«DAT» گازەتىنە (№39 (310), 12 قاراشا 2015 ج) باسىلعان جانە ۇكىمەت ۇيىنە پرەمەر-ءمينيستردىڭ ءوز اتىنا جىبەرىلگەن «قاتتى قينالايىن دەپ تۇرسىز، كاريم كاجىمكانوۆيچ!» اتتى وسى اشىق حاتتى وتكەن اپتادا «Abai.kz» اقپارتاتتىق پورتالىنا شىعارتىپ ەدىم، جوعارعى جاقتان  پارمەن بولدى ما، اشىق حاتىم سايت بەتىندە از عانا تۇرىپ ارحيۆكە "اتتانىپ" كەتتى. سوسىن، فب-داعى ءوزىمنىڭ وسى جەكە پاراقشاما ىلە قويىپ ەدىم، ۇكىمەت جاقتان بىرەۋلەر باستىعىما مازا بەرمەپتى.
ۇلكەن ەڭبەك ەتىپ، جاڭا جوبالاردى ىسكە اسىرىپ جاتقان ديرەكتورىمنىڭ ءوتىنىشىن جەرگە تاستاعىم كەلمەدى، ءوشىردىم.

قازىر باق وكىلدەرى قىراعى عوي، قازىبەك يسا اعام قاعىپ الىپ، ءوزى باسقاراتىن «قازاق ءۇنى» گازەتىنىڭ سايىتىنا سالىپ قويىپتى.
قوش دەلىك! سونداعى بار ماسەلە مەنىڭ «وھ! كارىم قاجىمقانۇلى، تۋرا وسى جەردە قاتتى اباي بولىڭىز! قۇداي اتىپ، «ەلباسىنىڭ تىكەلەي تاپسىرماسىمەن...» دەپ، ماسقارا بولىپ جۇرمەڭىز! ۇلت كوشباسشىسى ەشقاشان بۇلاي تاپسىرما بەگەن جوق!!!» دەگەن ءبىر اۋىز سوزىمدە تۇر ەكەن-مىس.

نەگىزى، قازاق كوشى شاتقاياقتاي باستاعان كۇننەن باستاپ، ۇكىمەت باسىنا ەڭ كوپ حات جازعان ادام مەنمىن. سول حاتتاردىڭ ءبارى بىردەن «قۇرمەتتى كارىم قاجىمۇحانۇلى!» دەپ ىزەتپەن، مەيىرىممەن باستالاتىن.

وكىنىشكە وراي، ءدال بۇگىنگە دەيىن سونىڭ ءبىر دە بىرەۋى ك.ءماسىموۆتىڭ قولىنا تيگەن ەمەس. ەڭ قۇرسا، ءبىر مارتە بولسا دا دۇرىس جاۋاپ السام، ارام بولسىن! كوشى-قون كوميەتىنە نە ىشكى ىستەر مينيسترلىگىنە سىرعىتادى دا وتىرادى، سىرعىتادى دا وتىرادى... سەنبەسەڭىز، مىنا سىلتەمەنى اشىپ، مەنىڭ باياعىدا جازعان «حاتتار يەسىن قاشان تابادى؟!» دەگەن ماقالامدى وقىپ كورىڭىز: http://old.abai.kz/…/auyt-mykibekyly-khattar-iesin-kashan-t…

جارايدى، مەن «قاتتى كەتىپپىن»، كارىپ ماسىموۆقا ء«تيىپ كەتەدى» ەكەن! سول ءۇشىن باستىعىمىزدىڭ ءسوزىن جەرگە قالدىرماس ءۇشىن، حاتىمىزدى ەش جەرگە جاريالاماي، ءبىر جولعا ءوشىرىپ تاستايىق. اۋىت مۇقيبەك تاعى جۇمىستان شىعىپ قالۋى، سايتتار جابىلۋى مۇمكىن! ودان نە ونەدى؟!

