جاقىندا قازاقستاننىڭ مادەنيەت جانە سپورت ءمينيسترى ارىستانبەك ءمۇحاماديۇلىنىڭ ءبىر بۇيرىقتان 53 قاتە جىبەرگەندىگى تۋرالى جازعان بولاتىنبىز. بۇل اقپارات الەۋمەتتىك جەلى مەن قازاقستاندىق بۇقارالىق اقپارات قۇرالدارىنا تەگىس تاراپ، ءدۇيىم جۇرت ارىستانبەك مىرزانى «اعاش اتقا تەرىس وتىرعىزىپ»، سىباعان-تىن.

ەندى مادەنيەت ءام سپورت ءمينيسترى بۇيرىقتاعى قاتەنى قالاي جىبەرگەندىگىن Tengrinews.kz تىلشىسىنە ءتۇسىندىرىپ بەرىپتى.

«ول جەردە تاپ-تازا تەحنيكالىق قاتەلىك كەتكەن. ول قۇجاتتاردىڭ ءتۇپ-نۇسقاسىندا قاتەلىكتەر مۇلدە جوق. مىسالى، ول قۇجاتتاردى كومپيۋتەرگە سالعاندا قازاق تىلىندەگى «ق» ءارىپى قۇيرىقسىز – «ك» بولىپ كورىنەدى. ال ء«ا» ءارىپى «ا» بولىپ كورىنەدى. «ادىلەت» باعدارلاماسىندا مۇنداي قاتەلىكتەر ءجيى جىبەرىلەدى. سوعان قاراعاندا ولاردىڭ كومپيۋتەرلەرىندە اقاۋ بولۋى مۇمكىن. ماعان قازىر سول قۇجاتتاردىڭ ءتۇپ-نۇسقاسىن الىپ كەلدى. «ادىلەت» باعدارلاماسى كورسەتكەن ول قۇجاتتارمەن سالىستىرىپ قاراسام، ءتۇپ-نۇسقادا ەشقانداي قاتەلىكتەر جوق. مەن ءوزىم قازاق ءتىلىنىڭ ورفوگرافياسىنا ءجىتى نازار اۋدارامىن جانە مۇنداي ورەسكەل قاتەلىكتەردى بولدىرماۋ ءۇشىن قىزمەت ەتەمىن»،-دەيدى مينيستر مىرزا.

سونداي-اق، مادەنيەت ءمينيسترى مۇقيات قاراپ، قاتەسىن تاۋىپ العان جۋرناليستەرگە دە العىسىن ايتىپتى. 

ء«بىز وسىنداي جاعدايلارعا الاڭداپ، مۇقيات قاداعالاپ وتىراتىن قىراعى جۋرناليستەرگە العىس ايتامىز. سەبەبى، وسىنداي جاعدايلاردان كەيىن ءبىز ءاربىر ىسىمىزگە مۇقيات بولۋعا ۇمتىلامىز. بۇل وتە دۇرىس. نەگىزى قاربالاسىپ ءجۇرىپ، كەي دۇنيەلەرگە ءمان بەرمەي جاتامىز. سوندىقتان وسىنداي جاعدايلار بولىپ قالادى. جۋرناليستەر بار كەزدە ءبىز دە ءوز ىسىمىزگە ودان ءارى قىراعى بولۋىمىز كەرەك»،-دەپ جاتىر ارىستانبەك ءمۇحاماديۇلى.

نۇرزات توعجان

Abai.kz