رەسەيلىك «لەۆادا تسەنتر» زەرتتەۋ ورتالىعىنىڭ جۇرگىزگەن ساۋالناماسىنىڭ قورىتىندىلارىنا سايكەس، رف حالقىنىڭ جارتىسىنان كوبى «كسرو-نىڭ» قايتا قۇرىلۋىن قالايتىن بولىپ شىقتى.

اتالمىش ورتالىق بۇنداي ساۋالنامانى  2016 جىلدىڭ 25-28 ناۋرىز ارالىعىندا جۇرگىزگەن. ساۋالناماعا 18 جاستان اسقان رەسەيلىكتەر عانا قاتىسىپتى. رەسەيدىڭ 48 ايماعى مەن 137 ەلدى-مەكەنىندە جۇرگىزىلگەن ساۋالنامانىڭ ناتيجەسىندە رەسپوندەنتتەردىڭ 58 پايىزدان استامى كەڭەس وداعىنىڭ قايتا قۇرىلۋىن قوس قولمەن قولداپ، ارماندايدى ەكەن.

ساۋالناماعا قاتىسۋشىلاردىڭ قالعان 31 پايىزى قىلىشىنان قان تامىزعان «قىزىل يمپەريانىڭ» قايتا تۇلەۋىنە ءۇزىلدى-كەسىلدى قارسى. اتالمىش ساۋالناما بارىسىندا اۋىلدىق جانە اۋداندىق رەسپوندەنتەردىڭ 44 پايىزى بۇرىنعى ستاليندىك جۇيەنى ەندى قايتا جانداندىرۋ مۇمكىن ەمەس ەكەندىگىن ايتسا، تۇرعىنداردىڭ 56 پايىزى «كسرو-نىڭ» كۇيرەۋىنە وكىنەتىندىكتەرىن بىلدىرگەن.

ساۋالناما ناتيجەسىندە بار بولعانى 28 پايىز تۇرعىندار «كەڭەس وكىمەتىنىڭ» قيراۋىنا قۋاناتىندىقتارىن جەتكىزگەن ەكەن.

«لەۆادا تسەنتر» دەرەكتەرىنە سۇيەنسەك، 2009 جىلمەن سالىستىرعاندا ەسەيلىكتەر ساپىندا «سوتسياليستىك» جۇيەنى اڭسايتىندار سانى ەداۋىر ارتقان. تاعى 51 پايىز رەسپوندەنتتەر كەڭەستىك جۇيەنى قۇلاتپاي، ساقتاپ قالۋعا بولاتىنىن ايتىپتى.

بيىل ءبىزدىڭ ەلىمىز ەگەمەندىكتىڭ 25 جىلىن تويلايدى. از ۋاقىت ەمەس، تەگىندە.  ارينە، تاريح ءۇشىن قاس-قاعىم ءسات، بىراق ادام عۇمىرى ءۇشىن ءبىر ۇرپاقتىڭ ەسەيىپ، وتاۋ قۇراتىن شاعى.

«كەلمەسكە كەتكەن كسرو-نىڭ» ءوزى تۇگىلى بۇگىندە قازاق جۋرناليستەرى وسى تىركەستىڭ ءوزىن ۇمىتا باستاعان. تىلدىك قولدانىسىنان شىعىپ بارادى دەيمىز-اۋ، الابوتەن ويى بار ادام بولماسا، تاۋەلسىزدىگىمىزدى ءبولىپ العان كسرو-نى كىم ەسكە العىسى كەلەر دەيسىز؟! بىراق...

بىراق، سول كسرو-نىڭ اتىن اتاۋ بىلاي تۇرسىن، تۋىن جالاۋلاتىپ جۇرگەندەر جەتەدى بىزدە. ەرتەڭگى كەلەتىن جەڭىس كۇنىندە گيورگيەۆ لەنتاسىن تاعىپ، تاراتۋشىلاردىڭ اراسىنان قىزىل تۋدى قايتا كوتەرىپ شىعاتىندار دا تابىلادى. كسرو-نىڭ قىزىل تۋى جۇرگەن جەردە رەسەيدىڭ الا تۋى دا قاسىندا ەرە جۇرەتىنى ادەتكە اينالعالى قاشان. تاۋەلسىزدىڭتىك ءتاتتى ءيسى تاناۋىنا بارمايتىن، كەسىرلى كەر قوعامدى ىنتا-شىنتاسىمەن قالايتىن «شوۆينيستەر» تۋرالى وسىعان دەيىن جازدىق. الەۋمەتتىك جەلىلەر مەن كەيبىر ء«پۋتينشىل» باق-تاردا قازاق قوعامىنىڭ ورتاسىنا ىرىتكى سالىپ وتىراتىن تايشىبەكوۆ سەكىلدىلەردىڭ ءبىرسىپىراسىن «Abai.kz» پورتالىندا اتتارىن اتاپ، تۇستەرىن تۇستەپ كورسەتتىك تە.

وكىنىشكە وراي قۇداي قوسقان كورشىمىزگە قوقىمداي ارام پيعىلىمىز جوق. قوس بىردەي وداققا مۇشەمىز. گەوساياسي جاعدايلارعا بايلانىستى رەسەيمەن ينتەگراتسيا جاساپ، سەرىكتەسىپ وتىرعان جاعدايىمىز تاعى بار. دەسەك تە، سولتۇستىكتەگى كورشىلەردىڭ قالاۋى گەوساسي ءام ەكونوميكالىق ينتەگراتسيا ەمەس، «كسرو-نى» قايتا قۇرۋ بولىپ شىقتى. «ورىستان دوسىڭ بولسا،  ايبالتاڭ قاسىڭدا بولسىن» دەگەن بابالار ءسوزىنىڭ جانى بار بۇگىندە. ايتپەگەندە، «كسرو-نى» كوكسەيتىندەردىڭ كورشىلەرىنە نە ىستەپ جاتقانىن كورىپ-ءبىلىپ جۇرگەن بولارسىز. گرۋزيا، ۋكراينا... كەلەسى كىم؟

نۇرگەلدى ابدىعانيۇلى

Abai.kz