اقش-تىڭ تۇركياداعى توڭكەرىس ارەكەتىنە قاتىسى جوق
اقش-تىڭ مەملەكەتتىك حاتشىسى دجون كەرري تۇركيا ءسىم باسشىسى مەۆلەت چاۆۋشوگلۋمەن اڭگىمەلەسىپ، تۇركيادا توڭكەرىس جاساۋ ارەكەتىنە اقش-تىڭ قاتىسى بار دەلىنەتىن مالىمدەمەلەر ەكى ەل اراسىنداعى قارىم-قاتىناسقا زيان تيگىزەتىنىن ەسكەرتتى. بۇل تۋرالى 17 شىلدەدە Reuters مەملەكەتتىك دەپارتامەنتتىڭ رەسمي وكىلى دجون كيربيگە سىلتەمە جاساپ حابارلادى.
«كەرري اقش-تىڭ تۇرىك بيلىگىنە تەرگەۋگە كومەكتەسۋگە دايىن ەكەنىن اشىپ ايتتى، بىراق قۇراما شتاتتاردىڭ ءساتسىز توڭكەرىس ارەكەتىنە قاندايدا ءبىر قاتىسى بولۋى مۇمكىن دەگەندەي قارا پيعىلدى مالىمدەمەلەردىڭ نەمەسە تۇجىرىمداردىڭ ەكى ەل قارىم-قاتىناسىنا كەرى اسەر ەتەتىنىن ەسكەرتتى»، - دەدى كيربي.
مەملەكەتتىك دەپارتامەنت حابارلاماسىندا ايتىلعانداي، كەرري تۇركيانىڭ دەموكراتيالىق جولمەن سايلانعان ۇكىمەتىن قولدايتىنىن تاعى دا قايتالاپ، انكارانى ءساتسىز توڭكەرىس ارەكەتىن تەرگەۋ بارىسىندا زاڭدى ساقتاۋعا شاقىردى.
16 شىلدەدە تۇركيا پرەزيدەنتى رەجەپ تايىپ ەردوگان امەريكالىق ارىپتەسى باراك وبامادان تۇركيانىڭ يسلام ءدىنىن ۋاعىزداۋشىسى فەتحۋللاح گيۋلەندى ۇستاپ بەرۋىن سۇرادى. انكارا گيۋلەندى اسكەري توڭكەرىس جاساۋعا تالپىنىس جاسادى دەپ ايىپتاپ وتىر. ء«بىزدىڭ ستراتەگيالىق ارىپتەس ەكەنىمىز راس بولسا، ءوتىنىشىمىزدى ورىنداڭىز. ءبىز سىزدەر سۇراتقان تەررورشىلاردى ۇستاپ بەرىپ ءجۇرمىز»، - دەدى مەملەكەت باسشىسى.
بۇعان دەيىن اقش مەملەكەتتىك حاتشىسى دجون كەرري ءساتسىز توڭكەرىس ارەكەتىنە گيۋلەننىڭ قاتىسى بارىن دالەلدەيتىن فاكتىلەردى قاراۋعا دايىن ەكەنىن مالىمدەگەن بولاتىن.
اباي-اقپارات
