نەمەسە

قاھارمان گەنارالدىڭ قايسار جارى

نازارلارىڭىزعا ۇسىنىلىپ وتىرعان سۋرەتتە كەڭەستەر وداعىنىڭ باتىرى، داڭقتى قولباسشى، گەنەرال سابىر راقىموۆتىڭ اياۋلى جارى قۇرالاي اپايدىڭ قازاق راديوسىنىڭ سول كەزدەگى وڭتۇستىك قازاقستان وبلىسىنداعى مەنشىكتى ءتىلشىسى قالىبەك اتجانعا سۇبحات بەرىپ تۇرعان ءساتى. وزاعاڭدار وزدەرىنە بۇرا تارتىپ يەمدەنىپ كەتكەن قازاقتىڭ قاھارمان ۇلىن بۇۇ-عا دەيىن حات جازىپ، بۇلتارتپاس دالەلدەرمەن ناقتىلاپ، رەسمي تۇردە ءوز حالقىمەن قايتا قاۋىشتىرعان ناعىز باتىر اپامىز وسى كىسى.

"باتىردىڭ ۇلتى جايلى ىزدەنۋدى دوعارساڭىز، بارلىق جاعدايىڭىزدى جاسايمىز" دەگەن بيلىك ۇسىنىسى ونى رايىنان قايتارا المادى. الا تاقيالى اعايىننىڭ كۇللى سىي-سياپات، قامقورلىق قۇرمەتىنەن باس تارتىپ، ۇلتتىق مۇددەنى بارىنەن دە جوعارى قويا بىلگەن قازاقتىڭ قايسار قىزىنىڭ ەرلىگى قاشان دا ەل ەسىنەن شىقپاۋى ءتيىس. ونىڭ وزبەك ۇكىمەتى ۇسىنعان اتاق-ماراپاتتى مانسۇق ەتىپ، اقيقاتتىڭ اق جولىن تاڭداۋىن ءوز حالقىن شىنايى ءسۇيۋدىڭ ۇرپاقتان ۇرپاققا مۇرا بولار ناعىز پاتريوتتىق ۇلگى- ونەگەسى دەپ ۇققان ءجون.

ايتپاقشى، قۇرالاي ناتۋللاەۆا حالقىمىزعا ەسىمى ازامات سوعىسىنىڭ تاريحىنان كەڭىنەن ءمالىم ءالىبي جانكەلديننىڭ قىزى. اپايدىڭ ءوزى دە سابىر راقىموۆتىڭ سەنىمدى سەرىگى، ادال جارى رەتىندە سوعىستىڭ باسىنان اياعىنا دەيىن قاتىسقان. ايگىلى قولباسشىنىڭ دۆيزياسىنداعى دارىگەرلىك بولىمدە اسكەري قىزمەت اتقارىپ، تالاي جارالى جاۋىنگەرلەردى اجال تىرناعىنان اراشالاپ امان الىپ قالعان. ەسىل ەرگە سنارياد جارىقشاعى ءتيىپ قانسىراپ جاتقاندا ءوزى دە جارالانعانىنا قاراماستان باسىن سۇيەپ ولىمنەن قۇتقارىپ قالۋعا بارىن سالعان. وكىنىشكە قاراي، سوعىستىڭ بىتۋىنە نەبارى ءبىر ايدان ءسال استام ۋاقىت قالعاندا داڭقتى گەنارال العان جاراقاتىنان ەسىن جيماعان كۇيى گوسپيتالدە كوز جۇمادى. كەيىننەن قۇرالاي اپاي سابىر اعامىزعا كەڭەستەر وداعىنىڭ باتىرى اتاعىنىڭ بەرىلۋىنە، سۇيەگىن ەلگە الىپ كەلىپ جەرلەۋگە ەلەۋلى ۇلەس قوسادى. ال مىنا سۋرەت 1989 جىلى وڭتۇستىك قازاقستان وبلىسى، قازىعۇرت اۋدانىنداعى (بۇرىنعى لەنين اۋدانى) سابىر اعانىڭ كىندىك قانى تامعان كوكبەل اۋىلىندا تۇسىرىلگەن بولاتىن. سول جولى نەمەرە ءىنىسى شەرحان اعا باستاعان اعايىن-تۋىستارى باتىردىڭ رۋحىنا باعىشتاپ ارنايى اس بەردى. قۇرالاي اپايدىڭ جيىن سوڭىنان بەرگەن قازاقتىڭ ءبىرتۋار داڭقتى ۇلى سابىر راقىموۆ تۋرالى شىندىقپەن شيراتىلىپ، اقيقاتپەن ورىلگەن ەستەلىك سۇبقاتى كوپ ۇزاماي قازاق راديوسىنىڭ ەفيرى ارقىلى تىڭدارمانعا جول تارتقان ەدى.

Abai.kz