جاقىندا ءبىر اقىن اعامىز دۇنيە سالدى. ومىردە ارالاس-قۇرالاستىعىم بولعان جوق، ءتىپتى كەزدەسكەن دە ادامىم ەمەس. ناعىز اقىن دەپ تە وتىرىك قىلىمسي المايمىن. ولەڭدى جان-جۇرەگىمەن جازبايدى، تەك سوزدەردى وڭدى-سولدى ۇيقاستىرىپ قۇراستىرعانى بولماسا. سودان كەيىن ولاردا قايدان جان بولسىن، وڭشەڭ قان-ءسولسىز ءولى دۇنيەلەر... ازداپ وقىعان-توقىعانى بار ەدى... سول ءۇشىن دە سىرتتاي سىيلاپ جۇرەتىنمىن. سول اعامىز بىردە ءباسپاسوز بەتىندە قازاق تىلىنە قارسى شىعىپ، ورىس ءتىلىن قورعاشتاپ باقتى. قىزا-قىزا كەلە ءتىپتى قازاق ءتىلىن جاقتاۋشىلاردى جەردەن الىپ، جەرگە سالىپ، ەلىمىزدە ورىس تىلىنە ۇستەمدىك بەرىلۋىن تالاپ ەتتى. تاڭ قالدىم! ارينە، ءوزى قازاقشادان گورى ورىسشاعا جاقىنداۋ ەدى، قازاقشاسىنان گورى ورىسشاسى تاۋىرلەۋ بولاتىن. سودان با ەكەن دەپ ويلادىم. بىراق، جان-جۇرەگى، بولمىسى قازاق بولماسا دا، ۇلتى قازاق قوي، انا تىلىنە نەگە سونشا تاس اتتى ەكەن دەپ ويلادىم! شىنىمدى ايتسام، تۇككە دە تۇسىنبەدىم. وسىدان كەيىن-اق ول اعامىزعا دەگەن كوڭىلىم سۋ سەپكەندەي باسىلدى. ءتىپتى ماعان ەشقانداي زيانى تيمەسە دە، جەك كورىپ كەتتىم. قىڭىرايىپ-قيقايىپ ءجۇردىم. سىرتىنان ءتىلىم تيگەن كەزدەرىم دە بولدى... 

كەزدەسسەم ايتارمىن-اۋ، سەبەبىن سۇرارمىن-اۋ دەپ جۇرەتىنمىن. بىراق، ونى قۇداي جازبادى. دۇنيەدەن كوشىپتى. اللا الدىنان جارىلقاسىن! جاتقان جەرى جايلى، توپىراعى تورقا، جانى ءجانناتتا بولسىن! ارينە، مەن قايتىس بولعان ادامنىڭ ارتىنان عايبات ءسوز ايتۋدان اۋلاقپىن. سۇرىنبەيتىن تۇياق جوق، ومىردەن وزعاننان كەيىن جامانداۋعا حاقىمىز دا جوق، دەسە دە، ەسكەرتەيىن دەگەنىم، ەلىنە، ۇلتىنا، انا تىلىنە ءتىل تيگىزگەندەردى ماقتاماي-اق قويىڭىزدارشى!..

دۋمان رامازان

Facebook-تەگى پاراقشاسىنان