بۇگىن قر پارلامەنتىنىڭ تومەنگى پالاتاسى قازاق جەرىن اۋكتسيون ارقىلى ساۋداعا سالۋ تۋرالى زاڭ جوباسىن تالقىعا سالىپتى. «Abai.kz» پورتالى باس بولىپ، كۇن تارتىبىنە شىعارىپ، الەۋمەتتىك جەلىلەردە قىزۋ پىكىر-تالاس ءجۇرىپ، حالىقتىڭ نارازىلىعىن تۋدىرعان ۇلتتىق ەكونوميكا ءمينيسترى ەربولات دوساەۆتىڭ بۇل ۇسىنىسىنا كۇللى قازاق جۇرتشىلىعى قارسىلىق ءبىلدىرىپ جاتىر. ۇلت زيالىلارى، قوعام قايراتكەرلەرى، ساياساتكەرلەر مەن باق وكىلدەرى كۇيىنىپ، پرەزيدەنت نۇرسۇلتان نازارباەۆتان اراشا سۇراپ، ۇندەۋ جولدادى. جەردى ساتۋعا جول بەرمەۋ كەرەك ەكەندىگىن ايتتى.  بۇل تۋرالى «Abai.kz» پورتالىندا كۇن سايىن ماقالالار جاريالانىپ وتىردى.

ال بۇگىن جاڭا سايلانعان دەپۋتاتتار جەردى اۋكتسيون ارقىلى جارتى باعاسىنا ساتىپ جىبەرۋ تۋرالى ماسەلەگە ورە-تۇرەگەلىپ، قارسىلىق تانىتۋى كەرەك پە ەدى، ەگەر ءۇش پارتيالى پارلامەنت بۇقارانىڭ بازىناسىنا قۇلاق تۇرسە...

الايدا دەپۋتاتتار دەم شىعارماپتى. جالعىز عانا حالىقتىق كوممۋنيستىك پارتيا جەتەكشىسى ۆلاديسلاۆ كوسارەۆ وسى جەرلەردى لاتيفۋنديستەردىڭ مەنشىگىنە بەرۋگە قارسى بولىپ، قر پرەمەر-مينيستر كارىم ماسىموۆكە دەپۋتاتتىق ساۋال جولداعان.

وسىدان سوڭ، ءبىز قر پارلامەنتى ءماجىلىسىنىڭ ءباسپاسوز قىزمەتىنە حابارلاستىق. (دوسجان ساۋلە ماعازبەكقىزى جانە باپاكوۆا ساۋلە تالعاتبەكقىزى دەپ كورسەتىلگەن – رەد.) ءماجىلىستىڭ ءباسپاسوز قىزمەتى تەلەفون كوتەرمەگەن سوڭ، دەپۋتاتتىق ساۋالدىڭ اۆتورى – حالىقتىق كوممۋنيستىك پارتيانىڭ جەتەكشىسى ۆلاديسلاۆ كوسارەۆقا حابارلاستىق. (ارى قاراي ديولوگ – رەد.)

- اللو، بۇل دەپۋتات ۆلاديسلاۆ كوسارەۆ پە ەكەن؟

- ءيا ءدال ءوزىمىن.

- مەن جۋرناليست نۇرگەلدى ابدىعانيۇلى بولامىن، «Abai.kz» سايتىنان... بۇگىنگى ءماجىلىس وتىرىسىنداعى ءسىزدىڭ دەپۋتاتتىق ساۋالىڭىز جايلى سۇرايىن دەپ ەدىم...

- ءيا، ماعان سەن تۋرالى ايتقان، براتيشكا. نە بولدى، مىنالار سەنىڭ جەرىڭدى تارتىپ الايىن دەپ جاتىر ما (كۇلدى)...

- ماسەلە جالعىز مەنىڭ جەرىم تۋرالى ەمەس قوي...

- جاقسى، ءتۇسىندىم. بۇگىن مەن جەردى اۋكتسيونعا قويىپ ساتۋ دەگەنگە قارسىلىق كورسەتتىم. وكىنىشكە وراي، جالعىزبىن. دەسە دە، مۇنداي قارا پيعىلدى ارەكەتتى قولداي المايمىن.

- نەگە ەندى عانا قارسى بولىپ جاتىرسىز؟ بۇل ماسەلە كوتەرىلىپ كەلە جاتقانىنا ءبىراز ۋاقىت بولدى عوي.

- دۇرىس ايتاسىڭ. مەن بىلتىرعى جىلدىڭ ماۋسىم ايىندا وسى جەردى ساتۋ تۋرالى ماسەلە كوتەرگەندە ءوز قارسىلىعىمدى ايتقان بولاتىنمىن. سول كەزدە ۇكىمەتكە دەپۋتاتتىق ساۋال جولدادىم.

