وزبەكستان ءسىم رەسمي سايتىنداعى اقپارات بويىنشا، ميرزياەۆتىڭ 19 شىلدەدە جولدانعان حاتىندا تاجىكستاننىڭ ەلدەگى ەلەكتر قۋاتىنا تاپشىلىق ماسەلەسىن روگۋن گەس-ءىنسىز-اق شەشە الاتىنى، بۇل ماسەلەنى قاۋىپسىز جولمەن شەشۋ كەرەكتىگى جازىلعان.

تاجىك بيلىگى بۇل حاتقا ازىرگە جاۋاپ بەرگەن جوق. تاجىكستان ءسىم-دەگى ءبىر دەرەككوزدىڭ ايتۋىنشا، شاۆكات ميرزياەۆتىڭ حاتى جەتكەن كۇننىڭ وزىندە، اۋەلى ونى باسشىلىق تەكسەرەدى، ودان سوڭ عانا رەسمي جاۋابى پايدا بولادى. ميرزياەۆ جولداۋىندا «تاجىكستاننىڭ روگۋن گەس-ءىن كەز-كەلگەن جولمەن اياقتاۋعا تالپىنۋى الاڭداۋشىلىق تۋعىزادى، ال ونىڭ ورنى تولماس سالدارى ەسكەرتۋ جاساۋعا ماجبۇرلەيدى» دەپ جازىلعان.

وزبەك ۇكىمەت باسشىسى بۇل قۇرىلىستىڭ بۇكىل ورتالىق ازيا ايماعىنا قاۋىپتى ەكەنىن كورشى ەلدەردىڭ باسشىلارى مەن ساراپشىلارى بىرنەشە مارتە مالىمدەگەنىن ەسكە سالعان. سوعان بايلانىستى، جوبانىڭ تەحنوگەندى، ەكولوگيالىق جانە ەكونوميكالىق سالدارىن ەسكەرگەن دۇنيەجۇزىلىك بانك ونى قارجىلاندىرۋدان باس تارتتى، دەلىنگەن حاتتا. بۇعان دەيىن تاجىك بيلىگى روگۋن گەس-ءىنىڭ قۇرىلىسى اياقتالعان سوڭ، وزەننىڭ تومەنگى سالاسىنداعى ەلدەر، اتاپ ايتقاندا وزبەكستانداعى شارۋاشىلىق جەرلەرى سۋسىز قالمايدى دەپ مالىمدەگەن ەدى.

روگۋن سۋ ەلەكتر ستانتسياسىن سالۋدى «وتە ماڭىزدى ماسەلە» دەپ ەسەپتەيتىن تاجىكستان ۇكىمەتى 1 شىلدەدە يتاليالىق كومپانيامەن ستانتسيا قۇرىلىسىن اياقتاۋ تۋرالى شارت جاساستى. كەلەسىم-شارت قۇنى - 3,9 ميلليارد دوللار. Salini Impregilo كومپانياسى ستانتسيانىڭ العاشقى ەكى اگرەگاتىن 2018 جىلى ىسكە قوسۋعا ۋادە بەرىپ قويدى.