ورتالىق ازيا بويىنشا فوتوحرومدى لينزا شىعاراتىن جالعىز كاسىپورىن – «مەداسپاپوپتيكا». اتالعان كومپانيانىڭ ديرەكتورى - ارىستانبەك جۇماعۇلوۆ (سۋرەتتە), «اتامەكەن» ۇكپ –  مەملەكەت پەن كاسىپكەرلەردىڭ تەڭ دارەجەدەگى ديالوگ الاڭى دەپ سانايدى.

تاۋەلسىزدىكتىڭ العاشقى جىلدارىندا  جۇرگىزىلگەن  جەكەشەلەندىرۋ پروتسەسى كوپتەگەن كاسىپورىنداردىڭ  جاندانۋىنا مۇمكىندىك بەردى. ولاي دەيتىنىمىز، كەڭەس زامانىندا قۇرىلىپ، 90 جىلدارداعى ەلەڭ-الاڭ شاقتا قۇلدىراعان زاۋىت-فابريكالار جەكەمەنشىككە وتكەن سوڭ، جاڭا زامانعا يكەمدەلىپ دامي باستادى. بۇگىندە ولاردىڭ بىرقاتارى ۇزدىك  دەپ تانىلىپ، ەلىمىزدىڭ كوشباسشى وندىرۋشىلەرىنە اينالىپ وتىر. سونداي كاسىپورىنداردىڭ ءبىرى – «مەداسپاپوپتيكا» جشس.   

قازىرگى تاڭدا ءۇش تسەح پەن «مەدوپتيكا» دۇكەندەر جەلىسىنەن، سونىمەن قوسا، جالپى سانى  200-گە جۋىق جۇمىسشىدان تۇراتىن ەلىمىزدىڭ بەلدى كومپانياسى «مەداسپاپوپتيكا» جشس، بىردەن تۇراقتىلىققا قول جەتكىزگەن جوق. بۇل تۋرالى،  كومپانيا باسشىسى ارىستانبەك جۇماعۇلوۆ بىلاي دەيدى: «كاسىپورىن 1998 جىلى بانكروتقا ۇشىراپ، تاراتىلۋدىڭ از-اق الدىندا تۇرعان بولاتىن.  قۇرال-جابدىقتارىنىڭ ءبارى ساتىلىپ كەتكەن، ال تەحنولوگيالارى ەسكى ەدى. كەيىن وزىق تەحنولوگيالاردى ساتىپ الىپ،  جاڭا ونىمدەر شىعارا باستادىق».

«مەداسپاپوپتيكا» جشس  مەديتسينا سالاسىنداعى ونىمدەردى شىعارۋ جانە وڭدەۋ جۇمىستارىمەن  اينالىساتىن بىردەن-ءبىر كاسىپورىن. كوزدىڭ  كورۋ قابىلەتىن جاقسارتاتىن لينزالار، سونىڭ ىشىندە فوتوحرومدى لينزالار- كاسىپورىننىڭ ماقتانىشى.   سونىمەن قوسا، كومپانيا  الەمدىك ستاندارتقا ساي مەديتسينالىق قۇرالدار ءوندىرىسىن قولعا العان. ناقتىراق ايتقاندا، جالپىحيرۋرگيالىق وپەراتسيا ۇستەلدەرىن،  وتتەگى ستانتسيالارىن، ۋلترافيولەتتى شامدار مەن «Arlan» ماركالى لابوراتوريالىق شكافتارىن شىعارادى. كاسىپورىن شىعاراتىن ءونىم قازاقستان رەسپۋبليكاسىنىڭ ISO 13485-2008 – «مەديتسينالىق قۇرالدار» مەديتسينالىق تەحنيكا مەن قۇرالداردى ءوندىرۋ سەرتيفيكاتىمەن ماراپاتتالعان.

50 جىلدىق تاريحى بار كومپانيا  2013 جىلى «بيزنەستىڭ جول كارتاسى 2020» باعدارلاماسى شەڭبەرىندە 70 ميلليون تەڭگە سۋبسيدياعا قول جەتكىزدى. مەكەمە باسشىسى ارىستانبەك جۇماعۇلوۆتىڭ ايتۋىنشا، مەملەكەت تاراپىنان جاسالعان بۇل قولداۋ زاۋىتتى مودەرنيزاتسيالاپ، الەمدىك ستاندارتقا ساي ءونىم شىعارۋعا ۇلكەن مۇمكىندىك بەرەدى. ناتيجەسىندە، 2014 جىلى ونىمدەردىڭ ساپاسى جوعارى باعالانىپ، كاسىپورىن مەملەكەت باسشىسىنىڭ «التىن ساپا»  سىيلىعىنىڭ «حالىق تۇتىناتىن تاۋارلاردى شىعاراتىن ۇزدىك كاسىپورىن» نوميناتسياسىن يەلەنگەن.

