كەدەن وداعىنا مۇشە بولعالى كوپتەن كۇتكەن جاقسىلىقتارمەن بىرگە سان سوقتىرار جاماندىقتاردىڭ كوشى دە ىلەسىپ كەلدى.

سولاردىڭ ىشىندە قاراپايىم ادامداردىڭ دەنساۋلىعى مەن قاراجات قۇرتاتىن، جۇيكەسىن توزدىراتىن الاياقتاردىڭ قۇرعان تۇزاقتارى بىزگە دە جەتتى.

ينتەرنەت جەلىسىندە وتە كوپ جارنامالاناتىن كەز-كەلگەن تاۋاردى الاياقتاردىڭ ءونىمى دەسە بولادى. اسىرەسە ءدارى-دارمەكتەر مەن كوسمەتيكا. جاقىندا عانا جۇرەك، قان تامىرلارى اۋرۋلارىنا ەم بولادى دەپ اتىشۋلى سالتانات بايقوشقاروۆانىڭ اتىنان سۇحبات جاساپ، NormaLife ءدارىسىن جارنامالاعان بولاتىن. قۇرمەتتى دارىگەر سالتانات بايقوشقاروۆا وسى وتىرىك جارناماعا جانى كۇيىپ دەنساۋلىق ساقتاۋ مينيسترلىگىنىڭ سايتى ارقىلى حالىققا ۇندەۋ جازدى. «اتالمىش ءدارىنىڭ دەنساۋلىققا زيانى بولماسا، پايداسى جوق، الاياقتاردىڭ الداۋىنا ءتۇسىپ قالماڭىزدار» دەپ شاقىرعان بولاتىن. ال الاياقتاردى جازالاۋ مۇمكىن بولماي وتىر.

ولاردى عالامتوردىڭ ەشقانداي بۇرىشىنان ۇستاپ الارلىق قاۋقار جوق. كەرسىنشە، وسىعان ۇقساس پايداسىز تاۋارلارىن جارنامالاپ قايتا-قايتا قاراپايىم ادامدارعا تۇزاق قۇرۋدا. NormaLife, Intoxic تاعى وسىعان ۇقساس دارىلەردىڭ جانە ت.ب. جارناماسىن كورە قالساڭىز، تاپسىرىس بەرۋگە اسىقپاڭىز. ءسىز قاراجاتىڭىزدى الاياقتاردىڭ قالتاسىنا سالىپ بەرۋىڭىز ابدەن مۇمكىن. ال قولىڭىزعا تيگەن ءدارىنىڭ ەش پايداسى جوق بولادى.

كەدەن وداعى اشىلعالى رەسەيدە بەلەڭ العان الاياقتىق قازاقستانعا اعىلدى. اۆتوكولىك، تەحنيكا، ءدارى-دارمەك، تاعى سول سياقتى قاجەتىن الۋعا رەسەيمەن بايلانىسقان كوپتەگەن ازاماتتارىمىز قالتالارى قاعىلىپ كەلگەندەرى جاسىرىن جايت ەمەس. بۇگىنگى تاڭدا رەسەي ەل ىشىندەگى الاياقتىق قىلمىستارمەن الەمنىڭ الدىڭعى قاتارىندا تۇر. قارا دەلدال (چەرنىي رەالتەر), سۇر دەلدال (سەرىي ديللەر), قانىشەر كوللەكتور دەگەن سياقتى وزدەرىنىڭ قالىپتاسىپ قالعان تەرميندەرى دە بار.

ەڭ ءبىرىنشى بەلگىسى، ولار ءسىزدىڭ تەلەفونىڭىزعا وزدەرى قوڭىراۋ شالادى. ءسىز ءوزىڭىزدىڭ تەلەفون ءنومىرىنىڭىزدى ولاردىڭ ينتەرنەتتەگى سايتىنا جازىپ قالدىراسىز. ال ءسىز ولاردىڭ تەلەفون نومىرلەرىنە تۇسە قويۋىڭىز ەكىتالاي. سىزگە وزدەرى حابارلاسىپ، ءتىپتى دارىگەرلىك كەڭەس بەرىپ، سونشالىق بيازى اڭگىمەدەن كەيىن ءاپ-ساتتە قۇرباندىققا اينالىپ كەتە باراسىز. ار جاعىنان كەڭسەدە وتىرعان بىلىكتى دارىگەردىڭ كەڭەسىن الدىم دەپ ويلاپ قالۋىڭىز عاجاپ ەمەس.

قۇرمەتتى وتانداستار، وزىمىزگە بارىنشا بەرىك بولماساق، الاياقتاردى ۇستاپ تۇزاقتايدى دەۋگە ءۇمىت جوق. اباي بولىڭىز!

گۇلجان ىزتاەۆا

Abai.kz