مىنە، 24 قاراشادا ەلباسىمىز جاڭارتىلعان كوشى-قون زاڭىنا قول قويدى. ەرتەڭ ارعى بەتتەن قاپتاپ قالىڭ قانداستارىمىز كەلەدى. قىتاي قۇزىرلى ورگاندارى ولاردىڭ قولىنا «سوتتتىلىق» تۋرالى انىقتامانى بەرمەيدى. بۇل انىق بولدى. قالىڭ قازاق تۇراقتى تىركەۋگە تۇرا الماي تاعى شۋلاعالى تۇر. جاڭا زاڭدى دايىنداعان – ۇكىمەت! 49-باپتىڭ 9)-تارماعىنا رەداكتسيانى ءوز قولىمەن ۇسىنعان – كارىم ءماسىموۆ!!

ال، سوندا وعان، ايتىڭىزشى، كىم جاۋاپ بەرەدى!؟ تاعى ەلباسى نۇرسۇلتان نازارباەۆ جازىقتى ما؟!!

مەنىڭ «قاتتى قينالايىن دەپ تۇرسىز، كاريم كاجىمكانوۆيچ!» دەگەنىم «اينالايىن» بولعالى تۇر. سەبەبى، اشىنعان قارا ورمان حالىق ۇكىمەت ءۇيىنىڭ الدىنا جينالۋى مۇمكىن! كارىم قاجىمۇحانۇلى، ءسىزدىڭ جەتى اتاڭىزدى جەزدەي قاقتاعاننىڭ كوكەسىن سوندا كورەسىز! مۇمكىن، ودان دا باتىل قادامادارعا بارۋى كادىك!

ەڭ جاقسىسى، اناۋ قوڭىراۋ شالعىشتارىڭىز شىنىمەن سىزگە جانى اشىسا; ءسىزدىڭ ابىروي-بەدەلىڭىزدى قورعاعىش بولسا، باستىسى، اقىل بىلسە; باستىقتارىما ەمەس، الدىمەن ماعان حابارلاسسىن!

اقوردادا وتىرعان قر پرەزيدەنتى كەڭسەسىنىڭ باسشىسى ماحمۇت قاسىمبەكوۆ اعامىز ۇلكەن باسىمەن مەنى ءتورت مارتە قابىلداعاندا، ءسىزدىڭ مەنى نەگە ءبىر رەت قابىلداۋعا، سويلەسۋگە قۇلقىڭىز جوق؟! تۇسىنبەيمىن! ءتىپتى، كەزەكتى ءبىر حاتىما ۇلت كوشباسشىسى نۇرسۇلتان ءابىشۇلى نازارباەۆتىڭ ءوزى ءمان بەرىپ، كەڭەسشىسى مۇحتار قۇل-مۇحامەدكە "مىنا جىگىتپەن جاقسىلاپ سويلەس!" دەپ تاپسىرما بەرىپتى. مۇحاڭ مەنى اقوردادا قابىلداپ، ەكەۋمىز تەك وسى كوشى-قون تۋرالى ءبىر جارىم ساعات سويلەستىك!

مەن سىزدەن ەشتەڭە سۇرامايمىن! تەك، قىتايدان كەلەتىن قانداستارىڭىزدى قينامايتىن ەتىپ، ىشكى ىستەر مينيسترلىگىنە «وسى ماسەلەنى نورماتيۆتىك-قۇقىقتىق قۇجاتتار ارقىلى رەتتەڭدەر» دەپ پارمەن بەرسەڭىز عانا بولعانى!

كارىم قاجىمقانۇلى!

