بۇگىن «Abai.kz» ۇلتتىق پورتالىنىڭ قازاق اقپارات كەڭىستىگىنە قوسىلعانىنا 7 جىل تولدى. وسى ۋاقىت ارالىعىندا سايتىمىز قوعامنىڭ بارلىق  كەلەلى، كەلەڭسىز، كوڭىلدى، كوڭىلسىز، سۇرىقتى، سۇرەڭسىز جاعداياتتارىن بۇكپەسىز جازىپ، مەملەكەتتىڭ قوعامدىق-ساياسي ومىرىنە ەتەنە ارالاسىپ كەلەدى. اتقارىلعان شارۋاعا شالقايىپ، شىدىرەيىپ ەمەس، الاش جۇرتىن الاڭداتقان ماسەلەلەرگە مۇقيات قارايتىن «Abai.kz» پورتالىن قۇتتىقتاپ ەلىمىزدىڭ تۇكپىر-تۇكپىرىنەن وقىرماندار حابارلاسىپ جاتىر-اق. سولاردىڭ ىشىندە  پارلامەنت وكىلدەرى  دە ۇلت زيالىلارىنىڭ ۇيىساتىن ورتاسىنا، الاڭىنا اينالعان «Abai.kz» پورتالىنا جىلى لەبىزدەرىن بىلدىرگەن. سولاردىڭ ءبىرسىپارىسىن سىزدەرمەن بولىسكەندى ءجون سانادىق.

مۇرات باقتيارۇلى، قر پارلامەنتى سەناتىنىڭ دەپۋتاتى:

قازاقتىڭ ۇلى اقىنى، دانىشپانى – اباي قۇنانبايۇلىنىڭ ەسىمىن يەلەنگەن «Abai.kz» سايتى بيىل جەتى جاسقا جاسقا تولىپ وتىر. ۇلتتىڭ ءھام مەملەكەتتىڭ جۇگىن ارقالاپ كەلە جاتقان اقپارات قۇرالدارىنىڭ ءبىرى دەپ بىلەمىن مەن بۇل سايتتى. مەن جانە مەنىڭ ارىپتەستەرىم «Abai.kz» سايتىنا كۇنىنە ەكى-ءۇش مارتە كىرىپ، نە جازىپ جاتىر ەكەن دەپ ەلەڭدەپ وتىراتىنىمىز جاسىرىن ەمەس. سەبەبى، بۇگىنگى قوعامداعى  وزەكتى ماسەلەلەردى وتكىر ءارى جان-جاقتى جازاتىن، جەتەر جەرىنە جەتكىزىپ جازاتىن، مەملەكەت، ۇلت ءۇشىن ماڭىزدى دۇنيەلەردى ناق جازاتىن ۇلتتىق اقپاراتتىق توراپتاردىڭ ىشىنشە بىردەن-ءبىرى دەپ تۇسىنەمىن.

بيلىكتىڭ وسال تۇستارىن،  ۇلتتىق ماسەلەلەرگە بايلانىستى جەتپەي جاتقان جەرلەرىن ايتىپ كورسەتەتىن، باتىل ايتىپ قانا قويماي ونىڭ شەشۋ جولدارىن دا بىزگە كورسەتىپ وتىراتىن وسى  - Abai.kz سايتى ەكەنىنە بۇگىن ەشكىمنىڭ داۋى جوق. سونىمەن بىرگە، ءبىزدىڭ زيالى قاۋىمنىڭ جاقسى پىكىرلەرىن، كەيبىر رەسپۋبليكالىق دەگەن گازەتتەر جازا المايتىن، باسا المايتىن كوپتەگەن وتكىر ماسەلەلەردى وسى - Abai.kz-تەن كورىپ جاتامىز.

مەن عانا ەمەس، سەناتتاعى كوپ دەپۋتات ارىپتەستەرىم ۇلتتىق – اباي سايتىن قاراپ وتىرادى. ءتىپتى، وسى سايتتاعى  ماقالالاردى تالداپ وتىرادى. سول ماقالاردىڭ باسىم بولىگى بىزگە سەنات قابىرعاسىندا ماسەلەلەر كوتەرۋگە تۇرتكى بولاتىنى شىندىق.

سوندىقتان، «Abai.kz» - بۇل شاعىن عانا كوللەكتيۆتىڭ ەمەس، بۇكىل ۇلتتىق رۋحىن وياتىپ، ساناسىن تىرىلتەتىن، كەشەگى «قازاق»، «ايقاپ» گازەتتەرىنىڭ بۇگىنگى انالوگى دەپ بىلەمىن.

ەڭبەكتەرىڭىزگە تابىس، شىعارماشىلىق جەتىستىكتەر تىلەيمىن!