- دوساەۆ مىرزا ۇكىمەتتىڭ داعدارىستان شىعۋىنىڭ جالعىز جولى وسى دەپ وتىر عوي...

- ەتو ۆسە چەپۋحا! تىعىرىقتان شىعۋ ەمەس، جەكەلەگەن مۇددەلەردىڭ پايداسىن ەسەلەۋ عانا. ۇكىمەت بيىل شىلدەدە 1,7 ميليون گەكتار جەردى ساۋداعا شىعارۋدى كوزدەپ وتىر. بۇنىمەن اياقتالمايدى. وسىدان كەيىن تاعى اۋىلشارۋاشىلىق ماقساتتارىنا تيەسىلى 7,4 ميلليون گەكتاردى ساتپاقشى. قازاقستان ۇكىمەتى نارىقتىق ليبەرالدى قاتىناستاردى اۋىلشارۋاشىلىق جەرلەرىن اۋكتسيوندا جەڭىلدىكپەن ساتۋ ارقىلى ودان ءارى تەرەڭدەتۋگە تىرىسۋدا. مۇنىڭ ارتىندا پايدا تابۋ مۇددەسى تۇرعانىن تۇسىنەمىز. ءبىز، كوممۋنيست-دەپۋتاتتار، ۇكىمەتتى جەر ماسەلەسىنە قاتىستى ۇستانىمىن قايتا قاراۋعا شاقىرامىز.

- ءسىزدى وزگە ارىپتەستەرىڭىز قولدامادى ما؟

- بۇل جالعىز مەنىڭ ءسوزىم ەمەس. فراكتسيانىڭ ءۇنى. ال وزگە پارتيالارداعى ارىپتەستەرىم ءوز ساياسي ۇستانىمدارىنا سايكەس، وزدەرىن ءتيىستى دەڭگەيدە ۇستاي ءبىلدى.

- سوندا قالاي؟

- ءماجىلىس وتىرىسى اياقتالعان سوڭ، ءبارى كەلىپ، مەنىڭ قولىمدى قىسىپ، ارقامنان قاعىپ، قولداۋ ءبىلدىردى.

- تۇسىنىكتى، ۋاقىت ءبولىپ سۇحبات بەرگەنىڭىزگە راحمەت.

- جاقسى... 

وسىدان كەيىن ءبىز تىكەلەي جەر ماسەلەسىمەن اينالىساتىن ءماجىلىستىڭ اگرارلىق ماسەلەلەر كوميتەتىنە حابارلاستىق. قابىلداۋ بولمەسىندەگى حاتشى قىز ءبىزدى اتالعان كوميتەتكە مۇشە امانگەلدى داۋرەنباەۆ مىرزامەن بايلانىستىردى.

تەلەفون ارقىلى سۇراعىمىزدى قويىپ، پىكىر سۇراعان ەدىك، جاپ-جاڭا دەپۋتات: ء«دال وسى ماسەلەگە قاتىستى ەشتەڭە ايتا المايمىن، رەنجىمەشى باۋىرىم...», - دەپ قىسقا قايىردى.

بەكبولات تىلەۋحان، باقىتبەك سماعۇل، نۇرتاي سابيليانوۆ سەكىلدى جۇرت وزىنە جاقىن كورەتىن ماجىلىسمەندەردىڭ تەلەفوندارى بايلانىس اياسىنان تىس جەردە بولدى. الداعى ۋاقىتتا دەپۋتات مىرزالاردىڭ جەر ماسەلەسىنە قاتىستى پىكىرلەرىن جاريالايتىن بولامىز.

ءتۇيىن

ءبىز بۇل ارادا  ماجىلىستەگى ءبىر پارتيانىڭ بەدەلىن اسىرىپ، بىرەۋىن كەمسىتۋدى ماقسات تۇتىپ وتىرعانىمىز جوق. بولعان وقيعانى بولعان كۇيىندە بەردىك. 107 دەپۋتاتتىڭ اراسىنان جەرگە اراشا تۇسەر ءبىر جاننىڭ تابىلماۋى وكىنىشتى-اق. سوندا، جوعارىداعى اتى اتالعان دەپۋتاتتار ماجىلىستە كوممۋنيست ۆلاديسلاۆ كوسارەۆتىڭ قولىن قىسىپ، ارقاسىنان قاعۋ ءۇشىن عانا وتىر ما؟!.

نۇرگەلدى ابدىعانيۇلى

Abai.kz