بۇگىنگى تاڭدا، كاسىپورىن  «اتامەكەن» ۇكپ-نىڭ مۇشەسى رەتىندە اتالمىش ۇيىممەن تىعىز قارىم-قاتىناستا جۇمىس ىستەپ، ۇلكەن جەتىستىكتەرگە جەتۋدە. اتاپ ايتقاندا، ء«بىر جاعادان باس، ءبىر جەڭنەن قول شىعارۋ» ارقاسىندا، «اتامەكەن» ۇكپ مەن  «مەداسپاپوپتيكا» جشس  بىرلەسىپ، وتاندىق مەديتسينالىق قۇرىلعىلار وندىرۋمەن اينالىساتىن كومپانيالاردىڭ باسىن بىرىكتىرەتىن «مەديتسينالىق قۇرىلعى شىعارۋشىلار كوميتەتى» اتتى  شاعىن ۇيىم قۇرعان. سونىمەن قوسا، كاسىپورىننىڭ ءبىر وكىلى الماتى وكپ كەڭەسىنىڭ مۇشەسى بولىپ سايلاندى. وسى ارقىلى، مەديتسينالىق قۇرىلعىلار وندىرەتىن كاسىپورىنداردىڭ ورتاق ماسەلەلەرىن كاسىپكەرلەر پالاتاسىنا جەتكىزىپ،  ۇسىنىستاردى تالقىعا سالۋ شاراسى جەڭىلدەدى. جالپى العاندا، كاسىپورىن «اتامەكەن» ۇكپ-سى ارقىلى مەملەكەتتىك ورىندارمەن بايلانىسىپ، ءوز كاسىپورىندارى مەن قازاقستاندىق ءوندىرىستى دامىتۋ ماسەلەسىن بىرلەسىپ شەشۋگە اتسالىسىپ جاتىر.

ارىستانبەك جۇماعۇلوۆتىڭ ايتۋىنشا، بيزنەس سالاسىنداعى باستى قيىندىقتار – سىبايلاس جەمقورلىق جانە شيكىزاتتىڭ قىمباتتىعى. «بيزنەستىڭ دامۋىنا سىبايلاس جەمقورلىق كەدەرگى كەلتىرۋدە. ء بىز ءوز قۇقىمىزدى قورعاپ، جەمقورلىققا جول بەرمەۋگە تىرىسامىز.  «اتامەكەن» كاسىپكەرلەر پالاتاسى  دا وسى باعىتتا جۇمىس جاساپ جاتىر. كاسىپكەر باسقا ماسەلەلەرگە الاڭداماي، تەك ءوندىرىس پەن ونىمدەردىڭ ساپاسى جونىندە كوپ ىزدەنۋى كەرەك.  وسى رەتتە  ۇلتتىق پالاتا ۇكىمەت پەن كاسىپكەرلەردى بايلانىستىرىپ تۇرعان كوپىر ەكەندىگىنە كوز جەتكىزەمىز. ەكىنشى ماسەلە، ءبىزدىڭ وندىرىسىمىزگە كەرەك  شيكىزاتتاردىڭ دەنىن شەتەلدەن ساتىپ الامىز. بىزگە مەملەكەتتىڭ جاساپ وتىرعان ۇلكەن كومەگى – «سۇلۋتور» اتتى لينزاعا ققس سالىنبايدى. الايدا، شەتەلدىك شيكىزاتتار بىزگە جەتكەنگە دەيىن كەدەندىك سالىقتار ەسەبىنەن شارىقتاپ كەتەدى. سوڭىندا ونىمدەرىمىزدىڭ باعاسى  قىمباتتاپ، شەتەلدىك باسەكەلەستەر الدىندا ءبىزدىڭ مۇمكىندىگىمىز ازايا تۇسەدى. بولاشاقتا ء وندىرىس  دامىپ، قاجەتتى شيكىزاتتار ەلىمىزدە وندىرىلسە، بىزگە دە ءتيىمدى بولار ەدى»، – دەيدى كاسىپكەر.

Abai.kz