياسىنىڭ «تۇركىمەنستاننىڭ تۇراقتى بەيتاراپتىلىعى» جونىندەگى رەزوليۋتسياسى 1995 جىلى جەلتوقساننىڭ 12-دە قابىلداندى.
اباي-اقپارات