الدان سمايىل، ەكس-دەپۋتات، جازۋشى، پۋبليتسيست:

راسىمەن دە، ءبىراز ۋاقىتتان بەرى كوز قۋانىشىمىزعا اينالعان ينتەرنەت گازەت قوي – «Abai.kz». اسىرەسە مىناۋ ۇلتتىق ماسەلەلەرگە، ۇلتتىق نامىستى وياتاتىن، جاستار ساناسىنا سىلكىنىس اكەلىپ، رۋحىمىزدى قامشىلايتىن ماقالالار كوپ جازىلادى. قازىر «Abai.kz» پورتالى قازاق ءتىلدى اقپارات كەڭىستىگىندەگى ەركىن پىكىر الماساتىن الاڭعا اينالدى. ءبىزدىڭ اقپاراتتىق كەڭىستىكتى جالپى العان كەزدە، مىناۋ اقيقاتتى ايتا الاتىن، مۇمكىندىگىنشە ايتا الاتىن، ءتۇسىندىرىپ ايتا الاتىن وزدەرىڭز سەكىلدى بۇقارالىق اقپارات قۇرالدارىمەن سالىستىرىپ قارايتىن بولساق، «Abai.kz» پورتالى سولاردىڭ كوشىن باستاپ كەلە جاتىر.

جابال ەرعاليەۆ، قر پارلامەنتى سەناتىنىڭ دەپۋتاتى:

-قازىر نە كوپ، گازەت پەن جۋرنال كوپ! جاقسى دەيمىز. تاعى دا نە كوپ، ءتۇرلى سايتتار كوپ! بۇعان دا جاقسى دەيمىز. الايدا، ۇلتىم دەگەن ۇل مەن قىزدىڭ، حالقىم دەيتىن قالىڭ كوپتىڭ كوڭىلىنەن شىعار سايتتىڭ ءبىرى وسى «اباي.KZ» ەكەندىگىن ەرەكشە ايتار ەدىم.  وزىمە سولاي. سوندىقتان دا «ابايدىڭ»  بەتتەرىن ءجيى-ءجيى اقتارىپ وقىپ وتىرامىن. كوڭىلگە جاعاتىنى سول، بۇل سايتتا كوبىنەسە حالقىمىزدىڭ  رۋحاني جان دۇنيەسىن بايىتۋ، تاريحىن تارازىلاۋ، ۇلت مۇددەسىن سارالاۋ جايىندا ويلى دا سىندارلى دۇنيەلەر بەرىلىپ تۇرادى.

ءسوزدىڭ قادىرى مەن قاسيەتىن تەرەڭ ۇعىپ، باعالاي بىلگەن حالىقتىڭ ءبىرى - ءبىزدىڭ قازاق! ولاي بولسا، «اباي» سايتى دا قازاقتىڭ ءسوز قادىرىن ارتتىرۋعا ۇلەس قوسىپ كەلەدى. ارينە، كەي-كەيدە ءتۇرلى پىكىرلەردىڭ «جارىلىسى» بولىپ جاتاتىنى دا بار. سول پىكىر سوزدەردىڭ ورىندىسى دا، ورىنسىزى دا كەزدەسەدى. بۇل دا كەرەك!  ويتكەنى، ءبىز ەرتەدەگى بي-شەشەن بابالارىمىز سياقتى بىرەۋدىڭ ءسوزى مەن پىكىرىنە تورەلىك ايتۋدى  ەندى-ەندى ۇيرەنە باستاعاندايمىز. سايتتار ارقىلى «ايتىسىپ تا، تارتىسىپ تا» جونگە كەلەرمىز، ەستى ءسوزدى تانىرمىز، سوعان توقتارمىز دەپ ويلايمىن. ءبىز قازىر وسىنى ۇيرەنىپ جاتقاندايمىز.

«اباي» سايتى وسى ءبىر ىزگى ۇستانىمدا كەلە جاتقانداردىڭ ءبىرى. قازاق ءسوزىنىڭ قادىرى مەن قاسيەتىن ارتتىرىپ، جۇيەلى سويلەۋگە كەلگەندە سابىر مەن ساليقالىلىق تانىتۋلارى  كوكەيگە قونادى.  ءبىزدىڭ ءبارىمىز دە قازاقستان رەسپۋبليكاسىنىڭ تۇڭعىش پرەزيدەنتى، ەلباسى نۇرسۇلتان نازارباەۆتىڭ ىشكى جانە سىرتقى ساياساتىن قولداي وتىرىپ، «ماڭگىلىك ەل» بولۋ جولىنداعى ۇلت مۇراتىن بارىنەن دە بيىك قويۋعا ءتيىستىمىز. وسىنى ويلايىق!

بۇگىنگى كۇنى ءوزىنىڭ جەتى جىلدىعىن اتاپ وتىرعان «ابايلىقتارعا» شىعارماشىلىق تابىستار مەن زور ابىروي تىلەيمىن. ارتىندا دانالىق ءسوزى قالعان حاكىم ابايدىڭ ۇلاعاتىن بەرسىن!

Abai.كz