جۋرناليست دينارا مىڭجاسارقىزى نۇرجان تولەنديەۆتىڭ "جيىرمادان اسىپ بارامىن" ءانىن سىنعا الدى،-دەپ جازادى baistars.kz.  ازىلكەش «جيىرمادان اسىپ بارامىن» دەگەن ءان شىعارىپ، ولەڭ سوزدەرىنە

"…بىلمەسەك تە مىنا ءومىردىڭ

قىر-سىرىن انىق،

قۋ تىرشىلىك جاساپ ءجۇرمىز

قۇلشىنىپ الىپ.

قايتىپ كەلمەس جيىرمام-اۋ

سەنى ساعىنسام،

وسى ءانىمدى ءبىر شىرقارمىن

كۇرسىنىپ الىپ.

امالىم بار ما، امالىم

سولاي دا سولاي كاراعىم،

مۇقاعاليىم ايتقانداي،

جيىرمادان دا اسىپ بارامىن.

امالىم بار ما، امالىم،

سولاي دا سولاي قاراعىم.

مۇقاعاليىم ايتقانداي، جيىرمادان دا اسىپ بارامىن" - دەپ مۇقاعالي ماقاتاەۆتى قوسقان. ءجۋرناليستىڭ پىكىرىنشە، اقيىق اقىننىڭ سوزدەرىن وزگەرتۋگە ەشكىمنىڭ قۇقىعى جوق. "ال، اقىننىڭ تاسقا باسىلعان ءسوزىن وزگەرتۋگە كىمنىڭ قۇقى بار؟ اقىننىڭ ءار ولەڭى – تاريح. سول زاماننىڭ بەت-بەينەسى. اقىننىڭ تاپ سول مەزەتتەگى ىشكى كۇيى. وعان ءوز جانىمىزدان تۇزەتۋ ەنگىزۋگە بولا ما؟ جوق. بىراق نۇرجان تولەنديەۆ «وتىزدان اسىپ بارامىن» دەگەندى «جيىرمادان اسىپ بارامىن» دەپ نەگە انگە قوسىپ ءجۇر؟! بۇرىن-سوڭدى «وتىزدان اسىپ بارامىن» دەگەندى قۇلاعىنا سىڭىرگەن جىر سۇيەر قاۋىم «بۇل قالاي؟» دەپ اڭ-تاڭ كۇيدە. سوندا اقىننىڭ ولەڭ جولىنداعى ءار قازاققا ءسىڭىسىپ كەتكەن ءسوز تىركەسىن بۇرمالاۋ كىمگە ابىروي اپەرمەك؟"-دەپ جازدى د. مىڭجاسارقىزى.

سونداي-اق، جۋرناليست "وتىزدان اسىپ بارامىن" ولەڭىندەگى فيلوسوفيالىق ويعا توقتالىپ، نۇرجان تولەنديەۆتىڭ ءانىنىڭ سوزىندەگى "جيىرمادان اسىپ بارامىن" دەگەن ءسوزدى مۇقاعالي ايتتى دەپ جاستاردى شاتىستىراتىنىنا رەنجىدى. "شىن مانىندە، اقيىق اقىن مۇقاعالي ماقاتاەۆتىڭ «وتىزدان اسىپ بارامىن» اتتى ولەڭىن بىلمەيتىن ادام جوق. وعان ءتىپتى ءان دە ارنالدى. اقىننىڭ بۇل ولەڭىندە تولعانىس پەن تەبىرەنىس جاتىر. ءومىر اتتى وزەننىڭ ساعىمداي وتە شىعاتىنىنا ىشتەي قىنجىلاتىن فيلوسوفيالىق وي بار. ءتىپتى، بۇل ولەڭ اقىننىڭ وتىزدان اسقان شاعىن كوز الدىڭىزعا اكەلەدى. ءارى-بەرىدەن سوڭ، «مۇقاعالي ايتقانداي» دەيتىن، ونىڭ ولەڭىندە «جيىرمادان اسىپ بارامىن» دەگەن ولەڭ جولى مۇلدەم جوق قوي. مۇنىڭ استارىندا نە جاتىر؟ اقىننىڭ پوەزياسىمەن ءالى تانىسا قويماعان جاستاردى اداستىرمايمىز با؟ ەرتەڭگى كۇنى مۇقاعاليدىڭ ولەڭدەرىن وقىماعان جاس­تار «ە-ە، اقىن «جيىرمادان اسىپ بارامىن» دەپ جىرعا قوسقان ەكەن» دەسە، كىم كىنالى؟"- دەپ اشىنا جازدى جۋرناليست.

ءسوز سوڭىندا د.مىڭجاسارقىزى اقىنداردىڭ ءسوزىن اركىم قالاۋىنشا وزگەرتىپ ءان شىعارماۋعا كەڭەس بەردى. "بۇگىن نۇرجان تولەنديەۆ، ەرتەڭ باسقا ءانشى كەز كەلگەن اقىننىڭ ولەڭىن ءوز قالاۋىنشا وزگەرتىپ السا، نە بولماق؟ بۇعان كىم توسقاۋىل قويادى؟ بالكىم، ء«وزى جوقتىڭ كوزى جوق» دەيتىن شىعار. الايدا ءار نارسەنىڭ ارتىندا سۇراۋى بار. وسىدان بالەنباي جىل بۇرىن ومىردەن وزعان اقىننىڭ ارۋاعى اتىپ جۇرمەسىن، اباي بولايىق!"-دەپ جازدى ءتىلشى.

مۇقاعالي ماقاتاەۆ "وتىزدان اسىپ بارامىن"

سۇقتانىپ تۇرىپ جانارىڭ،

سۇرىما نەگە قارادىڭ؟

سولاي دا، سولاي، قاراعىم،

وتىزدان اسىپ بارامىن.

شاشىمنىڭ ساناپ ءار اعىن،

تاڭىرقاي بەرمە، قاراعىم.

ساناۋلى باسقان ءار ادىم،

وتىزدان اسىپ بارامىن.

بەلگىسى تۇر ما اعانىڭ،

بەتىمە نەگە قارادىڭ؟

باقىتىن تىلەپ بالانىڭ،

وتىزدان اسىپ بارامىن.

قۋانىپ كەيدە قالامىن،

قۋارىپ كەيدە قالامىن.

اتتانعان اتا-انانىڭ

ارتىنان قۋىپ بارامىن.

ءازىلىڭ قايدا، قاراعىم،

اجىمگە نەسىن قارادىڭ؟

ارتىمدا قالىپ الارىم،

وتىزدان اسىپ بارامىن.

نۇرجان تولەنديەۆتىڭ ورىنداۋىنداعى "جيىرمادان اسىپ بارامىن" ءانى

Abai.kz