جىل باسىنان بەرى ماقتارالدا 8 ەلدى مەكەن اۋىز سۋمەن قامتىلدى. تاۋلىك بويى تىرشىلىك ءنارى بەرىلىپ جاتقان اۋىلداردىڭ ىشىندە س.سەيفۋللين، قۇلشىعاش، جامبىل ەلدى مەكەندەرى دە بار. بۇل تۋرالى «وقو اكىمىنىڭ ءباسپاسوز قىزمەتى» حابارلايدى.

ايتا كەتۋ كەرەك 2015 جىلى اۋىز سۋدى كورشى اۋىلداردان تۇتىنىپ وتىرعان اۋدانداعى اندرەەۆ، الپامىس، دوستىق، سىراباد، ع.مۇراتباەۆ، اباي، ابات، اتامۇرا، قاراقىر سىندى 9 ەلدى مەكەننىڭ حالقى تازا اۋىز سۋمەن قامتاماسىز ەتىلگەن بولاتىن. ناتيجەسىندە، بۇگىنگە دەيىن اۋدانداعى 24 ساعات بويى تازا اۋىز سۋ بەرىلىپ جاتقان ەلدى مەكەندەردىڭ سانى 64-كە جەتتى.

ەلدى مەكەندەردى تىرشىلىك نارىمەن قامتۋ جۇمىستارى ودان ءارى جالعاسۋدا. بۇگىنگى تاڭدا ماقتالى ءوڭىر - مىرزاشولدەگى «وڭىرلەردى دامىتۋ» باعدارلاماسى اياسىندا جەرگىلىكتى بيۋدجەتتەن 355 ملن. تەڭگەدەن استام قاراجات ءبولىنىپ، نۇرلى تاڭ، ىرىستى، ق.پەرنەباەۆ، تابىستى، وكتيابر، داتقا، دارحان، سايلاۋ، نۇر، تىڭ دالا، كوكارال، ازات ەلدى مەكەندەرىندەگى توزىعى جەتكەن سۋ قۇبىرلارىن جوندەۋ، سۋ ەسەپتەگىش قۇرالدارىن ورناتۋ جۇمىستارى جۇرگىزىلۋدە.

ماقتارالداعى جەر استى سۋ قورىنىڭ مولشەرىن، ساپاسىن، جارامدىلىعىن انىقتاۋ ماقساتىندا  2015 جىلى 26 ەلدى مەكەندە گەولوگيالىق ىزدەۋ-بارلاۋ جۇمىستارى جۇرگىزىلسە، 2016-2017 جىلدارعا 19 ەلدى مەكەننىڭ جەراستى سۋ قورىنا ىزدەۋ-بارلاۋ جۇمىستارىنىڭ جسق ازىرلەۋگە قارجى بولدىرۋگە سالالىق باسقارماعا ۇسىنىس بەرىلىپ وتىر.

جالپى، حالقى كۇن ساناپ ءوسىپ جاتقان ماقتارال اۋدانىنداعى 174 ەلدى مەكەندە ۇزىندىعى 1885 شاقىرىم بولاتىن قولدانىستاعى سۋ قۇبىرى بار. بۇل سۋ قۇبىرلارىندا 225 دانا اۋىز سۋ ۇڭعىسى، 165 سۋ مۇناراسى مەن 12 سۋ ساقتاعىش جانە سانيتارلىق قورعاۋ ايماقتارى حالىق يگىلىگىنە جۇمىس ىستەپ تۇر.

اباي اقپارات