بۇگىن موڭعولياعا ارنايى ىسساپارمەن بارعان ۇكىمەت باسشىسى كارىم ءماسىموۆ بايان-ولگەيدەگى اپاتتان زارداپ شەككەن اعايىنمەن كەزدەسىپ، مەملەكەت تاراپى قانداستارىمىزعا كومەگىن ايامايتىنىن جەتكىزدى. ءتىلى قازاقشا كاليماعا كەلمەي جۇرگەن پرەمەر-ءمينيسترىمىز مەملەكەتتىك تىلدە سارناپ قويا بەرگەنى سول ەدى، ول جاقتاعى اعايىن كارىم مىرزاعا ات مىنگىزىپ، شاپان جاپتى.

ارينە، ءماسىموۆ مىنگەن ات جايلى ايتىپ، شەتتەگى اعايىنعا ۇكىمەتتىڭ قول ۇشىن سوزعانىن "جارنامالاپ" ودا ايتۋدان اۋلاقپىز. دەسە دە وسى جولى قازاق مەملەكەتى الەمنىڭ كەز-كەلگەن جەرىندەگى قازاق ازاماتتارىنىڭ پاناسى بولا الاتىنىن بايقاتتى. ءدال وسىنداي ۇرىمتال تۇستا كارىم ءماسىموۆ توبە كورسەتىپ، ءوزىنىڭ ساياسي تۇلعاسىنا ءسال-ءپال بولسا دا ء"ار بەرىپ العانى" بولماسا، ءبىز دە، بايان-ولگەيلىكتەر دە ءدان ريزا...

ءبىز دەمەكشى، بايان-ولگەيدەگى اپات بۇكىل قازاقتىڭ جۇرەگى مەن تىلەگى ءبىرتۇتاسىپ كەتكەنىن ايگىلەدى. الەۋمەتتىك جەلىلەر ارقىلى قوعامدىق بەلسەندىلەر ساۋىن ايتىپ، زارداپ شەككەن اعايىنعا جىلۋ جيناپ جاتىر.

اياتجان احمەتجان، بەلسەندى:  

- اپاتتان زارداپ شەككەن اعايىنعا قول ۇشىن بەرسەك دەگەن باستاما مەنىڭ جەكە يدەيام ەمەس. جىگىتتەرمەن اقىلداسىپ، بەلگىلى جۋرناليست امانگەلدى قۇرمەتۇلى ەكەۋمىز ارنايى شوت اشپاققا كەلىستىك. "سايداعى ارقاردىڭ تۇياعىنا تاس باتسا، قىرداعى ارقاردىڭ مۇيىزى سىرقىرايدى" دەيتىن قازاقپىز عوي. شەتتەگى اعايىننىڭ باسىنا ءىس تۇسكەندە قۇر قول قاراپ وتىرۋعا ءداتىمىز جەتپەدى. 

قۇدايعا شۇكىر، باستاعان جۇمىسىمىز ءساتىن سالىپ، ەل-جۇرت ءبىر قازاق ەكەنىن دالەلدەپ، ءوز كومەكتەرىن كورسەتۋدە. قازاقستاندى بىلاي قويىپ، الىس-جاقىن شەتەلدە جۇرگەن اعايىن دا اقشاسىن اۋدارىپ، قانداستارىمىزدىڭ قامى ءۇشىن بارىن سالىپ جاتىر. ماسەلەن، دانيادان ءبىر ازامات 1000 اقش دوللارىن جىبەردى. ەندى يرلاندياداعى قانداستار حابارلاسىپ، تۇستەن كەيىن اۋدارىم جاسايتىندارىن ايتىپ جاتىر. سونداي-اق، ەلىمىزدەگى ۇجىمدىق مەكەمەلەر مەن ءتۇرلى قورلار جاردەم جاسايتىندىقتارىن جەتكىزدى. ەكى كۇننىڭ ىشىندە جيناعان جىلۋىمىز 1 ملن. تەڭگەدەن استى. 

اللا جار بولسا، 20 شىلدە كۇنى بايان-ولگەيگە جول جۇرمەكپىز. وعان دەيىن ەل بولىپ قاراجات جيناپ، قانداستارىمىزعا مۇمكىندىگىنشە كومەك كورسەتىپ قايتامىز. باسىندا امانگەلدى قۇرمەتۇلى ەكەۋمىز جولعا بىرگە شىعامىز دەگەن ەدىك. ەندى ايدوس سارىم، مۇرات ابەنوۆ اعالارىمىز دا باراتىن سىڭاي تانىتىپ وتىر. 

ءبىز بايان-ولگەيگە بارىپ، ءبىر اپتاداي ساراپتاما جاساپ، نەگىزىنەن كوپ بالالى جانە الەۋمەتتىك جاعدايى تومەن وتباسىلارعا قول ۇشىن سوزباقشىمىز. 

ءتۇيىن

زارداپ شەككەندەرگە جىلۋ جيناۋ جالعاسۋدا. ء"ار قازاق - مەنىڭ جالعىزىم" دەگەن ۇرانمەن وسكەن سىزدەر دە قاراپ قالماعايسىز، وقىرمان قاۋىم!

قانات بىرلىكۇلى

Abai.kz