مادەنيەت جانە سپورت ءمينيسترى جالاڭاش تۇسكەن قازاقستاندىق جەڭىل اتلەت قىزدىڭ سۋرەتىنە تۇسىنىكتەمە بەردى،- دەپ جازادى stan.kz تورابى.

“مەنىمشە ول ءوزىن-ءوزى كورسەتكىسى كەلگەن سياقتى. ەگەر، مىسالى ءدال سولاي ولگا رىپاكوۆا سۋرەتكە تۇسسە، وندا قوعام دۇرلىگىپ قابىلداۋشى ەدى. بىراق، وليمپياداعا دايىندالىپ جاتقان سپورتشىلاردىڭ سۋرەتكە تۇسۋگە ۋاقىتتارى جوق. ولار شىنى كەرەك قالجىراپ كەلىپ توسەككە قۇلايدى، ال تاڭەرتەڭ قايتادان جاتتىعۋعا كەتەدى. مۇنداي جالاڭاش قىزداردىڭ ءوزىن-ءوزى جارنامالاۋى، تەك نازاردى وزدەرىنە اۋدارتۋ عانا”، – دەيدى مينيستر.

مينيستر، سپورتشى قىزدىڭ ءوزى قازىر دۇرىس ارەكەت جاساماعانىن تۇسىنگەن شىعار دەپ اتاپ ءوتتى.

“بىراق، ءوز ماقساتىنا جەتتى: ءوزىنىڭ سۇلۋ دەنەسىن كورسەتكىسى كەلگەن شىعار، وعان تىيىم سالا المايسىڭ عوي”، – دەدى ارىستانبەك مۇحامەديۇلى.

ەسكە سالا كەتسەك، بىرنەشە كۇن بۇرىن قازاقستاندىق جەڭىل اتلەت تاتيانا كوربالينانىڭ جەلىدە تىر جالاڭاش تۇسكەن سۋرەتتەرى جاريالانعان ەدى. تاتيانانىڭ ءوزى وسىلاي سۋرەتكە ءتۇسۋ ارقىلى، جۇرتتىڭ نازارىن جەڭىل اتلەتيكاعا قاراي بۇرعىم كەلدى دەگەن بولاتىن. ونىڭ ءوزى سپورتتىق عۇمىرىن ەرتە باستاعانىمەن، جاراقاتىنا بايلانىستى قول ءۇزىپ قالعان.

ال ماجىلىستەگى سپورتشى دەپۋتات ولگا شيشيگينا حانىم بولسا، جاس اتلەتتىڭ باستاماسىن قولداپتى. ءتىپتى، پارلامەنتتە سپوتشىلاردىڭ ماسەلەسىنە وزگەلەردىڭ نازارىن اۋدارتۋ ءۇشىن، ماجىلىستە "شەشىنۋگە" بارمىن دەپتى.

تاعى دا ءبىر قازاقستاندىق جەڭىل اتلەت ولگا رىپاكوۆا ءوزىنىڭ ارىپتەسىنىڭ بۇل ارەكەتىن ەرسى دەپ سانايدى ەكەن.

سونداي-اق، تاتيانانىڭ تىر جالاڭاش سۋرەتى پالۋان يسلام بايرامۋكوۆتىڭ اشۋىن تۋعىزعان. 

Abai.kz