بۇگىنگى كۇنگە دەيىن اتىراۋلىقتاردان جەر رەفورماسىنا قاتىستى 27 ۇسىنىس-پىكىرلەر كەلىپ ءتۇستى. بۇل تۋرالى بۇگىن اتىراۋدا ءوتىپ جاتقان جەر رەفورماسى بويىنشا رەسپۋبليكالىق كوميسسيانىڭ كەزەكتى وتىرىسىندا ءمالىم بولدى.

اتىراۋ وبلىستىق قوعامدىق كەڭەسىنىڭ توراعاسى م. وتەشەۆتىڭ ايتۋىنشا، جەرگىلىكتى حالىق جەكە تۇرعىن ءۇي قۇرىلىسىنا جەر ءبولۋ، شەتەلدىكتەرگە اۋىل شارۋاشىلىعى ماقساتىنداعى جەر ۋچاسكەلەرىن ساتۋعا جانە جالعا بەرۋگە تىيىم سالۋ، جەردى جالعا بەرۋدىڭ بۇرىنعى 10 جىلدىق نورماسىن قالدىرۋ، جەر ۋچاسكەلەرىن ءتيىمدى پايدالانعاندارعا ءوز جەرلەرىن جەكەمەنشىككە ساتىپ الۋ مۇمكىندىكتەرىن قاراستىرۋ، جەرگە باقىلاۋدى كۇشەيتۋ سياقتى ماسەلەلەر توڭىرەگىندە ءوز ۇسىنىس-پىكىرلەرىن بىلدىرگەن.

«بۇگىنگە دەيىن قوعامدىق كەڭەسكە تۇرعىنداردان 27 ۇسىنىس-پىكىرلەر كەلىپ ءتۇستى. قوعامدىق كەڭەس مۇشەلەرى جەر رەفورماسى ماسەلەلەرىن اقپاراتتىق-ءتۇسىندىرۋ جۇمىستارى بويىنشا قۇرىلعان 29 توپتىڭ قۇرامىنا ەنگىزىلدى (وبلىستىق – 4, قالالىق – 4, اۋداندار - 21). توپ مۇشەلەرى مەكەمەلەر مەن ۇيىمداردا 131 كەزدەسۋ وتكىزىپ، سونىڭ بارىسىندا 171 ماسەلە تالقىلاندى. ەڭ باستىسى، قازىرگى كەزدە قوعامدىق كەڭەستەر جەر رەفورماسى بويىنشا رەسپۋبليكالىق كوميسسيامەن ءوزارا ءتيىمدى ءىس-ارەكەتتەردى جۇزەگە اسىرۋدا. مىسالى، وبلىستىق دەڭگەيدەگى كەزدەسۋدە كەڭەسكە قاتىسۋشىلار قوعامدىق كەڭەس حاتشىلىعىن حالىقتىڭ ۇسىنىستارىن جيناقتاپ، رەسپۋبليكالىق كوميسسيا قاراۋىنا جولدايتىن ورتاق ورگان رەتىندە بەكىتتى»،- دەدى م. وتەشەۆ كوميسسيا وتىرىسىندا. ول سونداي-اق وبلىس اكىمدىگى جانىنان قۇرىلعان «جەر رەفورماسى ماسەلەلەرى بويىنشا call-ورتالىققا (27-01-11)» قوڭىراۋ شالعان اتىراۋلىقتار جەر رەفورماسىنا قاتىستى الۋان ءتۇرلى ساۋالدارىنا جاۋاپ الىپ جاتقانىن دا جەتكىزدى.

ماسەلەن، بۇگىنگە دەيىن call-ورتالىققا 70 ادامنان قوڭىراۋ ءتۇسىپتى. سونىڭ ىشىندە 55-ءى – جەكە تۇرعىن ءۇي قۇرىلىسى ماسەلەسىن، 12-ءسى – جەكە ماسەلەسىن، 3-ءۋى – جەر رەفورماسى بويىنشا سۇراعان. قوڭىراۋلاردان بايقالعانىنداي، تۇرعىنداردىڭ باسىم كوپشىلىگىن (78 پايىزى) جەكە تۇرعىن ءۇي قۇرىلىسىنا جەر ۋچاسكەلەرىن الۋ ماسەلەسى قىزىقتىرادى. وتەشەۆتىڭ اقپاراتى بويىنشا، 2016 جىلدىڭ 1 ماۋسىمىنا دەيىن جەكە تۇرعىن قۇرىلىسىنا جەر تەلىمىن الۋ تۋرالى ءوتىنىش بەرگەندەردىڭ سانى 81 551-ءدى قۇراعان. سونىڭ ىشىندە، تەك اتىراۋ قالاسى بويىنشا 73 مىڭعا جۋىق (89 پايىزى) ارىز تىركەلگەن. - الايدا ينفراقۇرىلىم تارتىلعان دايىن الاڭداردىڭ بولماۋى سالدارىنان مۇنداي وتىنىشتەر باياۋ قاناعاتتاندىرىلۋدا، - دەپ اتاپ ءوتتى م. وتەشەۆ.

ءامىرلان ءالىمجان  

Abai.kz