اسا قامقور ەرەكشە مەيىرىمدى اللانىڭ اتىمەن باستايمىن!

قۇرمەتتى باۋىرلار!

بارشالارىڭىزدى قاسيەتتى قادىر ءتۇنىن ساۋاپتى امالمەن وتكىزۋگە شاقىرامىن.

اللا تاعالا بىلاي دەيدى: «رامازان ايى سونداي ءبىر اي، ول ايدا ادام بالاسىنا تۋرا جول جانە (اق پەن قارانى) ايىراتىن دالەل تۇرىندە قۇران ءتۇسىرىلدى» («باقارا» سۇرەسى، 185-ايات). 

جاھاننىڭ جولباسشىسى مۇحاممەدكە (وعان اللانىڭ سالاۋاتى مەن سالەمى بولسىن) ارداقتى اياتتاردىڭ ءتۇسىرىلۋى وسى ايداعى قاسيەتتى تۇندەردىڭ بىرىندە باستالدى. ول ءتۇن مىڭ ايدان قادىرلى – قادىر ءتۇنى ەدى.

ون ەكى ايدىڭ سۇلتانى – رامازان بەرەكەلى اي بولسا، سول قاسيەتتى ايدىڭ ماڭىزىن قادىر ءتۇنى ءتىپتى ءماندى ەتە تۇسەدى. اللا تاعالا ايلاردان – رامازاندى، كۇندەردەن – جۇمانى، تۇندەردەن قادىر ءتۇنىن ارتىق ەتكەن.  قاسيەتتى قۇران كارىمنىڭ «قادىر» سۇرەسىندە: «قادىر ءتۇنى مىڭ ايدان قايىرلى»، – دەلىنگەن. بۇل تۇندە پەرىشتەلەر جەرگە تۇسەدى.  

قادىر – قاسيەتتى، بەرەكەلى ءتۇن. سوندىقتان وسى ءتۇندى بارلىق مۇسىلماندار قۇلشىلىقپەن وتكىزىپ، وتباسىنىڭ اماندىعىن، ەلدىڭ تىنىشتىعىن تىلەپ دۇعا جاسايدى. قادىر كەشىن قۇلشىلىقپەن وتكىزگەن ادام ۇلكەن ساۋاپقا كەنەلىپ، ەكى دۇنيەنىڭ قۋانىشىنا بولەنەدى.

اللا تاعالا ءبىر اي بويى ۇستاعان ورازالارىمىز بەن قادىر تۇنىندە جاساعان دۇعالارىمىزدى، تىلەكتەرىمىزدى قابىل ەتكەي! ەلىمىز امان، جۇرتىمىز تىنىش بولعاي! ءاربىر وتباسىنا باقىت، بەرەكە تىلەيمىن!

ەرجان قاجى مالعاجىۇلى، قازاقستان مۇسىلماندارى ءدىني  باسقارماسىنىڭ توراعاسى، باس ءمۇفتي

 Abai.kz