ەسكى داۋدى بىقسىتتى دەپ، ايىپقا بۇيىرماڭىز، ءسىزدىڭ قىتايدان اتا جۇرتىنا قونىس اۋدارۋعا نيەتتى قازاقتارعا ازداپ وكپەڭىزدىڭ بار ەكەنىن مەن جاقسى بىلەم.
1995 جىلى شاۋەشەكتەن كەلگەن ورازىمباي جۇمابەكۇلى دەگەن اعامىز ءسىزدىڭ اكەڭىز قاجىمقان كوكەمىز باسقاراتىن بورالداي كىرپىش زاۋاتىنا ەكى ءجۇز مىڭ اقش دولارىن قۇيادى. ەكەۋى بىرىگىپ كاسىكەرلىكپەن اينالىسادى. بىرلەسكەن ساۋدانىڭ اياعى ۇلكەن داۋعا اينالادى. «قىتايدان كەلگەن ورالماننىڭ 200 000 اقش دوللارىن قاجىمقان ءماسىموۆ جەپ كەتىپتى!» دەگەن داقپىرت بۇكىل دۇنيەگە تارايدى. الگى داقپىرتتى الىس-جاقىن ەلدەردەگى باق تۇگەل جازادى. بۇل ماسەلەنى جارماحان تۇياقبايدىڭ پارتياسى الماتىدا وتكەن كەزەكتى ءبىر ەرەۋىلدە كوتەرەدى. سول داۋ ۇلعايا كەلە ۇلكەن ۇيگە جەتىپتى دەپ ەستىدىك. سوڭىندا ءسىزدىڭ ارالاسۋىڭىزبەن قارىزدىڭ قوماقتى بولىگى يەسىنە قايتارىلىپ، ءىس تىنعانداي بولعان ەكەن...

ارينە، ءسىز دە ەت  جۇرەكتى جانسىز. "ەردى نامىس، قوياندى قامىس ولتىرەدى" دەگەن بار، ەكى شالدىڭ تۇسىنىسپەستىگىنەن تۋىنداعان وسىناۋ كەلەڭسىز جاعدايعا بايلانىستى، وكپەڭىز بەن رەنىشىڭىز ورىندى شىعار. مەن ونى دۇرىس تۇسىنەم! بىراق، جەكە باستىڭ كيكىلجىڭى ءۇشىن بۇكىل ءبىر حالىقتىڭ جولىن بوگەۋ  - مەملەكەت جانە قوعام قايراتكەرىنە، سىزدەي بيلىك باسىنداعى ازاماتقا جاراسپايدى. قازاق مۇنداي قىلىق جاساعان ادامدى «ىنجىق» دەيدى. تۋىسقان ۇيعىر باۋىرلارىمىز  ىنجىقتاردى  ۇناتپاعاندىقتان «يجىقىز» دەپ اتايدى ەكەن. دەمەك، بىلدەي ءبىر مەملەكەتتىڭ ۇكىمەتىن باسقارىپ وتىرعان سىزدەي ءبىلىمدى جىگىتكە بۇل تىرلىك جاراسپايدى.  

ونىڭ ۇستىنە، مىناداي زاماندا شەتتەن كەلەتىن قازاقتاردان ءبىر جاپىراق انىقتاما تالاپ ەتۋ ارقىلى ەكسترەمي́زم مەن تەرروريزمنىڭ الدىن الام دەۋدىڭ ءوزى بارىپ تۇرعان دون كيحوتتىق ەمەس پە؟!!

كارىم قاجىمقانۇلى، سول اعالار ءۇشىن بىزگە شىنىمەن وكپەلەپ جۇرگەن بولساڭىز، تىزەرلەپ تۇرىپ مەن سىزدەن كەشىرىم سۇرايىن! ءسىزدىڭ قابىلداۋىڭىزدى سۇراپ، جانە حات جازىپ جىبەردىم. مەنى قابىلداڭىز! شەجىرەلەرىڭىزدەن وقىدىم، بوتەن ەمەس، ەكەۋمىز ءبىر اۋىلدىڭ بالاسى ەكەنبىز. اڭگىمەلەسسەك، سىرلاسساق، جاقسى دوس  بولىپ كەتۋىمىز ابدەن مۇمكىن. ماسەلە شەشىلمەسە، ەرتەڭ ەلباسىمىزدان ۇيات بولادى!

قاشانعى ايتىسا بەرەمىز، تۇسىنىسەيىك! حالىقتىڭ سىلەسىنەن قۇتىلىڭىز!

دوستىق، تۋىستىق جۇرەكپەن تاعى قايتالاپ ايتايىن، ءوزىڭىز قينالىپ قالاسىز عوي، كارىم اعا! قاتتى قينالاسىز!

ىزگى نيەت، زور ۇمىتپەن،

اۋىت مۇقيبەك

06.12.2015
استانا

Abai.kz