«نەمىس تولقىنىنىڭ» حابارلاۋىنشا، رف سىرتقى ىستەر ءمينيسترىنىڭ ورىنباسارى گريگوري كاراسين وسىنداي كەزدەسۋدىڭ دايىندالىپ جاتقانىن جانە وندا قاراباق ماسەلەسىن رەتتەۋ تالقىلاناتىنىن ايتقان. ونىڭ سوزىنشە، ۆەناداعى كەلىسسوزدەرگە اقش مەملەكەتتىك حاتشىسى دجون كەرري، رەسەي مەن فرانتسيا سىرتقى ىستەر مينيسترلەرى سەرگەي لاۆروۆ جانە جان-مارك ەيرو قاتىسادى.

ءۇش ديپلومات ۆەناعا سيرياداعى جاعدايدى تالقىلاۋعا كەلەدى. رەسەي، فرانتسيا جانە اقش ەقىۇ-نىڭ تاۋلى قاراباق ماسەلەسىن رەتتەۋ تۋرالى مينسكىلىك توبىنىڭ تەڭ توراعالارى بوپ تابىلادى.

مينسك توبىنىڭ 12 مامىردا جاريالانعان مالىمدەمەسىندە ءۇش ەلدىڭ سىرتقى ىستەر باسشىلارىنىڭ ارمەنيا مەن ءازىربايجان اراسىنداعى ءوزارا سەنىمدى الپىنا كەلتىرەتىن جانە وق اتۋدى توقتاتۋدى كوزدەيتىن كەزدەسۋدى ۇيىمداستىرۋعا اتسالىسۋعا دايىن ەكەنى تۋرالى ايتىلدى. قۇجاتتا قاراباق ماسەلەسىن اسكەري ادىسپەن شەشۋ جولىنىڭ جوقتىعى جايلى جانە زورلىق-زومبىلىق تىيىلماسا كەلىسسوزدەردەن ناتيجە بولمايتىنى تۋرالى جازىلعان.