شىلدەنىڭ 1-ءى كۇنى بەلارۋسيا  رەسمي تۇردە ۇلتتىق ۆاليۋتا بىرلىكتەرىنە دەنوميناتسيا جاسادى (دەنوميناتسيا (ەكونوميكادا) -  بۇل قاعاز اقشانىڭ باعالى كاعازعا وزگەرۋى; كوبىنەسە ەلدىڭ اقشا بىرلىگىنىڭ ىرىلەنۋى جانە ەسكى قاعاز اقشا بەلگىلەرىنىڭ اقشا قاتىناسىن رەتتەۋ ماقساتىندا جاڭاعا ناقتى سايكەستەندىرۋ بويىنشا اۋىستىرۋ).

2000-شى جىلدارى قولدانىسقا ەنگىزىلگەن بەلارۋسيانىڭ ەسكى اقشاسى ەندى اينالىمنان شىعادى. ونىڭ ورنىنا 4 نولدىك كورسەتكىشى قىسقارعان نەمەسە سوماسى ىرىلەنگەن جاڭا بەلارۋس اقشاسى قولدانىسقا ەنگىزىلەدى،-دەپ حابارلايدى «dw.com» پورتالى. سونداي-اق، ەندى بەلورۋسيا ۇلتتىق بانكى قاعاز اقشامەن قاتار، تيىن اقشالاردى دا پايدالاناتىنىن مالىمدەدى.

بەلورۋسيا ۇلتتىق بانكىنىڭ حابارلاۋىنشا، قولدانىسقا ەنگەن بانكنوتتار 7 نومينال بويىنشا قاعاز جانە 8 نومينال بويىنشا تيىن بولىپ بەكىتىلدى.

ءاربىر بانكنوتتا بەلورۋسيا رەسپۋبليكاسىنىڭ وبلىستارى بەينەلەنگەن ەكەن. مىسالى، برەست، ۆيتەبسك، گومەلسك، گرودنەنسك، مينسك جانە موگيلەۆسك وبلىستارى ۇلتتىق ۆاليۋتادا كەرەمەت كورىنىس تاپقان.

ەسكى ءام جاڭا وداقتاسىمىزدىڭ (كەدەندىك جانە ەۋرازيالىق ەكونوميكالىق وداق) ءبىرى – بەلورۋسيا رەسپۋبليكاسى قولدانىسقا ەنگىزگەن ۇلتتىق ۆاليۋتاسىنىڭ ەڭ باستى ەرەكشەلىگى – وسىعان دەيىن بولعانداي، ورىس تىلىندە بىردە-ءبىر ءسوز جازىلماعان. وسىلايشا بەلورۋسيا رەسمي ۆاليۋتاسىنان ورىس ءتىلىن الىپ تاستاعان. ال ەسكى اقشا 2016 جىلدىڭ جەلتوقسان ايىنا دەيىن قولدانىستان تولىق شىعارىلماق. بۇل بەلورۋسيا رەسپۋبليكاسىنىڭ 1991 جىلى ەگەمەندىك العان ۋاقىتىنان بەرگى ءۇشىنشى رەت جۇرگىزىپ وتىرعان دەنوميناتسياسى.

ەگەمەندىكتىڭ 25-ءىنشى جىلىندا بەلورۋسيا رەسپۋبليكاسى ۇلتتىق ۆاليۋتاداعى ورىس تىلىنەن ءبىرجولاتا باس تارتتى.

سالىستىرمالى تۇردە قارايتىن بولساق، بەلورۋسيا سلاۆيان توبىنا جاتاتىن، ورىس حالقىمەن جاقىن تۋىس ۇلت بولىپ كەلەدى. جانە قازىرگى تاڭدا بەلورۋسيا ازاماتى رەتىندە تىركەلگەن 9,5 ميلليون حالىقتىڭ 9,8 پايىزىن ورىس ۇلتى قۇرايدى.

ەاەو جانە كو اياسىندا وداقتاسىپ وتىرىپ-اق، بەلورۋسيانىڭ وسىنداي قادامعا بارۋى، قوس ينتەگراتسيا اياسىندا قىسىم جاساپ، مەنبىلەمدىك ساياسات جۇرىگىزىپ وتىرعان رەسەيدىڭ اگرەسسياسى كۇشەيەتىن بولسا، كەشەگى ەو-دان ءبىر-اق كۇندە شىعىپ كەتكەن ۇلىبرياتانيا سەكىلدى ەاەو-دان ءبولىنىپ كەتۋگە قاۋقارلى ەكەندىگىن كورسەتسە كەرەك.

ال تاۋەلسىزدىگى بەلورۋسيامەن تۇيدەي قۇرداس قازاقستاننىڭ مەملەكەتتىك ۆاليۋتاسىندا ءالى كۇنگە سىڭارلاسىپ كەلە جاتقان رەسەيدىڭ مەملەكەتتىك تىلىندەگى جازۋدى قۇرتۋعا قۇزىرلى بيلىك قۇلىقسىزدىق تانىتىپ وتىرعانى جاسىرىن ەمەس.

نۇرزات توعجان

Abai.kz