گرەكيا بيلىگى حالىقارالىق ۆاليۋتا قورىنىڭ باسشىلىعىنان قوردىڭ جوعارى لاۋازىمدى باسشىلارىنىڭ كوپشىلىككە ءمالىم بولعان تەلەفونمەن سويلەسكەن سوزدەرىنە بايلانىستى تۇسىنىكتەمە بەرۋدى تالاپ ەتۋدە.

Wikileaks سايتىندا جاريا بولعان مالىمەتكە سايكەس، تەلەفونمەن اڭگىمە بارىسىندا افيناعا ءارى قاراي كومەك كورسەتۋگە قاتىستى كەلىسىمگە تەزىرەك كەلۋ ءۇشىن گرەكيا، گەرمانيا جانە ەۋرووداققا قىسىم جاساۋ جولدارى ءسوز بولعان.

19 ناۋرىزدا بولعان اڭگىمەگە قاتىسقانداردىڭ ءبىرى شەشىم قابىلداۋدى جەدەلدەتۋ ءۇشىن داعدارىس جاعدايىن قالىپتاستىرۋ قاجەت بولۋى مۇمكىن ەكەنىن ايتقان.

گرەكيا مەن گەرمانيا، ەو جانە حۆق سەكىلدى وعان قارىز بەرەتىن ەلدەر اراسىنداعى كەلىسسوزدەر كەلەسى اپتادا وتەدى دەپ جوسپارلانعان. بىلتىر گرەكيا ۇكىمەتى بانكروتتىقتان قۇتىلۋ ءارى ەۋروايماقتا قالۋ ماقساتىندا حۆق مەن ەو-تان الاتىن ميللياردتاعان قارجىلاي كومەكتىڭ قايتارىمى رەتىندە ەل ءۇشىن اۋىر ءارى ءىرى رەفورمالاردى وتكىزۋگە كەلىسكەن بولاتىن.

Abai.kz